ប្រទេសឡាវ ៖ ក្រុមអ្នកជួយសង្គ្រោះ បានស្រង់យកសាកសព អ្នកដំណើរនិងអ្នកបម្រើការ ក្នុងយន្តហោះដែលបានធ្លាក់ ចេញពីទឹកភក់នៃទន្លេមេគង្គសម្លាប់មនុស្សទាំង ៤៩ នាក់មកពី១០ប្រទេស។ គេរកឃើញសាក់កាដូ ស្លាបកង្ហារ ដែលបាក់និងលិខិតឆ្លងដែន ស្ថិតចំណោមកំទេចកំទី ដែលនៅ រាយប៉ាយលើមាត់ច្រាំងទន្លេ កន្លែងដែលយន្តហោះកង្ហារពីរ នៃក្រុមហ៊ុនអាកាសចរណ៍ បានបន្សល់ទុក ស្នាមមរអិលដ៏ជ្រៅនៅលើដី មុនពេលវាលិចចូលក្នុងទឹក។
សារព័ត៌មាន Nation របស់ថៃ បានចេញផ្សាយនៅថ្ងៃសុក្រ ទី១៨ ខែតុលា ឆ្នាំ២០១៣ នេះបានឲ្យដឹងថា ប្រតិបត្តិការរុករកមនុស្ស ដែលបាត់ខ្លួន បន្ទាប់ពីធ្លាក់យន្តហោះ ដឹកអ្នកដំណើរ មួយគ្រឿងនៅខេត្ត ចម្ប៉ាសាក់ ប្រទេសឡាវនោះ នៅតែកំពុងបន្តនៅឡើយ ប៉ុន្តែមានសេចក្តីរាយការណ៍ថា ប្រតិបត្តិការខាងលើនេះ គឺកំពុងខ្វះខាតកម្លាំងមនុស្ស និងឧបករណ៍សង្គ្រោះ។ រហូតមកដល់ពេលនេះ ក្រុមសង្គ្រោះបានរកឃើញសព ប្រមាណជា ១៧នាក់ហើយ ក្នុងចំណោមមនុស្ស ៤៩នាក់ ហើយដែលគេ អះអាងថា ទំនងជាមិនអាចមាននរណា មានជីវិតរស់រាននោះទេ។
ក្រុមជំនាញអន្តរជាតិ មកពីប្រទេសបារាំង, សិង្ហបុរី, និង ថៃ បានមកដល់ប្រទេសឡាវ កាលពីព្រឹកថ្ងៃសុក្រនេះ ដើម្បីរៀបចំធ្វើតារាងភូមិសាស្ត្រ ពីកន្លែងដែលធ្លាក់ ព្រមទាំងពន្យល់ពីមូលហេតុ ដែលនាំឲ្យយន្តហោះ ATR-72 របស់ក្រុមហ៊ុន អាកាសចរណ៍ឡាវ ធ្លាក់កាលពីល្ងាច ថ្ងៃពុធ ទី១៦ ខែតុលា នោះ។ យោធាជើងទឹករបស់ថៃ ក៏បានបញ្ជូនកម្លាំង ទៅកាន់កន្លែងកើតហេតុ ដើម្បីជួយធ្វើការ រុករកមនុស្សបាត់ខ្លួន ប៉ុន្តែពួកគេ កំពុងជួបប្រទះការលំបាក យ៉ាងខ្លាំងដោយសារ ទឹកទន្លេហូរខ្លាំង និងមានជម្រៅរហូតដល់ ១០ ម៉ែត្រ ហើយទន្លេ ពោរពេញដោយល្បាប់ភក់ ៕
Source from: watphnom-news.com
Post a Comment