អ្នករាយការណ៍ពិសេសនៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស លោក សុរិយា ស៊ូប៊ែឌី (Surya Subedi) បានបញ្ចេញរបាយការណ៍ជាង ១០ទំព័រ បន្ទាប់ពីលោកបញ្ចប់បេសកកម្មរបស់លោកនៅកម្ពុជា។
លោក ស៊ូប៊ែឌី បានសង្កត់ធ្ងន់ថា កម្ពុជា ត្រូវធ្វើកំណែទម្រង់ជាច្រើនទៀត ក្រៅពីធ្វើកំណែទម្រង់ស្ថាប័នបោះឆ្នោតនោះ គឺត្រូវធ្វើកំណែទម្រង់សភា ក្រុមប្រឹក្សាធម្មនុញ្ញ។ លោកបញ្ជាក់ថា ការគោរពសិទ្ធិមនុស្សនាពេលបច្ចុប្បន្ននេះ ត្រូវបានរួមតូច និងរឹតត្បិត។
លោក សុរិយា ស៊ូប៊ែឌី អ្នករាយការណ៍ពិសេសអង្គការសហប្រជាជាតិ ស្ដីពីស្ថានភាពសិទ្ធិមនុស្សនៅកម្ពុជា ឲ្យដឹងថា ការជាប់គាំងនយោបាយអូសបន្លាយពេលជិត ១ឆ្នាំមកនេះ ជាឧបសគ្គយ៉ាងខ្លាំងក្នុងការគោរពសិទ្ធិមនុស្ស។
លោក សុរិយា ស៊ូប៊ែឌី ថ្លែងនៅក្នុងសន្និសីទសារព័ត៌មាននៅរសៀលថ្ងៃទី២៤ មិថុនា ថា លំហូរប្រជាធិបតេយ្យនៅប៉ុន្មានខែកន្លងមកនេះ បានរួមតូច។ លោកបញ្ជាក់ថា ការយកទីលានប្រជាធិបតេយ្យហ៊ុមព័ទ្ធដោយបន្លាលួស និងរថពាសដែក និងយកទីលានប្រជាធិបតេយ្យជាទីតាំងយោធា ពុំមានមូលហេតុផ្លូវច្បាប់ ដែលធ្វើឲ្យប៉ះពាល់ដល់សេរីភាពជាមូលដ្ឋានក្នុងការបញ្ចេញមតិ និងការជួបជុំរបស់ប្រជាពលរដ្ឋ។
ទន្ទឹមនឹងនេះ លោក សុរិយា ស៊ូប៊ែឌី អំពាវនាវរដ្ឋាភិបាលផ្សព្វផ្សាយលទ្ធផលស៊ើបអង្កេត លើករណីផ្ទុះអំពើហិង្សាបាញ់មនុស្សស្លាប់កន្លងមកនោះ។ លោកមានប្រសាសន៍តាមរយៈអ្នកបកប្រែដូច្នេះ៖ «ខ្ញុំសូមអំពាវនាវឲ្យរដ្ឋាភិបាលផ្សព្វផ្សាយពីលទ្ធផលនៃការស៊ើបអង្កេតលើព្រឹត្តិការណ៍ហិង្សា ដែលបានកើតឡើង កាលពីថ្ងៃទី១៥ កញ្ញា ថ្ងៃទី១២ វិច្ឆិកា ឆ្នាំ២០១៣ និងនៅថ្ងៃទី៣ មករា និងឆ្នាំ២០១៤ ធ្វើឲ្យមនុស្សស្លាប់ចំនួន ៧នាក់ របួសជាច្រើននាក់ និងបាត់ខ្លួនម្នាក់នោះ»។
ក្រៅពីនេះទៀត លោក សុរិយា ស៊ូប៊ែឌី ជំរុញឲ្យរដ្ឋាភិបាលធ្វើកំណែទម្រង់ស្ថាប័នមួយចំនួនទៀត ដូចជា ប្រព័ន្ធតុលាការ សភាបានអនុម័តច្បាប់៣ថ្មីៗនេះ ជាចំណុចស្នូលនៃអនុសាសន៍របស់លោកកន្លងមក តែលោកព្រួយបារម្ភថា ច្បាប់ទាំងបីនេះជាឧបសគ្គដល់ឯករាជ្យភាពរបស់តុលាការ និងគោលការណ៍បែងចែកអំណាច។ ការកំណែទម្រង់ការបោះឆ្នោត និងសភា ការកំណែទម្រង់ក្រុមប្រឹក្សាធម្មនុញ្ញ ដើម្បីឲ្យស្ថាប័ននេះឯករាជ្យពិតប្រាកដ និងមិនប្រកាន់គណបក្សនយោបាយ។
