គម្រោង​សាងសង់​ទំនប់​វា​រី​អគ្គិសនី​សេ​សាន​ក្រោម​២​នៅ​ខេត្តស្ទឹងត្រែង​នឹង​គ្មាន​ឧបសគ្គ​ព្រោះ​ជា​របស់​ក្រុមហ៊ុន​”​បងធំ​”

6/20/2014 06:01:00 AM

គម្រោងសាងសង់ទំនប់វារីអគ្គិសនីសេសានក្រោម២នៅខេត្តស្ទឹងត្រែងនឹងគ្មានឧបសគ្គព្រោះជារបស់ក្រុមហ៊ុន”បងធំ”

ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានអញ្ជើញទៅឆ្លើយបំភ្លឺនៅចំពោះកិច្ចប្រជុំពេញអង្គរដ្ឋសភានីតិកាលទី៥ របស់គណបក្សប្រជាជនកម្ពុជារួចហើយ កាលពីថ្ងៃទី១៩ ខែមិថុនា ឆ្នាំ២០១៤ម្សិលមិញនេះ ពាក់ព័ន្ធនឹងការអភិវឌ្ឍន៍គម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង ដែលជាគម្រោងអភិវឌ្ឍន៍ដ៏ក្តៅគគុកមួយប្រឈមនឹងផលប៉ះពាល់យ៉ាងច្រើន ដូចជា ប៉ះពាល់ដល់ដីធ្លីប្រជាពលរដ្ឋចំនួន៧៩៧គ្រួសារ (ដីស្រែចំនួន៩១០ហិកតា និងដីលំនៅឋានចំនួន៨០ហិកតា) ប៉ះពាល់ដីសម្បទានសេដ្ឋកិច្ចរបស់ក្រុមហ៊ុនចំនួន៦ និងប៉ះពាល់ដល់ដីព្រៃរបស់រដ្ឋផងដែរ ។ លើសពីនេះ ទាក់ទងនឹងការអនុវត្តន៍គម្រោងក៏លេចចេញមានសកម្មភាពកាប់ឈើនៅក្រៅបាតអាងស្តុកទឹកទំនប់វារីអគ្គិសនីយ៉ាងគគ្រឹកគគ្រេងថែមទៀត ។

ការបំភ្លឺបកស្រាយរបស់ឯកឧត្តមរដ្ឋមន្ត្រីក្រសួងរ៉ែ និងថាមពល អាចនឹងត្រូវបាន"ប្រថាប់ត្រា"ដោយរដ្ឋសភារបស់គណបក្សប្រជាជនកម្ពុជា ពីព្រោះឯកឧត្តមរដ្ឋមន្ត្រីបានបកស្រាយប្រាប់សភាគណបក្សប្រជាជនកម្ពុជាថា ការអនុវត្តន៍គម្រោងសាងសង់ទំនប់វារីអគ្គិសនីសេសានក្រោម២ខេត្តស្ទឹងត្រែងនេះ មានផលចំណេញច្រើនជាងផលប៉ះពាល់ទៅថ្ងៃអនាគត និងម្យ៉ាងទៀត រាល់ផលប៉ះពាល់ទាំងឡាយត្រូវបានក្រុមហ៊ុនអនុវត្តន៍គម្រោងដោះស្រាយហើយ (Sic!) ។ មានន័យថា គម្រោងសាងសង់ទំនប់វារីអគ្គិសនីសេសានក្រោម២ ខេត្តស្ទឹងត្រែងអនុវត្តន៍ដល់ក្រុមហ៊ុន Hydro Power Lower Sesan2 Co., Ltd. នឹងគ្មានឧបសគ្គអ្វីឡើយ ទោះបីរុំព័ទ្ធដោយការរិះគន់ពីមជ្ឈដ្ឋានខាងក្រៅជាច្រើនក្តី ។

សូមបញ្ជាក់ថា គម្រោងអភិវឌ្ឍន៍វារីអគ្គិសនីសេសានក្រោម២ ដែលមានអានុភាព៤០០មេហ្គាវ៉ាត់ ឋិតនៅស្រុកសេសាន ខេត្តស្ទឹងត្រែង និងអនុស្ថានីយ៍ ព្រមទាំងបណ្តាញបញ្ជូនអគ្គិសនីពាក់ព័ន្ធដំណើរការក្រោមរូបភាព BOT (សាងសង់ ដំណើរការ ផ្ទេរ) រយៈពេល៤៥ឆ្នាំ(៥ឆ្នាំជារយៈពេលសាងសង់ និង៤០ឆ្នាំជារយៈធ្វើអាជីវកម្ម)នោះ នឹងត្រូវអនុវត្តន៍ដោយក្រុមហ៊ុន Hydro Power Lower Sesan2 Co., Ltd. ជាក្រុមហ៊ុនចម្រុះកើតឡើងពីការសហការរវាងក្រុមហ៊ុន Royal Group របស់អ្នកឧកញ៉ា គិត ម៉េង ជាប្រធានសភាពាណិជ្ជកម្មកម្ពុជា ជាមួយក្រុមហ៊ុនប្រទេសវៀតណាម និងក្រុមហ៊ុនមកពីប្រទេសចិន លើទំហំទឹកប្រាក់វិនិយោគចំនួន៧៨១,៥២លានដុល្លារអាមេរិក ។

តំណាងក្រុមហ៊ុន China Huaneng របស់ចិន ដែលជាដែគូសហការវិនិយោគជាមួយក្រុមហ៊ុន Royal Group របស់អ្នកឧកញ៉ា គិត ម៉េង លើការអនុវត្តន៍គម្រោងសាងសង់ទំនប់វារីអគ្គិសនីសេសានក្រោម២ ខេត្តស្ទឹងត្រែងនោះ ធ្លាប់បនារាយការណ៍ជូនសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រីនៃព្រះរាជាណាចក្រកម្ពុជាថា ក្រុមហ៊ុនគ្រោងចំណាយថវិកាចំនួន៩៧៧លានដុល្លារអាមេរិក ដើម្បីអនុវត្តន៍គម្រោងសាងសង់ទំនប់វារីអគ្កិសនីនេះឲ្យចប់រួចរាល់ជាស្ថាពរនៅក្នុងឆ្នាំ២០១៧ខាងមុខ ។

សរុបសេចក្តីមក ការអនុវត្តន៍គម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង ទោះបីឋិតនៅក្រោមសម្ពាធនៃការរិះគន់យ៉ាងផុសផុលក៏ដោយ ក៏នឹងគ្មានឧបសគ្គអ្វីរារាំងដែរ ពោលគឺនឹង"ប្រព្រឹត្តទៅដោយរលូន" ដ្បិតក្រុមហ៊ុនដែលចូលរួមអនុវត្តន៍គម្រោងអភិវឌ្ឍន៍ជាក្រុមហ៊ុន"បងធំ"ទាំងអស់ រួមមាន ក្រុមហ៊ុនចិន(មិត្តភក្តិដ៏ស្និទ្ធរបស់កម្ពុជា) ក្រុមហ៊ុនវៀតណាម(បងប្អូនម៉ឺនឆ្នាំរបស់កម្ពុជា) និងក្រុមហ៊ុន Royal Group របស់អ្នកឧកញ៉ា គិត ម៉េង ជាសេដ្ឋីដ៏មានឥទ្ធិពលខ្លាំងក្លាបំផុតនៅកម្ពុជា ៕

Su-Sem-99