ខេត្ដកណ្ដាល ៖ បុរសម្នាក់បានស្លាប់ភ្លាមៗ នៅនឹងកន្លែងកើតហេតុនិង ២ នាក់ទៀតរងរបួសធ្ងន់ស្រាល ខណៈដែលពួកគេបានជិះម៉ូតូ ២គ្រឿង ក្នុងទិសដៅបញ្ច្រាសគ្នា ហើយបានប៉ះដៃចង្កូតម៉ូតូ រួចជ្រុលទៅបុករថយន្ដ ១គ្រឿងទៀត ម៉ាកហ៊ីយ៉ាន់ដាយ កាលពីវេលាម៉ោង ៤និង១៥ នាទីរសៀលថ្ងៃទី២០ ខែតុលា ឆ្នាំ២០១៣ នៅលើកំណាត់ផ្លូវជាតិលេខ ៧០A ស្ថិតក្នុងភូមិរកាកោង ឃុំរកាកោងទី១ ស្រុកមុខកំពូល ខេត្ដកណ្ដាល ។
ជនរងគ្រោះដែលស្លាប់ បាត់បង់ជីវិតមានឈ្មោះ ពៅ រដ្ឋា ភេទប្រុស អាយុ ២០ ឆ្នាំ ជាអ្នកបើកបរម៉ូតូម៉ាកស្មាស់ ពណ៌ខ្មៅ ពាក់ស្លាកលេខភ្នំពេញ 1AB-2293 និងអ្នករួមដំណើរម្នាក់ទៀត ដែលរងរបួសធ្ងន់នោះមានឈ្មោះ សេង ដារ៉ូ ភេទប្រុស អាយុ ២០ឆ្នាំ ។ ជនរងគ្រោះទាំង ២នាក់មានទីលំនៅ ក្នុងភូមិល្វាក្រោម ឃុំស្ដៅ ស្រុកកងមាស ខេត្ដកំពង់ចាម ។
ចំណែកឯជនរងគ្រោះ ដែលរងរបួសស្រាលនោះ មានឈ្មោះ បាន ប៊ុនថា ភេទប្រុស អាយុ ២៥ឆ្នាំ មានទីលំ នៅក្នុងភូមិល្វាក្រោម ឃុំស្ដៅ ស្រុកកងមាស ខេត្ដកំពង់ចាម ជាអ្នកបើកបរ ម៉ូតូម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ តាកែវ 1D-6603 ។ រថយន្ដដែលត្រូវបានម៉ូតូទាំង២ គ្រឿងជ្រុលទៅបុកនោះម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3A-9804 បើកបរដោយបុរសម្នាក់ ដែលបានរត់គេចខ្លួន ក្រោយពេលកើតហេតុ។
ពេលកើតហេតុគេឃើញម៉ូតូ ២គ្រឿងនេះ ជិះលើផ្លូវជាតិលេខ ៧០A ទន្ទឹមគ្នាក្នុងទិសដៅ ពីលិចទៅកើត ខណៈបើកដល់ចំណុចកើតហេតុ ម៉ូតូទាំង២ គ្រឿងបានបើកជែង រថយន្ដមួយគ្រឿង ដែលកំពុងបើកបរនៅខាងមុខ ។ ពេលវ៉ាជិតផុតទៅហើយនោះ ក៏ស្រាប់តែម៉ូតូទាំង ២គ្រឿង បានបើកប៉ះដៃចង្កូតគ្នា រេចង្កូតទៅបុកជាមួយ រថយន្ដម៉ាក ហ៊ីយ៉ាន់ដាយ ដែលកំពុងបើកបរច្រាសទិសគ្នា បណ្ដាលឱ្យអ្នកជិះម៉ូតូ ស្លាប់និងរងរបួសតែម្តង៕
Source from: watphnom-news.com
Post a Comment