កិច្ចជំនួប ដែលធ្វើឡើងដោយបិទទ្វាររយៈពេលជិត៥ម៉ោង នៅឯមន្ទីររដ្ឋសភាជាតិ រវាងមេដឹកនាំជាន់ខ្ពស់ គណបក្សប្រជាជនកម្ពុជា ដឹកនាំដោយ សម្ដេច ហ៊ុន សែន និងមេដឹកនាំជាន់ខ្ពស់គណបក្សសង្គ្រោះជាតិ ដឹកនាំដោយ លោក សម រង្ស៊ី បានឯកភាពគ្នាចំនួន៣ចំណុច ដែលរួមមាន៖ ទី១-ឯកភាពគ្នា ដោយគោរព និងអនុវត្តយ៉ាងម៉ឹងម៉ាត់ ចំពោះព្រះរាជសាររបស់ព្រះមហាក្សត្រ នៅថ្ងៃទី១៦ ខែកញ្ញា ឆ្នាំ២០១៣ ដែលអំពាវនាវឲ្យ ក្រុមបាតុករ និងសមត្ថកិច្ចបញ្ឈប់ការប្រើអំហិង្សា តាមគ្រប់រូបភាព។ ទី២-ភាគីទាំងពីរព្រម ព្រៀងគ្នា ថា នឹងបង្កើតយន្ដការមួយ ដើម្បីកែទម្រង់ការបោះឆ្នោត នាពេលខាងមុខ។ និងទី៣-ភាគីទាំងពីរ បានសម្រេច ថា នឹងបន្ដជួបចរចាទៅទៀត តាមគ្រប់កំរិត ដើម្បីដោះស្រាយបញ្ហាប្រទេសជាតិ។ នេះបើតាមលោក ប្រាក់ សុខុន មន្ដ្រីជាន់ខ្ពស់គណបក្សប្រជាជនកម្ពុជា បានថ្លែងនៅក្រោយកិច្ចជំនួបនោះ។
សំលេងៈ
ដោយឡែកលោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានឲ្យដឹង ថា គណបក្សទាំងពីរ នៅមិនទាន់ស្រុះស្រួលគ្នានៅឡើយទេ អំពីការបង្កើតគណៈកម្មការឯករាជ្យដោះស្រាយបញ្ហាបោះឆ្នោត ដោយគណបក្សសង្គ្រោះជាតិ នៅតែចង់បង្កើតគណៈកម្មការនេះ តែគណបក្សប្រជាជនកម្ពុជា មិនឯកភាពឡើយ។
សំលេងៈ
លោក ប្រាក់ សុខុន មន្ដ្រីជាន់ខ្ពស់គណបក្សប្រជាជនកម្ពុជា បានគូសបញ្ជាក់ ថា កិច្ចប្រជុំសភាលើកដំបូង ដែលគ្រោងបើធ្វើនៅថ្ងៃទី២៣ ខែកញ្ញាខាងមុខនេះ នៅតែប្រព្រឹតិ្ដធ្វើដដែល បើទោះបីជាគ្មាន ការចូលរួមពីក្រុមតំណាងរាស្ដ្រគណបក្សសង្គ្រោះជាតិ ក៏ដោយ។ សម្រាប់គណបក្សសង្គ្រោះជាតិវិញ លោក យឹម សុវណ្ណ នៅមិនទាន់សម្រេចយ៉ាងណាទេ ប៉ុន្ដែគណបក្សសង្គ្រោះជាតិ នឹងខិតខំស្វែងវិធីផ្សេងទៀត ដើម្បីជួបចរចាជាមួយគណបក្សប្រជាជនកម្ពុជាដោះស្រាយបញ្ហា មុនពេលប្រជុំសភាលើកដំបូងនេះ មកដល់។
គួរបញ្ជាក់ថា សមាសភាពចូលរួមប្រជុំដោះស្រាយបញ្ហា នៅព្រឹកមិញនេះ គណបក្សប្រជាជនកម្ពុជា ដឹកនាំដោយសម្ដេច ហ៊ុន សែន និងមន្ដ្រីជាន់ខ្ពស់មួយចំនួនទៀត ដូចជាលោក ស ខេងសក់ សេដ្ឋា លោក សាយ ឈុំ និង លោក សោម សឿន លោក ឈាង វុន។ រីឯសមាសភាព គណបក្សសង្គ្រោះជាតិ គឺដឹកនាំដោយលោកសម រង្ស៊ី លោក កឹម សុខា លោក ប៉ុល ហំម លោកយឹម សុវណ្ណ លោក អេង ឆៃអ៊ាង លោក គួយ ប៊ុនរឿន លោក ស៊ុន ឆៃ៕(ដោយៈឃួន សុភ័ក្រ)
Source from: Vayofm
Loading...
Post a Comment