កោះកុង៖ លោក សូរិយា សូប៊ែឌី តំណាងពិសេស UN បន្ទាប់ពីចុះជួបពលរដ្ឋដែលមានទំនាស់ដីធ្លីរ៉ាំរៃកាលពីថ្ងៃទី២១ ខែមិថុនា ឆ្នាំ២០១៤ នៅភូមិជីខលើ ស្រុកស្រែអំបិល រួចមក មានបញ្ហាសុខភាព បានខកខានក្នុងការបន្តដំណើរមកជួបពលរដ្ឋនៅស្រុកបទុមសាគរ និង ស្រុកគីរីសាគរ តាមការណាត់ ប៉ុន្តែបានចាត់តាំងលោកស្រី វ៉ាន់ ហ៊ីលី ប្រធានការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធមនុស្សប្រចាំកម្ពុជា ជួបជំនួសវិញ។
កាលពីរសៀលថ្ងៃទី២២ ខែមិថុនា ឆ្នាំ២០១៤ ប្រតិភូតំណាងរបស់អង្គការសហប្រជាជាតិដឹកនាំដោយ លោកស្រី វ៉ាន់ ហ៊ីលី បានទៅដល់ចំណុចភូមិតានូន ឃុំតានូន ដែលជាទីតាំងណាត់ជួបក្នុងនោះមានការរង់ចាំ និង ទទួលស្វាគមន៏ពីប្រជាពលរដ្ឋប្រមាណជាង ១០០គ្រួសារ ដែលមានទំនាស់ដីធ្លីដ៏យូរអង្វែងជាមួយក្រុមហ៊ុន ញូញៀន (Union Development group Co.ltd) លោកស្រី វ៉ាន់ ហ៊ីលី ក្នុងជំនួបជាមួយប្រជាពលរដ្ឋប្រមាណជិត ២ម៉ោងបានថ្លែងប្រាប់ថា ក្នុងនាមអង្គការសហប្រជាជាតិ លោកស្រីមកនេះ គឺមានគោលបំណងស្វែងរកការពិត និង ដើម្បីស្តាប់ផ្ទាល់អំពីទុក្ខកង្វល់របស់ប្រជាពលរដ្ឋដែលមានទំនាស់ដីធ្លី តាមការស្នើរសុំអន្តរគមន៏ របស់ប្រជាពលរដ្ឋតាមរយះអង្គការសង្គមស៊ីវិល ។
គួរបញ្ជាក់ផងដែរថាតំណាងសហគមន៏ចំនួន ៣នាក់ ដែលមកពីមូលដ្ឋានផ្សេងគ្នា បានលើកឡើងប្រហាក់ប្រហែលគ្នា ពីទុក្ខកង្វល់របស់ពួកគាត់ ជូនប្រតិភូតំណាងអង្គការសហប្រជាជាតិទទួលបន្ទុកសិទ្ធមនុស្សដែលមានខ្លឹមសារដូចខាងក្រោម ÷
១-ឈ្មោះ ហ៊ាន សុថាត់ ភេទប្រុស អាយុ៤៥ឆ្នាំ ជាប្រជាពលរដ្ឋរស់នៅភូមិចម្លងគោ ឃុំថ្មស បានត្អូញត្អែថាពួកគាត់មានចំនួន២០គ្រួសារ បានមកធ្វើស្រែនៅចំណុចព្រែកតាទែន ឃុំតានូន ចាប់តាំងពីឆ្នាំ ១៩៧៩មក ព្រោះដីនោះជាដីមរត៌កដូនតា ដីនៅតំបន់នេះមានជីវជាតិល្អ ធ្វើស្រែបានទិន្នផលខ្ពស់ អាចចិញ្ចឹមជីវិតបានហើយនៅឆ្នាំ២០១៤ ប្រជាជនមិនបានធ្វើស្រែ ដោយក្រុមហ៊ុនចិនបានរឹបអូសយកដោយប្រើកម្លាំងទាហាន សន្តិសុខ និងមន្ត្រីបរិស្ថាន ព្រមទាំងប្រើត្រាក់ទ័រមកភ្ជួររាស់កាលពីដើមខែមីនា បើទោះបីជាមានលិខិតលេខ៣១៥ របស់ ស្តីទីគណះរដ្ឋមន្ត្រី ចុះថ្ងៃទី១៩ ខែកុម្ភះ ឆ្នាំ២០១៤ ក៏ដោយ ខាងក្រុមហ៊ុនញូញៀន នៅតែបំពានខ្លឹមសារលិខិតនេះ។
