ព្រះតម្រិះ​របស់​សម្តេចឪ សម្តេច​តា សម្តេច​តា​ទួត កាល​ទ្រង់​នៅមាន​ព្រះជន្ម​ទាក់ទង​នឹង​ដំណើរការ​ស្ថាប័ន​តុលាការ​

10/18/2013 11:56:00 AM

ថ្ងៃទី១៥ខែតុលាឆ្នាំ២០១៣នេះគឺគម្រប់ខួប១ឆ្នាំនៃការយាងចូលទិវង្គតរបស់ព្រះករុណាព្រះបាទសម្តេចព្រះនរោត្តមសីហនុព្រះមហាវីរក្សត្រ

ថ្ងៃទី១៥ ខែតុលា ឆ្នាំ២០១៣នេះ គឺគម្រប់ខួប១ឆ្នាំនៃការយាងចូលទិវង្គតរបស់ព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពេទឹកដី និងឯកភាពជាតិខ្មែរ និងជាអតីតព្រះមហាក្សត្រនៃព្រះរាជាណាចក្រកម្ពុជា ។

កាលព្រះអង្គនៅមានព្រះជន្មជាម្លប់របស់កូនចៅ ចៅទួតព្រះអង្គ គឺទ្រង់បានបន្សល់ទុកនូវស្នាព្រះហស្តនិងព្រះតម្រិះ ព្រមទាំងអនុស្សាវរីយ៍ជាច្រើនដែលមិនអាចកាត់ថ្លៃបានចំពោះជាតិ មាតុភូមិកម្ពុជា ដែលពេលនេះគេហទំព័រសារព័ត៌មានដើមត្នោតសូមលើកយកព្រះតម្រិះរបស់អង្គសម្តេចឪ សម្តេចតា សម្តេចតាទួត ទាក់ទងនឹងដំណើរការនៃស្ថាប័នតុលាការកម្ពុជា ដូចខាងក្រោម ៖

១-ទាក់ទងនឹងស្ថាប័នឧត្តមក្រុមប្រឹក្សានៃអង្គចៅក្រម
អនុលោមតាមមាត្រា១៣២ថ្មី(មាត្រា១១៣ចាស់) និងមាត្រា១៣៤ថ្មី (មាត្រា១១៥ចាស់) នៃរដ្ឋធម្មនុញ្ញ នៃព្រះរាជាណាចក្រកម្ពុជា ត្រូវបានបង្កើតឲ្យមានឧត្តមក្រុមប្រឹក្សានៃអង្គចៅក្រម ដើម្បីជួយព្រះមហាក្សត្រក្នុងការធានាឯករាជ្យនៃអំណាចតុលាការ ធានាវិន័យរបស់ចៅក្រម និងធានាការប្រព្រឹត្តទៅនៃសាលាជម្រះក្តីនៃព្រះរាជាណាចក្រកម្ពុជាឲ្យដំណើរការបានល្អប្រសើរ ។

យោងតាមមាត្រា២នៃច្បាប់ស្តីពីការរៀបចំនិងការប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម ដែលប្រកាសឲ្យប្រើដោយព្រះរាជក្រមលេខ០៩/នស/៩៤ ចុះថ្ងៃទី២២ ខែធ្នូ ឆ្នាំ១៩៩៤ គឺព្រះមហាក្សត្រត្រូវបានតែងតាំងជាប្រធានឧត្តមក្រុមប្រឹក្សានៃអង្គចៅក្រម ។

ប៉ុន្តែ មាត្រា៧កថាខណ្ឌទី១នៃរដ្ឋធម្មនុញ្ញដដែលនេះ និងជាមាត្រាដែលមិនអាចកែប្រែបានជាដាច់ខាតនោះ (មាត្រា១៧នៃរដ្ឋធម្មនុញ្ញ) បានចែងថា «ព្រះមហាក្សត្រកម្ពុជា ទ្រង់គ្រងរាជសម្បត្តិ ប៉ុន្តែទ្រង់មិនកាន់អំណាចឡើយ។»។

ដោយយោងតាមមាត្រា៧កថាខណ្ឌទី១នៃរដ្ឋធម្មនុញ្ញចែងដូច្នេះ ទើបអង្គសម្តេចឪ សម្តេចតា សម្តេចតាទួត ធ្លាប់បានចេញព្រះរាជសារមួយចុះថ្ងៃទី១៦ ខែកក្កដា ឆ្នាំ២០១៣ ដែលទ្រង់បានមានព្រះតម្រិះថា «គឺនៅក្នុងន័យនេះហើយដែលខ្ញុំពុំអាចទទួលឋានៈជាប្រធានឧត្តមក្រុមប្រឹក្សានៃអង្គចៅក្រម និងទទួលខុសត្រូវពីជោគជ័យឬបរាជ័យ ចំណុចខ្សោយ ការខ្វះខាត ។លនិង ល។ នៃអំណាចតុលាការនៅកម្ពុជា។»។

