ខេត្តស្ទឹងត្រែង៖ការដឹកជញ្ជូនឈើខុសច្បាប់នៅក្នុងខេត្តស្ទឹងត្រែងគឺមានតិចតួចណាស់ដែលលោកកុលសំអុលជាអភិបាលខេត្តខេត្តស្ទឹងត្រែង ៖ ការដឹកជញ្ជូនឈើខុសច្បាប់ នៅក្នុងខេត្តស្ទឹងត្រែង គឺមានតិចតួចណាស់ដែលលោក កុល សំអុល ជាអភិបាលខេត្ត និងលោក អ៊ីវ ឯកសាវត្តី ជានាយខណ្ឌរដ្ឋបាលព្រៃឈើ ខេត្តស្ទឹងត្រែងចាត់វិធានការបង្ក្រាប ឲ្យស្របតាមបទបញ្ជាលេខ០១ ហើយគេយល់ថា លោក អ៊ុក រ៉ាប៊ុន ជារដ្ឋមន្ត្រីក្រសួងកសិកម្ម ទើបឡើងតំណែងថ្មី គួរចំណាយពេលវេលា ធ្វើដំណើរដោយស្ងាត់ៗ ទៅឃ្លាំមើលការដឹកជញ្ជូនឈើខុសច្បាប់ ដ៏អនាធិបតេយ្យរបស់ឈ្មួញទាំងតូចទាំងធំ ក្នុងខេត្តស្ទឹងត្រែង ហើយចាត់វិធានការឲ្យបានតឹងរ៉ឹង ទៅលើមន្ត្រីជំនាញនៅទីនោះ កុំឲ្យធ្វើអ្វីៗតាមតែទំនើងចិត្តតទៅទៀត។
សេចក្តីរាយការណ៍បានឲ្យដឹងថា ឈ្មួញដ៏មានឥទ្ធិពលម្នាក់ឈ្មោះ ចែងីម គឺគាត់មិនសូវចេញមុខចេញមាត់ ចុះប្រឡូកក្នុងជំនួញឈើខុសច្បាប់ ដោយផ្ទាល់នោះទេ ប៉ុន្តែគាត់មានអំណាចខ្លាំងណាស់។ មន្ត្រីជំនាញរដ្ឋបាលព្រៃឈើរបស់លោក អ៊ីវ ឯកសាវត្តី ក៏ដូចជាសមត្ថកិច្ច ពាក់ព័ន្ធនៅពេលជួបចែងីម ម្តងៗបានរៀបប្ញកពារ យ៉ាងសុភាពរាបសាបំផុត យកដៃឱបពងនៅពេលនិយាយនៅចំពោះមុខ ចែងីម ហើយគេមិនដឹងថា ចែងីម មានឥទ្ធិពល ឬមានមន្តស្នេហ៍អ្វី ធ្វើឲ្យមន្ត្រីជំនាញរដ្ឋបាលព្រៃឈើ ក៏ដូចជាសមត្ថកិច្ចពាក់ព័ន្ធ ឱនលំទោននោះទេ ប៉ុន្តែគេដឹងថា ចែងីម មានតែអំណាចលុយប៉ុណ្ណោះ ក្នុងការចាត់ចែងបញ្ជាទិញទឹកចិត្ត មន្ត្រីពុករលួយ គ្រប់ផ្នែកទាំងអស់។
សកម្មភាពកាប់បំផ្លាញព្រៃឈើ យ៉ាងរាលដាលជាងគេ ក្នុងខេត្តស្ទឹងត្រែងគឺតំបន់អភិរក្ស ឬតំបន់ព្រៃការពារក្នុងស្រុកសេសាន និងស្រុកសៀមប៉ាង ហើយកាលពីប៉ុន្មានថ្ងៃមុននេះ សមត្ថកិច្ចចម្រុះបានចុះទៅបង្ក្រាប ឈើប្រណីតរាប់ពាន់កំណាត់ នៅចំណុចឃុំស្តៅ នៃស្រុកសេសាន ទីដែលមានការដឹកជញ្ជូនឈើនិងស្តុកឈើ រាប់រយម៉ែត្រគូបជាប់ជាប្រចាំ ប៉ុន្តែសមត្ថកិច្ចមិនបានបង្ហាញឈ្មោះ ម្ចាស់ឈើនោះទេ។ ផ្អែកតាមព័ត៌មាន ដែលប្រជាពលរដ្ឋ បានខ្សឹបប្រាប់អ្នកកាសែត គឺគេដឹងថា ម្ចាស់ឈើរាប់ពាន់កំណាត់នោះមានឈ្មោះ ចែងីម ដែលជាឈ្មួញដ៏មានអំណាច បានបំផុសឲ្យប្រជាពលរដ្ឋចូលព្រៃកាប់ឈើយកមកលក់ឲ្យគាត់ជាប់ជាប្រចាំ។