២-លោកស្រី ឡាយ គាត អាយុ៤៦ឆ្នាំ មានទីលំនៅភូមិព្រែកស្វាយ ឃុំតានូន បានរៀបរាប់ថា កាលពីកំឡុងចុងខែមករា ឆ្នាំ២០១៤ ក្រុមហ៊ុនចិនបាននាំកងសន្តិសុខ ទាហាន ព្រមទាំងមន្ត្រីបរិស្ថានប្រហែល ២០នាក់ មានអាវុធ និងដំបង ចូលមកចុះរើផ្ទះពួកគាត់ចំនួន១២គ្រួសារ ដោយកាប់បំផ្លាញជង្រុកស្រូវពួកគាត់ ធ្វើអោយខូចខាតអស់ស្រូវជាច្រើនបាវ រុះរើទ្រុងមាន់ ចាប់មាន់រួចដុតតែម្តង បន្ទាប់មកក្រុមហ៊ុនចិនបានយកត្រាក់ទ័រមកឈូសឆាយ
ផលដំណាំគ្រប់ប្រភេទ រួចភ្ជូររឹបអូសយកដីស្រែ។
កាលពីថ្ងៃទី១២ ខែមិថុនានេះ ពួកក្រុមហ៊ុន បានប្រើទាហានចំនួន៣០នាក់ មានអាវុធមកបញ្ឈប់គោយន្ត ពួកគាត់មិនអោយធ្វើស្រែ ដោយចាក់ប្រេងម៉ាស៊ូតចោល រឹបអូសយកសម្ភារកសិកម្មទៀតផង អំពើទាំងអស់ដែលធ្វើបាបមកលើប្រជាពលរដ្ឋខ្មែរពួកខ្ញុំមិនអាចទទួលយកបានទេ។
ការបំផ្លាញនេះ ពួកខ្ញុំបានដាក់ពាក្យតាមរយះអាជ្ញាធរ ឃុំស្រុក ខេត្ត ទៅគណះកម្មការអន្តរក្រសួង ដើម្បីអោយក្រុមហ៊ុនចិនផ្តល់សំណងនៃការខូចខាតទាំងនេះ តែរហូតមកដល់ពេលនេះ អាជ្ញាធរពុំបានជួយអន្តរគមន៏ និងដោះស្រាយផ្តល់សំណងដល់ពួកខ្ញុំនោះទេ ។
៣-ឈ្មោះ សៀង នាវ ភេទប្រុស អាយុ៤៣ឆ្នាំ និងប្រពន្ធឈ្មោះ ឃុន ផល្លា ភេទស្រី អាយុ៣៩ឆ្នាំ មានទីលំនៅភូមិចម្លងគោ ឃុំថ្មស ស្រុកបទុមសាគរ ខេត្តកោះកុង បានរៀបរាប់ថា ដីរបស់គាត់នៅចំណុចវត្តចម្លងគោកន្លះហិចតា នៅភូមិអូរតាមុំ ក្នុងភូមិចម្លងគោចំនួន ៣ហិចតា និងនៅឃុំតានូនចំនួន ៣ហិចតា មានដំណាំហូបផ្លែគ្រប់មុខ ទើបនាងខ្ញុំមិនព្រមទទួលដីដោះដូរដែលមានដីស្រែ ២ហិចតា និង ដីលំនៅដ្ឋាន 0.៥ហិចតា ការដោះដូរ
របៀបនេះ វាមិនមានតុល្យភាពនិងគ្នាទេ ។
ប្រជាពលរដ្ឋដែលជាតំណាងទាំងអស់បានសម្តែងនូវការមិនពេញចិត្តចំពោះលោកអភិបាលស្រុកបទុមសាគរឡើយ ហើយពួកគេបាន អំពាវនាវអោយលោកស្រី ដែលជាប្រតិភូតំណាងជួយអន្តរាគមន៏ទៅអាជ្ញាធរខេត្ត អន្តរក្រសួង ជាពិសេសទៅរាជរដ្ឋាភិបាល មេត្តាពន្លឿនការដោះស្រាយជូនពួកគាត់អោយបានឆាប់រហ័ស និង សមរម្យ ពីព្រោះនៅឆ្នាំ២០១៤នេះ ពួកគាត់មានការខកខានមិនបានធ្វើស្រែ១ឆ្នាំពេញហើយ ។
