រាជធានីភ្នំពេញ ៖ ដោយសារតូចចិត្តរឿងប្រពន្ធ យកស្បែកជើងវាយក្បាល និងដៀលប្រមាថ មិនឈប់ឈរបុរសម្នាក់ បានដាច់ចិត្តជិះម៉ូតូមកលោតទឹក សម្លាប់ខ្លួន លើស្ពានព្រះមុនីវង្សថ្មី កាលពីវេលាម៉ោង ១និង០០ នាទីយប់រំលងអធ្រាត្រឈានចូលថ្ងៃទី២១ ខែតុលា ឆ្នាំ២០១៣ ស្ថិតក្នុងសង្កាត់ច្បារអំពៅទី១ ខណ្ឌមានជ័យ តែត្រូវសមត្ថកិច្ចជួយទាន់។
បុរសអភ័ព្វមានឈ្មោះ ភ័ក្រ អាយុ ២២ ឆ្នាំ ប្រកបរបរជាជាងសំណង់ និងជាអ្នករត់ម៉ូតូឌុប ស្នាក់នៅម្ដុំវត្តព្រែកប្រា សង្កាត់ព្រែកប្រា ខណ្ឌមានជ័យ បានធ្វើដំណើរ តាមបណ្ដោយផ្លូវព្រះមុនីវង្ស ក្នុងទិសដៅពីលិចទៅកើត លុះមកដល់លើស្ពានព្រះមុនីវង្សថ្មី បានចុះពីលើម៉ូតូ ហើយឡើងបង្កាន់ដៃស្ពាន បំណងលោតទឹកសម្លាប់ខ្លួន តែមិនបានសម្រេច ដោយសារសមត្ថកិច្ចជួយទាន់។
ឈ្មោះ ភ័ក្រ បានរៀបរាប់ថា គាត់មានប្រពន្ធម្នាក់ឈ្មោះ ភាព ដោយប្រពន្ធបានដៀលថាខ្លួនក្រ មិនចេះរកស៊ី ហើយប្រពន្ធបានយក ស្បែកជើងវាយក្បាល ទើបគាត់សម្រេចចិត្ដ ជិះម៉ូតូមកលោតទឹកស្ពានព្រះមុនីវង្សថ្មី តែម្ដងទៅ ។ បើស្តាប់តាមការរៀបរាប់ របស់ឈ្មោះ ភ័ក្រ គួរឲ្យកំសត់ខ្លាំងណាស់ ដោយសារគាត់ខំប្រឹងធ្វើការគ្រប់បែបយ៉ាង នៅតែត្រូវប្រពន្ធស្តីបន្ទោស និងយកស្បែកជើងវាយក្បាល៕
Source from: watphnom-news.com
Post a Comment