បាតុកម្មដែលបានចាប់ផ្តើម តាំងពីព្រឹកព្រលឹម រហូតដល់វេលាម៉ោង៦ល្ងាច ទើបបញ្ចប់របស់គណបក្សសង្គ្រោះជាតិ ដែលមានពលរដ្ឋចូលរួមរាប់ម៉ឺននាក់ចូលរួម ត្រូវបានលោក សម រង្ស៊ី ប្រកាសថា ប្រកបដោយភាពជោគជ័យ។លោក សម រង្ស៊ី បានអំពាវនាវឲ្យប្រជាពលរដ្ឋ ចូលរួមបាតុកម្មជាមួយគណបក្សសង្គ្រោះជាតិ នៅថ្ងៃស្អែក និងថ្ងៃខានស្អែកបន្ដទៀត។
យ៉ាងណាក៏ដោយ បាតុកម្មថ្ងៃទី១ របស់គណបក្សសង្គ្រោះជាតិ ក៏កើតមាននូវអំពើហិង្សាខ្លះៗដែរ ដោយលើកទី១ បានកើតឡើង រវាងក្រុម បាតុករមួយក្រុម និងកម្លាំងសមត្ថកិច្ច នៅមុខវត្តឧណ្ណាឡោម ខណ្ឌដូនពេញ។
រហូតដល់ម៉ោងជិត៧យប់ លោក សម រង្ស៊ី ប្រកាសឲ្យក្រុមបាតុករសម្រាករង់ចាំបន្តធ្វើបាតុកម្មនៅថ្ងៃស្អែក។ ប៉ុន្តែនៅម៉ោង ជាង៧យប់ បាតុករមួយក្រុមទៀត បាននាំគ្នាប្រមូលផ្តុំ នៅចំណុច រោងកុនលុច្ស និង បន្តដើរទៅកាន់ ស្ពានអាកាសក្បាលថ្នល់ ទើបបានបង្កអោយមានការប៉ះទង្គិចម្តងទៀតរហូតសមត្ថកិច្ចបង្ខំចិត្តបាញ់ គ្រាប់បែកផ្សែងបំបែកក្រុមបាតុករ។
នៅថ្ងៃម្សិលមិញ ចាប់ពីម៉ោង ៩ព្រឹក រហូតដល់ម៉ោង ១១ថ្ងៃជិតថ្ងៃត្រង់ មានមនុស្ស២០នាក់បានដួលសន្លប់ ខ្លះខ្យល់គរ ។ ក្រុមនិស្សិតស្ម័គ្រចិត្តប្រមាណ ២០០នាក់ បានជួយសង្គ្រោះបឋម ដោយបានដើរចែកសំឡីមានដាក់ថ្នាំសម្រួលដង្ហើម និងចែកប្រេងខ្យល់។
ដោយឡែក បើយើងទៅមើលផ្លូវសំខាន់ៗមួយចំនួនទៀត នៅរាជធានីភ្នំពេញ វិញត្រូវបានបិទដោយរបងបន្លាលួស និង មិនអនុញ្ញាតិអោយធ្វើចរាចរណ៍ដែរ។ ការបិទផ្លូវនេះ បានបង្កការកកស្ទះ នៅបណ្តាផ្លូវមួយចំនួន ដែលធ្វើអោយប្រជាពលរដ្ឋ មានការធុញទ្រាន់ ។
Source from: Vayofm
Loading...
Post a Comment