ក្នុងថ្ងៃដដែរនេះដែរ លោកស្រី វ៉ាន់ ហ៊ីលី បានបន្តដំណើរជួបជាមួយភាគីក្រុមហ៊ុន (UnionDevelopment group Co.ltd) នៅក្នុងបរិវេនក្រុមហ៊ុនតែម្តង ដោយមានការចូលរួមពីអាជ្ញាធរថ្នាក់ជាតិ ដល់អាជ្ញាធរ មូលដ្ឋាន និងក្នុងនោះគេសង្កេតឃើញមានវត្តមានលោកអនុរដ្ឋលេខាធិការ ក្រសួងបរិស្ថាន លោក ស៊ុន តារា អភិបាលរងខេត្ត និង លោក អ៊ុច ទូច នាយករដ្ឋបាលសាលាខេត្ត ។
ក្នុងកិច្ចជំនួបពិភាក្សានេះ បន្ទាប់ពីលោកស្រី វ៉ាន់ ហ៊ីលី លើកឡើងអំពីទុក្ខកង្វល់របស់ប្រជាពលរដ្ឋ គ្រប់ចំណុចរួចមក លោក LITAO តំណាងក្រុមហ៊ុន (Union Development group Co.ltd) ក៏បានបកស្រាយ និង ឆ្លើយបំភ្លឺក្នុងកិច្ចពិភាក្សានោះផងដែរថា ភាគីលោកគឺជាក្រុមហ៊ុនអចលទ្រព្យមួយដ៏ធំមកវិនិយោគនៅ ប្រទេសកម្ពុជា គឺមានការគាំទ្រពីអាជ្ញាធរខេត្ត និងរាជរដ្ឋាភិបាល ហើយក្រុមហ៊ុនមិនចង់មានបញ្ហាជាមួយប្រជាពលរដ្ឋទេ គឺក្រុមហ៊ុនតែងតែគោរព តាមកិច្ចសន្យា និងនីតិវិធីច្បាប់គ្រប់យ៉ាងតាមអន្តរក្រសួង និងរដ្ឋាភិបាល តំណាងក្រុមហ៊ុន (Union Development group Co.ltd) ក៏បានបន្តថា កន្លងមកដំណោះស្រាយជាមួយប្រជាពលរដ្ឋ ខាងក្រុមហ៊ុនមិនបានចុះផ្ទាល់ទេ គឺ ទុកភារកិច្ចអោយអន្តរក្រសួង និងអាជ្ញាធរជាអ្នកដោះស្រាយ ហើយធ្វើរបាយការណ៏ លោក LITAO បានលើកឡើងថាក្នុងការដោះដូរទីតាំងជូនពលរដ្ឋ គឺខាងក្រុមហ៊ុនអោយដីស្រែចំនួន២ហិចតា និងដីលំនៅដ្ឋាន ចំនួន កន្លះហិចតាជូនប្រជា
ពលរដ្ឋក្នុងគ្រួសារនិមួយៗ ដែលជាគោលការណ៏ដោះដូរ ភាគីក្រុមហ៊ុនក៏បានអះអាងបន្តថា ប្រជាពលរដ្ឋប្រមាណ៩០% រហូតដល់ពេលនេះបានយល់ព្រមទទួលការដោះដូរនេះរួចរាល់ហើយ នៅសល់ប្រមាណ ១០%តែប៉ុណ្ណោះ គឺក្រុមហ៊ុន គណះកម្មការអន្តរក្រសួង និង អាជ្ញាធរកំពុងតែបន្តដោះស្រាយ ដើម្បីបញ្ចប់ទំនាស់ ។
លោក ស៊ុន តារា អភិបាលរងខេត្តកោះកុង ដែលមានវត្តមាននៅក្នុងជំនួបពិភាក្សានេះផងដែរបានអោយដឹងថា ភាគីអាជ្ញាធរមកនេះ តាមសេចក្តីណែនាំរបស់ក្រសួងមហាផ្ទៃ មិនបានចូលរួមវេទិកាជួបជុំជាមួយប្រជាពលរដ្ឋទេ គឺគ្រាន់តែមកតាមការអញ្ជើញរបស់តំណាង UN និងដើម្បីការសន្តិសុខ តែប៉ុណ្ណោះ ។
លោក ស៊ុន តារា ក្នុងបទសំភាសន៏ជាមួយអ្នកការសែត មិនមានការអធិប្បាយអ្វីគួរអោយគាត់សំគាល់ឡើយ គ្រាន់តែមានប្រសាសន៏ថា អាជ្ញាធរ
