ភ្លៀង​ធ្លាក់​ខ្លាំង​នៅ​តំបន់ភ្នំ​ដងរែក ហូរ​ផ្តាច់​ផ្លូវ​កៅស៊ូ ជាច្រើន​​គីឡូ​ម៉ែត្រ​​នៅឧ​ត្ត​រ​មានជ័យ​

9/21/2013 01:05:00 AM

ខេត្តឧត្តរមានជ័យ៖ខណៈដែលមានភ្លៀងធ្លាក់ខ្លាំង៣ថ្ងៃជាប់ៗគ្នាចាប់ពីថ្ងៃទី១៨រហូតដល់ថ្ងៃទី២០ខែកញ្ញានេះ

ខេត្តឧត្តរមានជ័យ ៖ ខណៈដែលមានភ្លៀងធ្លាក់ខ្លាំង ៣ ថ្ងៃជាប់ៗគ្នា ចាប់ពីថ្ងៃទី១៨ រហូតដល់ថ្ងៃទី២០ ខែកញ្ញានេះ បានធ្វើឲ្យកំណាត់ផ្លូវ កៅស៊ូមួយខ្សែ ប្រវែងជាង ៨០ គីឡូម៉ែត្រ ពីក្រុងសំរោង ឆ្ពោះទៅស្រុកអន្លង់វែង ក្នុងខេត្តឧត្តរមានជ័យ ត្រូវទឹកជំនន់បុកផ្ដាច់ខូចខាត ជាបន្តបន្ទាប់ ហើយមកដល់ព្រឹកថ្ងៃទី២០ ខែកញ្ញា នេះ មិនអាចធ្វើចរាចរណ៍បានទេ។

ការខូចខាតកំណាត់ផ្លូវរវាង ស្រុកទាំងពីរខាងលើនេះ ដោយសារមានភ្លៀងខ្លាំង ពីតំបន់ភ្នំដងរែក ហូរបុកផ្ដាច់របើកកៅស៊ូជាច្រើនកន្លែង។ ដូចជានៅចំណុចភូមិបោស ភូមិឈូកមាស និងភូមិគីរីវន្ន័ សង្កាត់កូនក្រៀល ក្រុងសំរោង និងចំណុច ភូមិអូរអំបិល ក្នុងឃុំត្រពាំងប្រិយ ស្រុកអន្លង់វែង និងចំណុចជាច្រើនទៀត នៅលើផ្លូវក្រាលកៅស៊ូនេះ និងនៅមានបន្តខូច និងដាច់ផ្លូវដែរ។

ក្រុមមន្ត្រីបានបញ្ជាក់ថា ទឹកភ្លៀងបានបន្តធ្លាក់យ៉ាងខ្លាំង តាមបណ្ដោយតំបន់ព្រំដែន រហូតដល់រសៀលថ្ងៃទី២០ ខែកញ្ញានេះ។ ផ្លូវដែលទឹកជំនន់ហូរដាច់ខាងលើនេះដែរ គឺធ្វើឱ្យប្រជាពលរដ្ឋពិបាក ក្នុងការធ្វើដំណើរ ហើយផ្នែកពាក់ព័ន្ធ ក៏មិនអាចធ្វើការជួសជុល ឲ្យបានភ្លាមៗនោះដែរ៕