ខេត្តសៀមរាប ៖ ភ្នំមួយកន្លែងដែលអ្នកស្រុក តែងហៅថា ភ្នំម្រេច មានកម្ពស់ជាង ៥០០ ម៉ែត្រស្ថិតនៅភូមិដូនអែម ឃុំគោគដូង ស្រុកអង្គរជុំ ខេត្តសៀមរាប បានប្រេះរលំជាជ្រោះជម្រៅ ៧ម៉ែត្រ កាលពីវេលាម៉ោង ៨និង៣០ យប់ថ្ងៃទី១៨ ខែតុលា ឆ្នាំ២០១៣ បង្កឲ្យមានការ ភ្ញាក់ផ្អើលយ៉ាងខ្លាំង ហើយសមត្ថកិច្ចក៏បានចុះ ទៅអន្តរាគមន៍ការពារសុវត្ថិភាព ជូនប្រជាពលរដ្ឋផងដែរ។
ប្រជាពលរដ្ឋដែលឃើញហេតុការណ៍នេះ បានឲ្យដឹងថា ភ្នំម្រេចដែលមានកម្ពស់ជាង ៥០០ ម៉ែត្រ បានប្រេះជាផ្ទាំងនិងជាជួរ ដែលមានជម្រៅ ៧ ម៉ែត្រ បង្កភាពភ័យខ្លាចដល់ពួកគាត់ ហើយបានរាយការណ៍ជូនអាជ្ញាធរមូលដ្ឋានភ្លាមៗ ដើម្បីមានចំណាត់ការ ក្នុងការទប់ស្កាត់ប្រជាពលរដ្ឋ ដែលបានធ្វើចំការនៅទីនោះ ឲ្យមានការប្រុងប្រយ័ត្ន។
លោក ឆង ឈូត មេភូមិ ដែនអែម បានមានឲ្យដឹងថា កាលពីយប់ថ្ងៃទី១៧ខែតុលាឆ្នាំ ២០១៣ មានភ្លៀងធ្លាក់ជោកជាំ បណ្ដាលឲ្យភ្នំដែលមានកម្ពស់ ៥០០ ម៉ែត្រ និងមានដំណាំដំឡូង ចេក និងខ្ទមចាំចំការនៅលើភ្នំ ប្រមាណ ១០ ហិកតា ត្រូវបានខូចខាត ដោយសារតែភ្នំនោះ បានបាក់ធ្លាក់ទាំងផ្ទាំងនៅចំណុចកណ្ដាល ដែលមានប្រវែងប្រេះ ៣៥០ ម៉ែត្រ។
លោក កែម ហាំ មេឃុំគោគដូង បានអំពាវនាវ ដល់ប្រជាពលរដ្ឋ ដែលមានចំការ នៅទីតាំងកើតហេតុ ផ្អាកការចូល ទៅទីតាំងកើតហេតុ ព្រោះខណៈនេះ ស្ថានភាពដីនៅទន់ជ្រាយ ឬអាចនឹងប្រេះដីបន្ថែម ដែលអាចបង្កឲ្យមានគ្រោះថ្នាក់ ដល់បងប្អូនប្រជាពលរដ្ឋ ហើយក៏មានការកោះប្រជុំ ប្រជាពលរដ្ឋ ដើម្បីផ្សព្វផ្សាយ បង្ការគ្រោះថ្នាក់ផងដែរ៕
Source from: watphnom-news.com
Post a Comment