ខេត្តស្ទឹងត្រែង ៖ ជាញឹកញាប់អគ្គស្នងការនគរបាលជាតិ បានយកបទបញ្ជាលេខ ០១ របស់រាជរដ្ឋាភិបាល ក្នុងការបង្ការ បង្ក្រាប ទប់ស្កាត់ការកាប់បំផ្លាញព្រៃឈើ ក៏ដូចជាការដឹកជញ្ជូនឈើខុសច្បាប់មកផ្សព្វផ្សាយណែនាំឲ្យមន្ត្រីនគរបាល គ្រប់ជាន់ថ្នាក់យកចិត្តទុកដាក់ អនុវត្តន៍តាមឲ្យមានប្រសិទ្ធភាព ប៉ុន្តែសម្រាប់លោក វ៉ន សុគន្ធ ជាប្រធានផ្នែកនគរបាលសេដ្ឋកិច្ច ក្រសួងមហាផ្ទៃ ប្រចាំខេត្តស្ទឹងត្រែង មិនដែលអើពើអនុវត្តន៍តាម សេចក្តីណែនាំរបស់ថ្នាក់លើនោះទេ។
គេមិនច្បាស់ទេថា តើលោក វ៉ន សុគន្ធ បានចំណាយប្រាក់ក្នុងមួយខែប៉ុន្មាន សម្រាប់បង់ឲ្យមេនគរបាលសេដ្ឋកិច្ច ក្រសួងមហាផ្ទៃ ជាថ្លៃទិញប៉ុស្តិ៍ សម្រាប់ចុះទៅប្រមូលលុយ ពីបទល្មើសដឹកជញ្ជូនឈើ ខុសច្បាប់នៅទូទាំងខេត្តស្ទឹងត្រែង។ ក្រុមឈ្មួញរកស៊ី ដឹកជញ្ជូនឈើមួយចំនួនបានឲ្យដឹងថា លោក វ៉ន សុគន្ធ បានចុះទៅឈរជើងក្នុងខេត្តស្ទឹងត្រែង ដឹកនាំកម្លាំងនគរបាលសេដ្ឋកិច្ច ក្រសួងមហាផ្ទៃ ចុះទៅប្រតិបត្តិការ នៅតំបន់នោះឡើងដុះស្លែទៅហើយ គ្មាននរណាម្នាក់អាចប្រជែង ដណ្តើមយកប៉ុស្តិ៍ពីលោក វ៉ន សុគន្ធ បានទេ។
ពេលខ្លះគេយល់ឃើញថា លោក វ៉ន សុគន្ធ ជាមនុស្សពូកែអែបអបថ្នាក់លើ និងជាអ្នកមានជំនាញប្រមូលលុយ ពីការដឹកជញ្ជូនឈើខុសច្បាប់ យកទៅបង់ជូនថ្នាក់លើ ថ្លៃទិញប៉ុស្តិ៍បានទៀងទាត់ និងគ្រប់ចំនួនមិនដែលធ្វើឲ្យថ្នាក់លើ ទើសចិត្តម្តងណាឡើយ។ ដូច្នេះហើយបានជាលោក វ៉ន សុគន្ធ អាចកាន់កាប់តំណែង ជាប្រធានផ្នែកនគរបាលសេដ្ឋកិច្ច ក្រសួងមហាផ្ទៃប្រចាំខេត្តស្ទឹងត្រែង សឹងគ្រប់អាណត្តិមិនឲ្យរបូតពីដៃរបស់គាត់នោះទេ ព្រោះទឹកដីខេត្តស្ទឹងត្រែង មានសក្តានុពលសេដ្ឋកិច្ច អាចប្រមូលលុយយកទៅច្រកហោប៉ៅ ធ្វើមានធ្វើបានផ្ទាល់ខ្លួនយ៉ាងងាយស្រួលបំផុត។
លោក វ៉ន សុគន្ធ បានជួលផ្ទះនៅក្នុងខេត្តស្ទឹងត្រែង ដើម្បីធ្វើជាទីស្នាក់ការ ឲ្យក្រុឈ្មួញរកស៊ីដឹកជញ្ជូនឈើ ទាំងតូចទាំងធំ ទាំងតាមផ្លូវទឹកនិងតាមផ្លូវគោក ចូលទៅបង់លុយឲ្យគាត់ជាប់ជាប្រចាំ រាល់ពេលដឹកជញ្ជូនឈើខុសច្បាប់ ហើយលោក វ៉ន សុគន្ធ មានទំនាក់ទំនងយ៉ាងល្អជាមួយ ក្រុមអ្នករត់ការដឹកជញ្ជូនឈើខុសច្បាប់ ដែលតែងតែសុំការយោគយល់ និងជូនដំណឹងរាល់ពេល មានការដឹកជញ្ជូនឈើឆ្លងកាត់ភូមិសាស្ត្រដែលោក វ៉ន សុគន្ធ កាន់កាប់ ពោលគឺការដឹកជញ្ជូនឈើប្រមាណ ១០០រថយន្ត ក្រុមឈ្មួញបានរាយការណ៍និងបង់លុយជូនលោក វ៉ន សុគន្ធ ដល់ទៅ ៩០ រថយន្តទៅហើយ មិនដែលហ៊ានរំលងលោក វ៉ន សុគន្ធ ទេ។
ដោយឡែកក្រុមឈ្មួញមួយចំនួន ដែលជ្រកក្រោមស្បែកជា កងកម្លាំងប្រដាប់អាវុធ រកស៊ីដឹកជញ្ជូនឈើ មកពីស្រុកសេសាន និងស្រុកសៀមប៉ាង យកមកស្តុកទុកនៅក្រុងស្ទឹងត្រែង ធ្លាប់ត្រូវបានលោក វ៉ន សុគន្ធ ដឹកនាំកម្លាំងចុះទៅបង្ក្រាប យកស្នាដៃក៏ព្រោះតែឈ្មួញទាំងនោះ មិនបានទំនាក់ទំនងបង់លុយជូនគាត់។ នគរបាលសេដ្ឋកិច្ចក្រសួងមហាផ្ទៃ ក្រោមបញ្ជារបស់លោក វ៉ន សុគន្ធ សុទ្ធតែល្បីឈ្មោះក្នុងការកោសរូស បង្ខំឲ្យក្រុមអ្នករកស៊ីដឹកជញ្ជូនឈើ បង់លុយតាមតែទំនើងចិត្ត ដូចជាឈ្មោះ នី ម៉ៅ និងឈ្មោះ រិន ដែលបានដាក់ប៉ុស្តិ៍ជជុះនៅចំណុចអូរពងមាន់ តែងតែប្រដេញចាប់ឡានដឹកឈើ ឲ្យចូលបង់លុយមិនដែលយោគយល់ ចំពោះឈ្មួញណាម្នាក់ឡើយ៕
Source from: watphnom-news.com
Post a Comment