Venezuela​ចោទ​​អាមេរិក​​ថា ​មិន​ឲ្យ​​យន្តហោះ​​មេដឹក​នាំ​ខ្លួន​ហោះ​កាត់​​ដែនអាកាស​​អាមេរិក​

ថ្លែងទាំងកំហឹងនៅក្នុងទីក្រុង Caracas លោក Nicolas Maduro ប្រធានាធិបតីរបស់ប្រទេស Venezuela ឲ្យដឹងថា សហរដ្ឋអាមេរិកបានធ្វើការបដិសេធទៅនឹងសំណើរសុំសិទ្ធហោះហើរឆ្លងកាត់ដែនអាកាសអាមេរិក ហើយថានេះ គឺជាការបំពានដ៏ធ្ងន់ធ្ងរមកលើប្រទេស Venezuela ទាំងមូល។

នៅពេលខាងមុខនេះ លោក Nicolas Maduro មានគម្រោងទៅបំពេញទស្សនកិច្ចទៅកាន់ប្រទេសចិន ហើយផ្លូវដែលអាចហោះហើរទៅកាន់ប្រទេសចិនបាន គឺចាំបាច់ត្រូវឆ្លងកាត់ដែនអាកាសរបស់អាមេរិក។

បើតាមការបញ្ជាក់របស់ប្រធានាធិបតីរូបនោះដដែល បន្ថែមថា លោកនឹងមិនលុបចោលនូវដំណើរទស្សនកិច្ចទៅកាន់ប្រទេសចិនជាដាច់ខាត បើទោះបីជា មានការរំខានពីសហរដ្ឋអាមេរិកក្តី ហើយក៏ទាមទាឲ្យអាមេរិកបកស្រាយអំពីមូលហេតុទាំងទងនឹងការមិនផ្តល់សិទ្ធហោះហើរនេះផងដែរ។

ក្រៅតែពីបញ្ហាមិនអាចហោះហើរឆ្លងកាត់ដែនអាកាសរបស់អាមេរិកនេះ លោក Nicolas Maduro ក៏បានចោទប្រកាន់អាមេរិកផងដែរថា មិនបានផ្តល់ទិដ្ឋការសម្រាប់គណៈប្រត្តិភូររបស់ប្រទេសខ្លួនក្នុងការទៅចូលរួមមហាសន្និបាតរបស់អង្គការសហប្រជាជាតិនាទីក្រុងញូវយ៉កនោះទេ។

ទាក់ទងនឹងបញ្ហានេះដែរ ប្រធានាធិបតីរបស់ប្រទេស Bolivia គឺលោក Evo Morales ក៏បានអំពាវនាវឲ្យមេដឹកនាំក្នុងតំបន់អាមេរិកឡាទីនទាំងអស់បើកកិច្ចប្រជុំបន្ទាន់ ដោយស្នើរឲ្យដកអគ្គរដ្ឋទូតចេញពីប្រទេសអាមេរិក ដើម្បីជាការឆ្លើយតបទៅនឹងការបំពានរបស់អាមេរិកទៅលើប្រទេស Venezuela។

សូមបញ្ជាក់ថា លោក Evo Morales ប្រធានាធិបតីរបស់ប្រទេស Boliviaក៏ធ្លាប់រងការអាម៉ាសម្តងរួចទៅហើយ ដោយប្រទេសក្នុងតំបន់អ៊ឺរ៉ុបមួយចំនួនក្នុងនោះមានបារាំងជាដើមដែលសុទ្ធជាសម្ព័នមិត្តអាមេរិកបានឃាត់មិនឲ្យយន្តហោះ លោក Evo Morales ហោះហើរឆ្លងកាត់ឡើយ ដោយសង្ស័យថា Edward Snowdenជិះលើយន្តហោះនោះ។

សូមបញ្ជាក់ថា ទំនាក់ទំនងរបស់ប្រទេស Venezuela និង អាមេរិកតែងតែប្រឈមមុខដាក់គ្នាជានិច្ចតាំងពីជំនានអតីតប្រធានធិបតី លោក Hugo Chavezដែលទើបតែស្លាប់ដោយសារជម្ងឺមហារីកកន្លងទៅនោះម្លេះ។

ជាញយដងប្រទេសទាំងពី តែងតែចេញមុខរិះគន់ដាក់គ្នាទៅវិញទៅមក។ ក្រៅតែពីទំនាក់ទំនងដ៏ស្មុគស្មាញស្រាប់នោះ សូមរម្លឹកបន្តិចថា កាលពីអាមេរិកកំពុងប្រកាសតាមចាប់អតីតមន្ត្រីCIA គឺលោក Edward Snowden ប្រទេស Venezuelaក៏បានប្រកាសស្វាគមន៏ផ្តល់សិទ្ធជ្រកកោនផងដែរ។

មិនតែប៉ុណ្ណោះលោក Nicolas Maduro ក៏ធ្លាប់និយាយផ្ទាល់មាត់ដោយចាតទុក Edward Snowden ថា ជាបុក្គលដ៏អស្ចារ្យសម្រាប់ពិភពលោកតាមរយៈនិយាយប្រាប់ពីអំពើរអាក្រក់របស់អាមេរិក។ បញ្ហាទាំងនេះក៏បានធ្វើឲ្យអាមេរិកដែលមិនចូលចិត្តប្រទេសVenezuela ស្រាប់ផងកាន់តែខឹងថែមទៀត។(ដោយៈអ៊ុន រស្មី)

Source from: Vayofm