រាជធានីភ្នំពេញ ៖ រថយន្តហាយឡែនឌ័រមួយគ្រឿង ត្រូវបានដើមគ្រាប់បែក ដ៏ធំមួយដើមរលំសង្កត់ កាលពីវេលាម៉ោង ៩និង២០នាទី យប់ថ្ងៃទី១៨ ខែតុលា ឆ្នាំ២០១៣ ស្ថិតនៅតាមផ្លូវជាតិលេខ៥ ក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណៈកំពុងបើកបរតាមផ្លូវ បណ្តាលឲ្យរងការខូចខាត ស្ទើរទាំងស្រុង តែសំណាងល្អ មនុស្សនៅក្នុងរថយន្តចំនួន ៤ នាក់មិនបានរងរបួសនោះទេ។
ម្ចាស់រថយន្តមានឈ្មោះ ឡេះ សាវី អាយុ ២៨ ឆ្នាំ រស់នៅភូមិខ១ សង្កាត់ច្រាំងចំរេះទី២ ខណ្ឌឫស្សីកែវ បានបើករថយន្ត ហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ 2M-5257 និងក្រុមគ្រួសារ ត្រឡប់មកពីមើលជំងឺកូន ហើយនៅពេលបើកមក ដល់ក្រោមដើមឈើ ខណៈកំពុងមានភ្លៀង និងខ្យល់ខ្លាំងផងនោះ បានបណ្តាលឲ្យ ដើមឈើដួលសង្កត់តែម្តង។
កម្លាំងសមត្ថកិច្ច និងអាជ្ញាធរ ខណ្ឌឫស្សីកែវ បានទៅអាកាត់ និងយកចេញពី ផ្លូវខណៈម្ចាស់រថយន្ត បានយករថយន្តទៅផ្ទះ ដើម្បីជួសជុលខ្លួនឯង។ គ្រប់ករណីដែលដើមឈើ រលំលើរថយន្ត របស់ប្រជាពលរដ្ឋ គេមិនដែលឃើញ មន្ត្រីពាក់ព័ន្ធគិតគូរ ដោះស្រាយនោះទេ តែបើរថយន្តទៅបុក ឬបង្កការខូចខាតទ្រព្យសម្បត្តិរបស់រដ្ឋ ច្បាស់ជាសាលារាជធានីភ្នំពេញ ផាកពិន័យ ជាមិនខានឡើយ៕
Source from: watphnom-news.com
Post a Comment