ក្រៅពីនេះទៀត លោកសង្កត់ធ្ងន់ថា ស្ថាប័នរដ្ឋមិនបានការពារនៃការគោរពសិទ្ធិមនុស្សឡើយ បញ្ហានេះហើយធ្វើឲ្យប្រជាពលរដ្ឋធ្វើបាតុកម្ម និងការដាក់ញត្តិមកលោកនោះ៖ «ខ្ញុំបានដឹងថា ការបរាជ័យរបស់ស្ថាប័នរដ្ឋក្នុងការគោរពសិទ្ធិរបស់ពលរដ្ឋ គឺជាមូលហេតុដែលប្រជាពលរដ្ឋសាមញ្ញមករកខ្ញុំ ដោយសារការអស់សង្ឃឹមក្នុងការបង្ហាញពីស្ថានភាពលំបាករបស់គេ និងបានដាក់ញត្តិឲ្យខ្ញុំជួយ»។
មន្ត្រីនាំពាក្យនៃទីស្ដីការនៃគណៈរដ្ឋមន្ត្រី លោក ផៃ ស៊ីផាន ឆ្លើយតបថា ការសំណូមពររបស់អ្នករាយការណ៍ពិសេសនៃអង្គការសហប្រជាជាតិ នេះ មិនមែនជាកាតព្វកិច្ចរបស់រដ្ឋាភិបាលក្នុងការឆ្លើយតបចំពោះសំណូមពររបស់លោកនេះទេ ហើយការសម្រេចរបស់រដ្ឋាភិបាលនោះ គឺឋិតនៅលើនីតិវិធី និងការទទួលខុសត្រូវរបស់តុលាការ៖ «ចំពោះការបរាជ័យរបស់សភា អានេះជាការប្រើភាសាមួយអាក្រក់ស្ដាប់ណាស់ ក៏ប៉ុន្តែចំពោះបញ្ហាហ្នឹងទៅលើគណបក្សសង្គ្រោះជាតិ ដែលគេបានចាប់ចំណាប់ខ្មាំងទៅលើការងារប្រជាធិបតេយ្យ ដែលគេមិនបានចូលសភា»។
បន្ថែមពីនេះទៀត លោក សុរិយា ស៊ូប៊ែឌី បានលើកពីលំហូរប្រជាធិបតេយ្យ សិទ្ធិការងារ សិទ្ធិដីធ្លី ដែលធ្វើឲ្យប្រជាពលរដ្ឋជាច្រើនកន្លែងរងគ្រោះ ដោយសារការផ្ដល់ដីសម្បទានសេដ្ឋកិច្ចរបស់រដ្ឋាភិបាល ការបញ្ជូនពលករខ្មែរពីប្រទេសថៃ បណ្ដាលឲ្យស្លាប់ ដែលជាការរំលោភសិទ្ធិមនុស្ស ស្ថាប័នសិទ្ធិមនុស្សជាតិជាស្ថាប័នឯករាជ្យ ជាដើម។
លោក សុរិយា ស៊ូប៊ែឌី សង្កត់ធ្ងន់ថា ប្រទេសកម្ពុជា ប្រសិនបើមិនមានការកែទម្រង់ឲ្យបានឆាប់ទេ ប្រទេសនឹងមានការប្រថុយប្រថាននៃការវិលត្រឡប់ទៅជាអំពើហិង្សា។ លោកអះអាងថា របាយការណ៍គ្រឹះសំខាន់ៗរបស់លោកចំនួន៤ ដែលបានដាក់ទៅអង្គការសហប្រជាជាតិ នោះ ជុំវិញនឹងការងាររបស់លោកបានបំពេញបេសកកម្មនៅកម្ពុជា ៥ឆ្នាំកន្លងមកនេះ លោកមានបំណងជួយដល់រដ្ឋាភិបាល គណបក្សប្រឆាំង ភាគីពាក់ព័ន្ធផ្សេងៗទៀតនៅកម្ពុជា ដើម្បីទទួលបានការផ្លាស់ប្ដូរ។ លោកបញ្ជាក់ទៀតថា ការសន្និដ្ឋាន និងអនុសាសន៍របស់លោកដែលមាននៅក្នុងរបាយការណ៍ចុងក្រោយនេះ លោកនឹងបង្ហាញជូនក្រុមប្រឹក្សាសិទ្ធិមនុស្សនៃអង្គការសហប្រជាជាតិ នៅខែកញ្ញា ឆ្នាំ២០១៤ ខាងមុខ៕
------------
Source from: rfa.org/khmer
Loading...
Post a Comment