មនុស្ស៣នាក់បានរងរបួស ក្នុងនោះមានម្នាក់ ជាប៉ូលិសដោយសារការប៉ះទង្គិចរវាងក្រុមបាតុករមួយក្រុម និង កម្លាំងសមត្ថកិច្ច នៅមុខវត្តឧណ្ណាឡោម ខណ្ឌដូនពេញ។ ក្រុមបាតុករបានប្រើដុំថ្មគប់ ទៅលើសមត្ថកិច្ច និង ទម្លុះរណាំងបន្លាលួសរបស់សមត្ថកិច្ចដែលដាក់រារាំង។
ក្រុមបាតុករនេះ ត្រូវបានគេអះអាងថា ជាប្រជាពលរដ្ឋ ដែលរស់នៅជិតទីនោះ និង មានខ្លះជាអ្នកភូមិបឹងកក់ និង អ្នកភូមិបុរីកីឡា ដែលបានរើបារ៉ាស់ របស់សមត្ថកិច្ចចេញ ទើបបង្កជាការប៉ះទង្គិច។សមត្ថកិច្ចបានបង្កើនកំលាំងការពារ នៅកន្លែងកើតហេតុ ជាបន្តបន្ទាប់ និង បានប្រើរថយន្ត ពន្លត់អគ្គិភ័យ រថយន្តបាញ់ទឹក និង បាញ់គ្រាប់បែកផ្សែង ប្រមាណ២០គ្រាប់បំបែកក្រុមបាតុករផងដែរ។
ជាការកត់សម្គាល់ ថ្នាក់ដឹកនាំគណបក្សសង្រ្គោះជាតិ គឺលោក ស្រី មូរ សុខហួរ បានប្រកាសមិនអោយ បាតុករដែលជួបជុំនៅទីលានប្រជាធិបតេយ្យ ទៅកន្លែងប៉ះទង្គិច ដោយគំរាមថា បាតុករត្រូវទទួលខុសត្រូវខ្លួនឯង បើមានគ្រោះថ្នាក់អ្វីកើតឡើង។
រហូតដល់ម៉ោង៥ល្ងាច ទើបស្ថានការណ៍មានភាពធូរស្រាល ក្រោយពីលោកសមរង្ស៊ី គណបក្ស សង្រ្គោះជាតិ ចុះអន្តរាគមន៍ និង ដឹកនាំបាតុករមកទីលានប្រជាធិបតេយ្យវិញ ។ លោកសមរង្ស៊ី ក៏បានអោយអាជ្ញាធរចាត់វិការតាមផ្លូវច្បាប់ផងដែរ ចំពោះបាតុករ ដែលមិនព្រមបញ្ឈប់ សកម្មភាពតតាំងជាមួយសមត្ថកិច្ច។
Source from: Vayofm
Loading...
Post a Comment