ក្រៅពី​បួងសួង​សុំ​សេចក្តីសុខ និង​សាង​កុសល​សម្រាប់​ជាតិ​មុខ ប្រជារាស្ត្រ​ខ្មែរ​​ទទូច​​ឲ្យ គ​ណ​បក្ស​​ឈ្នះ​ឆ្នោត​​ទាំង​ពីរ​​ស្រុះ​ស្រួល​​គ្នា​

10/04/2013 12:30:00 AM

រាជធានីភ្នំពេញ៖អំឡុងពិធីបុណ្យភ្ជុំបិណ្ឌប្រជាពលរដ្ឋមួយចំនួនបានបួងសួងសុំឲ្យរបររកស៊ីទទួលទានរបស់ខ្លួនរីកចម្រើននិងសូមឲ្យគណបក្ស

រាជធានីភ្នំពេញ ៖ អំឡុងពិធីបុណ្យភ្ជុំបិណ្ឌ ប្រជាពលរដ្ឋមួយចំនួន បានបួងសួងសុំឲ្យ របររកស៊ីទទួលទាន របស់ខ្លួនរីកចម្រើន និងសូមឲ្យគណបក្ស ប្រជាជនកម្ពុជា និងគណបក្ស សង្គ្រោះជាតិ ផ្សះផ្សា ស្រុះស្រួលគ្នា រីឯអ្នកខ្លះទៀត បួងសួងសុំសន្តិភាព និងការអភិវឌ្ឍ។ សម្រាប់លោក សម រង្ស៊ី និងក្រុមគ្រួសារបាន អញ្ជើញទៅវត្ត ក្នុងខេត្តក្រចេះ និងខេត្តកំពង់ចាម ដោយមានការ ទទួលស្វាគមន៍ ពីប្រជាពលរដ្ឋ យ៉ាងកក់ក្តៅបំផុត។

ការបួងសួងទាំងនេះ និងសេចក្តីប្រាថ្នា ផ្សេងៗទៀតបានកើតមាន ឡើងនៅតាមវត្តអារាម នានាទូទាំង នៅពេលពិធីបុណ្យភ្ជុំបិណ្ឌ ចាប់ផ្តើម។ ពិធីបុណ្យភ្ជុំបិណ្ឌ ដែលមានរយៈពេល ១៥ថ្ងៃនេះ គឺជាពេលដែលញាតិការ ទាំងប្រាំពីរសណ្តាន ដែលបានចែកឋានទៅ មកទទួលកុសល ផលបុណ្យដែល សាច់ញាតិនៅរស់ឧទ្ទិសជូន។ ព្រះសង្ឃបានទទួល ចង្ហាន់យ៉ាងច្រើន នៅក្នុងព្រះវិហារ ហើយបានបង្សុកូលឧទ្ទិសកុសល ជូនដល់វិញ្ញាណក្ខន្ធ អ្នកដែលបានស្លាប់។

នៅច្រកចេញចូលគ្រប់វត្តអារ៉ាម មានប្រអប់ដ៏ធំមួយ ពេញទៅដោយអង្ករ និងក្រដាសប្រាក់រៀល តំណាងឲ្យសំពៅមួយ ដែលអ្នកគោរពបូជាជឿថា នឹងនាំបុព្វការីជនរបស់ខ្លួនទៅ កាន់ជាតិកំណើតដ៏ប្រសើរ។ ស្ត្រីវ័យចំណាស់ម្នាក់ បាននិយាយថា យើងមកវត្តនេះ ដើម្បីបួងសួងសុំឲ្យការ រកស៊ីទទួលទាន របស់យើងចម្រុងចម្រើន និងដើម្បីសាងកុសល សម្រាប់ជាតិមុខ ហើយក៏មានការបួងសួង សុំសន្តិភាព និងសុំឲ្យគណបក្ស ទាំងពីររួបរួមគ្នា ដើម្បីអភិវឌ្ឍប្រទេស។

អ្នកស្រី ចាន់ សុភ័ណ្ឌ អាយុ៥០ឆ្នាំ ក៏បាននិយាយថា យើងឧទ្ទិសកុសល ផលបុណ្យដល់វិញ្ញាណក្ខន្ធ បុព្វការីរបស់យើង ដែលបានលាចាកលោកនេះ សុំឲ្យពួកគាត់នាំសេចក្ដីសុខ ដល់យើង ហើយយើងក៏បួងសួង សុំឲ្យមេដឹកនាំទាំងអស់ រួបរួមគ្នាដើម្បីកសាង ប្រទេសជាតិរបស់យើងផងដែរ ពីព្រោះកាលពីអតីតកាល ប្រទេសរបស់យើង បានជួបប្រទះសង្គ្រាមជាច្រើន ហើយប្រជាពលរដ្ឋ ធុញទ្រាន់ និងនឿយណាយណាស់ ចំពោះសង្គ្រាម។

ប្រជាពលរដ្ឋទូទៅ បានវាយតម្លៃថា ពិធីបុណ្យភ្ជុំបិណ្ឌ ក្នុងឆ្នាំនេះមិនអ៊ូអរ ដូចឆ្នាំមុនៗទេ វាបណ្តាលមកពី បរិយាកាស ក្រោយការបោះឆ្នោត ដែលគណបក្សប្រជាជន កំពុងកាន់អំណាច និងគណបក្ស សង្គ្រោះជាតិ បានខ្វែងគំនិតគ្នា៕