ព្រះអង្គមានព្រះតម្រិះទៀតថា «ខ្ញុំស្នើសូមកែសម្រួលរដ្ឋធម្មនុញ្ញនៃយើងដែលចែងអំពីប្រធានឧត្តមក្រុមប្រឹក្សានៃអង្គចៅក្រម ។ ប្រធាននេះ គួរតែប្រគល់ជូនឥស្សរជនជាន់ខ្ពស់ខ្មែរម្នាក់ ដែលមិនមានភារកិច្ចនៅក្នុងព្រះបរមរាជវាំង។» ។

២-ទាក់ទងនឹងសំណុំរឿងឃាតកម្មលើលោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា
ក្នុងសំណុំរឿងឃាតកម្មលើលោក ជា វិជ្ជា ដែលត្រូវបានឃាតកចំនួន២នាក់បាញ់សម្លាប់កាលពីថ្ងៃទី២២ ខែមករា ឆ្នាំ២០០៤ នៅមុខតូបលក់កាសែតក្បែរវត្តលង្កានោះ សមត្ថកិច្ចនគរបាលធ្លាប់បានចាប់ខ្លួនបុរសពីរនាក់ គឺឈ្មោះ សុខ សំអឿន និង ឈ្មោះ ប៊ន សំណាង យកមកឲ្យតុលាការផ្តន្ទាទោសថា ជាឃាតកសម្លាប់លោក ជា វិជ្ជា ខណៈដែលមជ្ឈដ្ឋានអ្នកតាមដានសំណុំរឿងឃាតកម្មនេះអត់ជឿទាល់តែសោះថា បុរសពីរនាក់ ឈ្មោះ សុខ សំអឿន និង ឈ្មោះ ប៊ន សំណាង ជាឃាតកសម្លាប់លោក ជា វិជ្ជា ។

នៅថ្ងៃទី០២ ខែសីហា ឆ្នាំ២០០៥ សម្តេចឪ សម្តេតា សម្តេចតាទួត បានចេញព្រះរាជសារមួយជូនមាតាបិតា លោកសុខ សំអឿន និង លោក ប៊ន សំណាង ដោយទ្រង់មានព្រះតម្រិះថា «ខ្ញុំសូមលោក សុខ សំអឿន និងលោក ប៊ន សំណាង ព្រមទាំងមាតាបិតា នៃអ្នកទាំងពីរជ្រាបថា លោក សុខ សំអឿន និង លោក ប៊ន សំណាង មិនមែនជាឃាតកពិតប្រាកដដែលសម្លាប់លោក ជា វិជ្ជា នោះទេ តែខ្ញុំពុំមានសិទ្ធិអំណាចអ្វីដើម្បីធ្វើអន្តរាគមន៍ជួយអ្នកទាំងពីរ ។ ខ្ញុំសង្ឃឹមថា នៅថ្ងៃណាមួយ តុលាការនឹងទទួលស្គាល់ការប្រព្រឹត្តខុសរបស់ខ្លួន ហើយដោះលែងលោក សុខ សំអឿន និងលោក ប៊ន សំណាង ឲ្យមានសេរីភាពឡើងវិញ ។» ។

នៅទីបំផុតដូចព្រះតម្រិះរបស់ព្រះអង្គមែន កាលពីថ្ងៃទី២៥ ខែកញ្ញា ឆ្នាំ២០១៣ កន្លងទៅថ្មីៗនេះ តុលាការកំពូលបានបើកសវនាការជំនុំជម្រះលើបណ្តឹងសាទុក្ខលើកទី២ សម្រេចដោះលែងលោក សុខ សំអឿន និងលោក ប៊ន សំណាង ឲ្យមានសេរីភាពឡើងវិញជាសា្ថពរហើយ ។

កូនចៅ ទៅទួត ទាំងអស់សូមលំឱនកាយ ឧទ្ទិសបួងសួងព្រះវិញ្ញាណក្ខន្ធ ព្រះបរមរតនកោដ្ឋសម្តេចឪ សម្តេចតា សម្តេចតាទួត ព្រះអង្គយាងចាប់បដិសន្ធិក្នុងព្រះបរមសុគតិភពកុំបីឃ្លៀងឃ្លាតឡើយ ៕