World Cup 2014៖ ប្រេស៊ីលលេខ១ និង ម៉ិចស៊ិកលេខ២ ក្នុងពូលA ខណៈហូល្លង់ លេខ១ និងឈីលី លេខ២ ក្នុងពូលB
ដំណើរការរៀបចំការប្រកួតបាល់ទាត់ពានរង្វាន់ពិភពលោក(World Cup) លើកទី២០នៅប្រទេសប្រេស៊ីលឆ្នាំ២០១៤នេះ បានរកឃើញក្រុមធ្លាក់និងក្រុមឆ្លងផុត(ឈ្នះ) ការប្រកួតជម្រុះក្នុងពូលA (ប្រេស៊ីល,ម៉ិចស៊ិក,ក្រូអាស៊ី និង កាមេរូន ) និងពូលB ហើយ(ហូល្លង់,ឈីលី,អេស្ប៉ាញ និង អូស្ត្រាលី ) ដោយក្រុមជម្រើសជាតិក្រូអាស៊ី និង កាមេរូន ក្នុងពូលA ខណៈអេស្ប៉ាញ និងអូស្ត្រាលី ក្នុងពូលBជាក្រុមធ្លាក់ ត្រូវវិលត្រឡប់ទៅស្រុកវិញ ។ រីឯក្រុមជម្រើសជាតិប្រេស៊ីល(ម្ចាស់ផ្ទះ) និង ម៉ិចស៊ិក ក្នុងពូលA ព្រមទាំងហូល្លង់ និងឈីលី ក្នុងពូលB ជាក្រុមឈ្នះ បានឆ្លងផុតវគ្គជម្រុះក្នុងពូលឈានទៅប្រកួតនៅវគ្គ១៦ក្រុមចុងក្រោយ ។ ដោយឡែកក្រុមជម្រើសជាតិដែលទទួលបានលេខ១ និងលេខ២ ក្នុងពូលA ព្រមទាំងលេខ១ និងលេខ២ ក្នុងពូលB គឺ៖
ពូលA៖ បន្ទាប់ពីលេងឈ្នះក្រូអាស៊ី (៣-១) ស្មើម៉ិចស៊ិក (០-០) និងឈ្នះកាមេរូន (៤-១) ធ្វើឲ្យក្រុមជម្រើសជាតិប្រេស៊ីលជាម្ចាស់ផ្ទះ ទទួលបាន៧ពិន្ទុ (ស៊ុតចូលគេ៧បាល់ និងគេស៊ុតចូលវិញ ២បាល់ ) ។ ដោយឡែកក្រុមជម្រើសជាតិម៉ិចស៊ិក បន្ទាប់ពីលេងឈ្នះ កាមេរូន (១-០) ស្មើ ប្រេស៊ីល (០-០) និងឈ្នះក្រូអាស៊ី (៣-១) ទទួលបាន៧ពិន្ទុ (ស៊ុតចូលគេ៤បាល់ និងគេស៊ុតចូលវិញ ១បាល់ ) ។ ដូច្នេះ ក្រុមជម្រើសជាតិប្រេស៊ីល(Brazil) ទទួលបានលេខ១ ក្នុងពូល និង ម៉ិចស៊ិក (Mexico)ទទួលបានលេខ២ក្នុងពូល ។
ពូលB៖ បន្ទាប់ពីលេងឈ្នះ អេស្ប៉ាញ(៥-១)ឈ្នះអូស្ត្រាលី (៣-២) និងឈ្នះឈីលី (២-០) ធ្វើឲ្យក្រុមជម្រើសជាតិហូល្លង់ទទួលបាន៩ពិន្ទុ ។ ដោយឡែកក្រុមជម្រើសជាតិឈីលី បន្ទាប់ពីលេងឈ្នះ អូស្ត្រាលី (៣-១) ឈ្នះអេស្ប៉ាញ(២-០) និងចាញ់ហូល្លង់(០-២) ទទួលបាន៦ពិន្ទុ ។ ដូច្នេះ ក្រុមជម្រើសជាតិហូល្លង់(Netherlands) ទទួលបានលេខ១ក្នុងពូល និងឈីលី (Chile) ទទួលបានលេខ២ក្នុងពូល ។
សម្រាប់ការប្រកួតនៅវគ្គ១៦ក្រុមចុងក្រោយ គឺក្រុមជម្រើសជាតិ ប្រេស៊ីល (ម្ចាស់ផ្ទះ និងលេខ១ពូលA ) ត្រូវជួបប្រកួតជាមួយក្រុមជម្រើសជាតិឈីលី (លេខ២ពូលB) នៅថ្ងៃទី២៨ខែមិថុនា និងក្រុមជម្រើសជាតិហូល្លង់(លេខ១ពូលB)ត្រូវជួបប្រកួតជាមួយក្រុមជម្រើសជាតិម៉ិចស៊ិក (លេខ២ពូលA) នៅថ្ងៃទី២៩ ខែមិថុនា ឆ្នាំ២០១៤ ខាងមុខបន្តទៀត ។
សូមបញ្ជាក់ជូនថា ក្រុមជម្រើសជាតិក្រូអាស៊ី,កាមេរូន,អេស្ប៉ាញ និងអូស្ត្រាលី ដែលជាក្រុមធ្លាក់ក្នុងការប្រកួតជម្រុះក្នុងពូលA និងពូល B នោះ នឹងទទួួលបានទឹកប្រាក់ចំនួន៨លានដុល្លារអាមេរិក សម្រាប់ក្រុមនីមួយៗ ពីសហព័ន្ធសមាគមកីឡាបាល់ទាត់អន្តរជាតិ (FIFA) ខណៈក្រុមជម្រើសជាតិប្រេស៊ីល(ម្ចាស់ផ្ទះ) ម៉ិចស៊ិក,ហូល្លង់ និងឈីលី ជាក្រុមឈ្នះ ឆ្លងផុតវគ្គជម្រុះ ក្នុងពូលA និងពូលB នឹងទទួលបានទឹកប្រាក់ចំនួន៩លានដុល្លារអាមេរិកសម្រាប់ក្រុមនីមួយៗ៕
Source from: www.dtn7.com
Loading...
Post a Comment