រឿងដែល ចែងីម ចំណាយលុយ ឬជួលឲ្យប្រជាពលរដ្ឋ ចូលព្រៃកាប់ឈើប្រណីតយ៉ាងអនាធិបតេយ្យ គួរតែជាកម្មវត្ថុដ៏សំខាន់មួយដែល លោក អ៊ីវ ឯកសាវត្តី ជានាយខណ្ឌរដ្ឋបាលព្រៃឈើខេត្តស្ទឹងត្រែង ចាត់វិធានការក្តៅកសាងសំណុំរឿង បញ្ជូនទៅតុលាការ ដើម្បីចាប់ឃាត់ខ្លួន ឬកោះហៅ ចែងីម ទៅសួរនាំពីករណីជួលប្រជាពលរដ្ឋ ឲ្យចូលព្រៃកាប់ឈើ និងការដឹកជញ្ជូនឈើទ្រង់ទ្រាយធំដែលគ្មាននរណាហ៊ានប៉ះពាល់។ ប្រជាពលរដ្ឋនៅខេត្តស្ទឹងត្រែងមួយចំនួន ក៏បានចំអកផងដែរថា គ្រាន់តែរឿងល្បែងស៊ីសង តុលាការខេត្តស្ទឹងត្រែង បានចាត់វិធានការក្តៅ ដូចជាគ្រួសារមួយត្រូវបាន ចាប់ឃុំខ្លួនទាំងប្តីនិងប្រពន្ធ ទុកឲ្យកូនតូចៗ៤នាក់ រស់នៅគ្មានទីពឹង ប៉ុន្តែសមត្ថកិច្ចបែរជាធូររលុងចំពោះមេឈ្មួញដែលជួលប្រជាពលរដ្ឋ ឲ្យចូលព្រៃកាប់ឈើ។
បើផ្អែកតាមបទបញ្ជាលេខ០១ របស់រាជរដ្ឋាភិបាល សំដៅបង្ការបង្ក្រាបនិងទប់ស្កាត់ ការបំផ្លាញព្រៃឈើ ឬការដឹកជញ្ជូនឈើខុសច្បាប់ មន្ត្រីសមត្ថកិច្ចពាក់ព័ន្ធ គួរតែចាត់វិធានការក្តៅចំពោះ ចែងីម ដែលមិនត្រឹមតែរកស៊ី ដឹកជញ្ជូនឈើខុសច្បាប់ប៉ុណ្ណោះទេ ថែមទាំងបំផុសឲ្យប្រជាពលរដ្ឋ ចូលព្រៃកាប់បំផ្លាញព្រៃឈើ យ៉ាងវិនាសហិនហោច។ គេកំពុងតាមដាន យ៉ាងយកចិត្តទុកដាក់ថា តើលោក អ៊ុក រ៉ាប៊ុន ជារដ្ឋមន្ត្រីក្រសួងកសិកម្ម ទើបឡើងថ្មីមានការប្តេជ្ញាចិត្ត និងទទួលខុសត្រូវក្នុងកម្រិតណា ខណៈដែលគ្រប់ៗគ្នាបានបន្ទោសទៅលើលោក ច័ន្ទ សារុន ដែលគ្មានសមត្ថកិច្ច បង្ការបង្ក្រាបការដឹកជញ្ជូនឈើខុសច្បាប់ ហើយគេរំពឹងទុកថា ក្រោមការគ្រប់គ្រងរបស់លោក អ៊ុក រ៉ាប៊ុន អ្វីៗអាចល្អប្រសើរជាងមុន និងអាចបោសសម្អាតមន្ត្រី ពុករលួយដែលឃុបឃិត ឲ្យឈ្មួញរកស៊ីដឹកជញ្ជូនឈើខុសច្បាប់៕
Source from: watphnom-news.com
Loading...
Post a Comment