លោក អ៊ុំ ម៉ា​​រ៉ា ជា​​អ្នក​​បោះ​​មេ​​ក្នុង​​ការ​លក់​​ដី ទី​ស្នាក់​ការ​​គណ​បក្ស​​​ប្រ​ជា​ជន ​​ខេត្ត​​ព្រះ​វិ​ហារឲ្យ​​ក្រុម​ហ៊ុន​​ចិន ​​សល់​​លុយ​​សង់​​វីឡា​ជា​ច្រើន​​កន្លែង​

Daily News, In Khmer, International News

10/21/2013 11:30:00 AM

ខេត្តព្រះវិហារ៖មន្ត្រីរាជការនិងប្រជាពលរដ្ឋដែលធ្លាប់ស្គាល់ប្រវត្តិលោកអ៊ុំម៉ារ៉ាជាអភិបាលខេត្តព្រះវិហារបានសម្តែងការងឿងឆ្ងល់គ្រប់ៗគ្នា

ខេត្តព្រះវិហារ ៖ មន្ត្រីរាជការនិងប្រជាពលរដ្ឋ ដែលធ្លាប់ស្គាល់ប្រវត្តិលោក អ៊ុំ ម៉ារ៉ា ជាអភិបាលខេត្តព្រះវិហារ បានសម្តែងការងឿងឆ្ងល់គ្រប់ៗគ្នា អំពីការផ្លាស់ប្តូរជីវភាពថ្មី យ៉ាងឆាប់រហ័សរបស់លោក អ៊ុំ ម៉ារ៉ា ហើយគេចាំបានថា នៅពេលឡើងធ្វើជា អភិបាលខេត្តព្រះវិហារភ្លាមៗ លោក អ៊ុំ ម៉ារ៉ា បានខ្ចីឡានរបស់ឈ្មួញដ៏មានអំណាចម្នាក់ ជិះបណ្តោះអាសន្ន ព្រោះមិនទាន់មានលុយ ទិញឡានទំនើប ហើយប៉ុន្មានឆ្នាំក្រោយមក គេល្បីខ្ទ័រខ្ទារពេញខេត្តព្រះវិហារថា លោក អ៊ុំ ម៉ារ៉ា បានអភិវឌ្ឍន៍ជីវភាពគ្រួសារ យ៉ាងឆាប់រហ័ស រហូតមកដល់ពេលនេះ សល់លុយសង់វីឡា ជាច្រើនកន្លែងឯណោះ។

មុនពេលឡើងធ្វើជា អភិបាលខេត្តព្រះវិហារ លោក អ៊ុំ ម៉ារ៉ា បានធ្វើជាអភិបាលរងខេត្តសៀមរាប ហើយក្រោយពេលលោក ព្រាប តាន់ បានទទួលមរណភាពដោយជំងឺ គេសង្កេតឃើញលោក អ៊ុំ ម៉ារ៉ា រត់រកខ្សែទុយោ ជ្រែយកតំណែងជា អភិបាលខេត្តព្រះវិហារ ដោយចំណាយប្រាក់ អស់ច្រើនសន្ធឹកសន្ធាប់ ពោលគឺមុនពេលចេញដំណើរ ទៅទទួលតំណែងជា អភិបាលខេត្តព្រះវិហារ លោក អ៊ុំ ម៉ារ៉ា គ្មានរថយន្តទំនើបជិះទេ បានទៅទាក់ទងឧត្តមសេនីយ៍ម្នាក់ ឲ្យជួយធានាក្នុងការខ្ចីរថយន្ត ពីឈ្មួញម្នាក់មកប្រើប្រាស់ ទើបបង់លុយរំលស់តាមក្រោយ។

លោក អ៊ុំ ម៉ារ៉ា បានចូលកាន់តំណែងជា អភិបាលខេត្តព្រះវិហារ ក៏បង្កើតឲ្យមានភាពមិនប្រក្រតី ជាច្រើន ដូចជាការលក់ទ្រព្យសម្បត្តិរដ្ឋ និងការឃុបឃិត ជាមួយក្រុមហ៊ុនមួយចំនួន ដែលដេកម៉ៅការចងមុង ជាមួយសាលាខេត្ត រហូតដល់បែកគំនិតឃុបឃិតគ្នា លក់ដីទីស្នាក់ការគណបក្សប្រជាជន ទំហំ ៥៥ម៉ែត្រ គុណនឹង៧៥ ម៉ែត្រ នៅទល់មុខមន្ទីរប្រៃសណីយ៍ខេត្ត ក្នុងភូមិសំរោង សង្កាត់កំពង់ប្រណាក ក្រុងព្រះវិហារ ខេត្តព្រះវិហារផងដែរ ហើយបើនិយាយពី ជំនួញឈើខុសច្បាប់ របស់ក្រុមឈ្មួញធំៗវិញ ក៏ដូចជាបញ្ហាដីធ្លីក៏លោក អ៊ុំ ម៉ារ៉ា អាចប្រមូលបានផលប្រយោជន៍ ច្រកហោប៉ៅធ្វើមានធ្វើបានផ្ទាល់ខ្លួន យ៉ាងរលូនល្អ។

