មេដឹកនាំ​​កូរ៉េខាងត្បូង​​ថា ការបើក​​ឧស្សាហ៏​កម្ម​រួម​ជា​ការ​ផ្តើម​​កំណែរ​​ទំរង់​របស់​​ព្យុងយ៉ាង​

ថ្លែងនៅក្នុងកិច្ចប្រជុំគណៈរដ្ឋមន្ត្រីនៃប្រទេសកូរ៉េខាងត្បូង លោកស្រី Park Geun-hye ប្រធានាធិបតីបានបញ្ជាក់ថា តំបន់ឧស្សាហ៏កម្មរួមKaesong គួរតែត្រូវបានបើកដំណើរការដោយផ្អែកទៅលើហេតុផលជារូម និង ផ្នែកទៅលើបទដ្ឋានរបស់អន្តរជាតិ ដើម្បីអភិវឌ្ឍន៏តំបន់នេះឲ្យកាន់តែរីកចំរើន ពោលគឺអាចឆ្លើយតបទៅនឹងការប្រកួតប្រជែងជាសកល។

ក្នុងនោះលោកស្រី Park Geun- hye ក៏បានបង្ហាញ់ពីគំនូរកំណែរទំរង់ដ៏ជោគជ័យរបស់ប្រទេសវៀតណាម សម្រាប់កូរ៉េខាងជើងគិតពិចារណាក្នុងការផ្លាស់ប្តូរ និងកែរទំរងនយោបាយផងដែរ។

ការលើកឡើងពីសំណាក់ប្រធានាធិបតីរបស់កូរ៉េខាងត្បូងនេះ គឺធ្វើឡើងក្រោយពីតំបន់ Kaesong ត្រូវបានបើកដំណើរការឡើងវិញហើយ កាលពីថ្ងៃចន្ទកន្លងទៅដោយក្នុងនោះក្រុមអ្នកគ្រប់គ្រង និង បុគ្គលិករបស់កូរ៉េខាងត្បូងជាច្រើនបានឆ្លងព្រំដែនចូលទៅកាន់រោងចក្ររបស់ខ្លួនផងដែរ ដោយក្រុមហ៊ុនចំនួន៩០ ក្នុងចំណោមក្រុមហ៊ុនសរុបប្រមាណ១២៣ ត្រូវបានបើកឲ្យដំណើរការឡើងវិញ។

ចំណែកឯកម្មកររបស់កូរ៉េខាងជើងប្រមាណ៣ម៉ឺន ២ពាន់នាក់ ក្នុងចំណោមកម្មករសរុបប្រមាណ ៥ម៉ឺន ៣ពាន់នាក់បានចូលបំរើការងារធម្មតាវិញ។

ជាការបើកឲ្យដំណើរការឡើងវិញបន្ទាប់ពីប្រទេសកូរ៉េខាងត្បូង និងខាងជើងបានបញ្ជូនមន្ត្រីរបស់ខ្លួនបើកកិច្ចចរចាជាច្រើនលើកច្រើនសារ។

រយៈពេល៥ខែ ដែលតំបន់ឧស្សាហ៏កម្មរួមដ៏សំខាន់នេះ ត្រូវបានផ្អាកដំណើរការដោយសារតែភាពតានតឹងរវាងកូរ៉េទាំងពី។(ដោយៈអ៊ុន រស្មី)

Source from: Vayofm