និងក្រុមហ៊ុន នៅតែបន្តសហការ ព្យាយាម រកដំណោះស្រាយជូនប្រជាពលរដ្ឋ ប៉ុន្តែដោយកន្លងមកនេះ មានការផ្លាស់ប្តូរសមាសភាព នៅក្នុងជួរ គណះកម្មការអន្តរក្រសួង ទើបអូសបន្លាយនូវដំណោះស្រាយខាងលើនេះ លោកអភិបាលរងខេត្តរូបនេះបានបន្តយ៉ាងខ្លីថា អ្វីដែលពាក់ព័ន្ធនយោបាយ គឺលោកមិនបកស្រាយទេក្នុងនោះលោកអភិបាលរងខេត្ត បានស្នើរអោយសង្គមស៊ីវិលដែលបានតាមដានករណីទំនាស់ដីធ្លីនេះអោយជួយរកជនឆ្លៀតឱកាស
ខិលខូចដែលបង្កប់ក្នុងជួរប្រជាពលរដ្ឋ រាយការណ៏មកអាជ្ញាធរផង ។ អង្គការសង្គមស៊ីវិលចំនួន ២ ក្នុងនោះមានសមាគមន៏អាដហុក និងអង្គការ លីកាដូ ដែលបានតាមដានករណី ទំនាស់ដីធ្លីនេះ តាំងពីដើមរហូតដល់ពេលនេះ យល់ឃើញថា ÷
១-ភាគីក្រុមហ៊ុនមិនបានចុះដោះស្រាយសំណងដោយផ្ទាល់ជូនប្រជាពលរដ្ឋ គឺ ពឹងផ្អែកតែទៅលើអាជ្ញាធរ និងគណះកម្មការអន្តរក្រសួង ។
២-ប្រជាសហគមន៏ដែលនៅសេសសល់ប្រមាណ ១០% ដែលមិនព្រមទទួលយកដី និង មិនទាន់ទទួលបានដំណោះស្រាយសមរម្យនៅឡើយនោះ បើគណះកម្មការអន្តរក្រសួងមានចេតនាស្វែងរកដំណោះស្រាយ ជូនពួកគាត់ ដើម្បីបញ្ចប់បញ្ហាទំនាស់នេះ គឺជាការងាយស្រួលទេ ប៉ុន្តែកន្លងមកអាជ្ញាធរភូមិ ឃុំ ស្រុក មិនបានយកចិត្តទុកដាក់លើករណីនេះឡើយ ។
គួររលឹកផងដែរ កាលពីដើមឆ្នាំ២០១៤នេះ ក្រុមហ៊ុន (Union Development group Co.ltd) បានឈូសឆាយរុះរើ និងដុតបំផ្លាញផ្ទះប្រជាពលរដ្ឋប្រមាណជាង ៤០ខ្នង ហើយបានសន្យាថា និង សងថ្លៃការខូចខាត ប្រមាណជាង ២០លានរៀល ប៉ុន្តែរហូតមកដល់ពេលនេះគ្មានសំណងអ្វីបន្តិចសោះឡើយ ។
ដោយឡែក ប្រកាសរបស់ក្រសួងស្តីអំពីការពង្រឹង គ្រប់គ្រងដីសម្បទានសេដ្ឋកិច្ចលេខ១៧៧ ប្រក.កសក និងលេខ ២០១៦ ប្រក.បស្ថ របស់ក្រសួងកសិកម្មរុក្ខាប្រមាញ់ និងនេសាទ និងក្រសួងបិរស្ថានចុះថ្ងៃទី ០៩ ខែឧសភា ឆ្នាំ២០១៤ ត្រង់ចំណុច ប្រការ២: បាននិយាយថា ក្រុមហ៊ុនវិនិយោគអភិវឌ្ឍន៏ ដែលមាន ដីសម្បទានទាំងអស់ ត្រូវអនវុត្តន៏អោយបានត្រឹមត្រូវតាមគោការណ៏ណែនាំដូចខាងក្រោម ÷
-គម្រោងវិនិយោគអភិវឌ្ឍន៏របស់ក្រុមហ៊ុន ត្រូវអនុវត្តន៏តាមគោលនយោបាយរូបមន្តស្បែកខ្លា ដោយត្រូវធានាថា មិនធ្វើអោយប៉ះពាល់ដីធ្លីប្រើប្រាស់ អាស្រ័យផលរបស់ប្រជាជន ដីព្រៃសហគមន៏ និងដីអភិរក្សដែលត្រូវរក្សាទុក ។
------------
Source from: ve-news
Post a Comment