មន្ត្រីរាជការនៅក្នុងខេត្តព្រះវិហារ បានលើកឡើងថា លោក អ៊ុំ ម៉ារ៉ា ជាអភិបាលខេត្តបានឃុបឃិតជាមួយលោក ឡុង សុវណ្ណ ជាប្រធានក្រុមប្រឹក្សាខេត្ត លោក ណែម រ៉ា ជាអនុប្រធានគណបក្សប្រជាជនប្រចាំខេត្ត និងលោក ខូយ ឃុនហ៊ ជាប្រធានរដ្ឋបាលគណបក្សខេត្តព្រះវិហារ លួចលក់ដីទីស្នាក់ការគណបក្ស ទៅឲ្យក្រុមហ៊ុនចិនមួយឈ្មោះ តុង គ័រ ក្នុងគម្រោងសាងសង់ សណ្ឋាគារប្រណីតមួយមានកម្ពស់ ១៥ ជាន់ ហើយតម្លៃនៃការលក់ដី ទីស្នាក់ការគណបក្សប្រជាជននោះ មិនតិចជាង ៣០ ម៉ឺនដុល្លារអាមេរិកនោះទេ។ ទីស្នាក់ការគណបក្សប្រជាជន ខេត្តព្រះវិហារ ដែលមានទំហំ ៥៥ ម៉ែត្រគុណនឹង ៧៥ ម៉ែត្រនេះ ធ្លាប់ត្រូវបានឈ្មួញកណ្តាលមកតថ្លៃ រហូតដល់ទៅជាង ៣០ ម៉ឺនដុល្លារឯណោះ ។

កាលណោះមិនទាន់មានការត្រូវរ៉ូវគ្នា បានផ្អាកទៅវិញ ប៉ុន្តែនៅមុនយុទ្ធនាការឃោសនា បោះឆ្នោតជាតិអាណត្តិទី៥ ប៉ុន្មានថ្ងៃប៉ុណ្ណោះ គេសង្កេតឃើញលោក អ៊ុំ ម៉ារ៉ា និងមន្ត្រីសំខាន់ៗក្នុងខេត្ត បានឃុបឃិតគ្នាលក់ដីទីស្នាក់ការ គណបក្សប្រជាជនទៅឲ្យក្រុមហ៊ុនចិន តុងគ័រ ហើយគេមិនច្បាស់ថា តើប្រាក់ដែលបានមកពីការលក់ ទីស្នាក់ការគណបក្សនេះ បានបង់ចូលថវិការបស់ គណបក្សប៉ុន្មាននោះទេ ប៉ុន្តែគេជឿថា មានការកិបកេងថវិកា មួយចំនួនយកទៅចែកគ្នា ធ្វើមានធ្វើបាន។ ការទិញលក់ដីទីស្នាក់ការគណបក្សប្រជាជនកម្ពុជា នៅកណ្តាលក្រុងព្រះវិហារនេះគេដឹងថា មានលោកឧកញ៉ា ទ្រី ភាព ជាអ្នកជួយសម្របសម្រួលផងដែរ ទើបមន្ត្រីក្នុងសាលាខេត្ត ហ៊ានអារកាត់ក្នុងរឿងនេះ។

ប្រជាពលរដ្ឋនិងមន្ត្រីរាជការ នៅក្នុងខេត្តព្រះវិហារ បានធ្លោយឲ្យដឹងថា លោក អ៊ុំ ម៉ារ៉ា បានឡើងមកកាន់តំណែងជា អភិបាលខេត្តព្រះវិហារ ក៏មានការផ្លាស់ប្តូរជីវភាព យ៉ាងឆាប់រហ័ស ហើយហ៊ានឃុបឃិតគ្នាលក់ដី ទីស្នាក់ការគណបក្ស យកទៅចែកគ្នាធ្វើមានធ្វើបាន យ៉ាងក្រអឺតក្រទមបំផុត លើសនេះទៅទៀតគេសង្កេតឃើញលោក អ៊ុំ ម៉ារ៉ា មានលុយសង់វីឡាដល់ទៅ ពីរបីកន្លែងក្នុងឆ្នាំតែ១ មិនគិតគូរពីការអភិវឌ្ឍ ក្នុងខេត្តសោះឡើយ។ ដោយឡែក លោក អ៊ុំ ម៉ារ៉ា ក៏មានពាក់ព័ន្ធជាមួយ ការឃុបឃិតឲ្យក្រុមឈ្មួញទុច្ចរិតជាច្រើន កាប់បំផ្លាញព្រៃឈើ និងធ្វើអាជីវកម្មរ៉ែមាស និងត្បូងថ្ម មានតម្លៃយ៉ាងគគ្រឹកគគ្រេងបំផុត គ្មានក្រែងញញើតអ្វីឡើយ៕