ខេត្តកណ្តាល ៖ សពរបស់លោក យង់ សំ អាយុ ៥៨ ឆ្នាំជាអ្នកបើកបរយន្តហោះ ឲ្យក្រុមហ៊ុនអាកាសចរណ៍ឡាវ ត្រូវបានដឹកតាមយន្តហោះ របស់ក្រុមហ៊ុនអាកាសចរណ៍ឡាវ មកដល់ប្រទេសកម្ពុជា នៅវេលាម៉ោងប្រហែល ១រសៀលនៅថ្ងៃទី១៩ ខែតុលា ឆ្នាំ២០១៣ ហើយត្រូវបានដឹកចេញតាមច្រកមូលដ្ឋានទ័ពអាកាស ដែលនៅក្បែរ អាកាសយានដ្ឋាន អន្តរជាតិភ្នំពេញ ឆ្ពោះមកកាន់គេហដ្ឋាន នៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល ដើម្បីធ្វើបុណ្យ តាមប្រពៃណី។
អ្នកស្រី សុខ ចន្ធូ ភរិយាសពលោក យង់ សំ បានអមដំណើរសពស្វាមីអ្នកស្រី មកពីប្រទេសឡាវ បានឲ្យដឹងថា ពេលស្វាមីគាត់មានគ្រោះថ្នាក់ ធ្លាក់យន្តហោះ គាត់ក៏កំពុងនៅក្នុង ប្រទេសឡាវដែរ។ អ្នកស្រី ចន្ធូ បានរៀបរាប់បែបអបិយជំនឿថា នៅថ្ងៃដែលស្វាមីកំពុង មានគ្រោះថ្នាក់ វាហាក់ដូចជាមានអ្វីម្យ៉ាងមកធ្វើឲ្យដៃជើងរបស់គាត់ ប្រែជាត្រជាក់ខុសធម្មតា។ មុននឹងចេញទៅធ្វើការ អ្នកស្រីបានផ្ដែផ្ដាំស្វាមី ឲ្យប្រុងប្រយ័ត្នខ្លួន ហើយស្វាមីអ្នកស្រី ក៏បានឆ្លើយតបវិញថា គាត់ដឹងថា ត្រូវធ្វើយ៉ាងម៉េចហើយ និងកុំឲ្យអ្នកស្រីព្រួយបារម្ភខ្លាំងពេក។
អ្នកស្រី សុខ ចន្ធូ បានរៀបរាប់ទៀតថា ស្វាមីអ្នកស្រីគឺជាបង្គោល ដ៏រឹងមាំក្នុងគ្រួសារ ហើយការបាត់បង់រូបគាត់នៅពេលនេះ នឹងធ្វើឲ្យគ្រួសារគាត់ជួបផលលំបាក ព្រោះគាត់មានកូន ៣នាក់ ក្នុងបន្ទុកទៀតផង។ អ្នកស្រី សុខ ចន្ធូ បានរំលឹកថា ស្វាមីរបស់គាត់តស៊ូ ក្នុងឆាកជីវិតណាស់ គាត់ធ្វើអ្វីមិនខ្លាចហត់នឿយទេចំពោះគ្រួសារ មិនអាចមានមនុស្សដូចគាត់ទេ គាត់មិនគិតខ្លាចហត់នឿយខ្លួនគាត់ទេ ឲ្យតែក្រុមគ្រួសារ មានហូបចុកគ្រប់គ្រាន់ អ្វីក៏គាត់ធ្វើដែរ គាត់ដើររហូត មិនសូវនៅជុំប្រពន្ធកូនទេ ដូចជាទៅសូវៀត ទៅបារាំង ជាដើម។
នាយកចាត់ការទូទៅ ក្រុមហ៊ុនអាកាសចរណ៍ឡាវ ប្រចាំនៅកម្ពុជា អ្នកនាង វ៉ាន់ផាកន ខាន់ថាម៉ាឡា ដែលបានចូលរួម គោរពវិញ្ញាណក្ខន្ធសពលោក យង់ សុំ ដែរនោះ បានឲ្យដឹងថា ការបាត់បង់រូបលោក យង់ សំ វាមិនមែនជាការសោកស្ដាយ សម្រាប់តែប្រជាពលរដ្ឋកម្ពុជា នោះទេ តែវាសម្រាប់ប្រជាជនឡាវផងដែរ។ គ្រោះថ្នាក់ធ្លាក់យន្តហោះ នៅប្រទេសឡាវ កាលពីថ្ងៃទី១៦ ខែតុលា ឆ្នាំ២០១៣ បានសម្លាប់ជីវិតមនុស្សទាំងអស់ ៤៩នាក់ក្នុងយន្តហោះ ដែលបានចាកចេញពី រដ្ឋធានីវៀងចន្ទន៍ ឆ្ពោះទៅកាន់តំបន់ទេសចរណ៍ឈ្មោះ ប៉ាក់សេ ក្នុងប្រទេសឡាវ។ ក្នុងចំណោមអ្នកដែលស្លាប់នោះ មានជនជាតិឡាវ កម្ពុជា ថៃ ម៉ាឡេស៊ី វៀតណាម កូរ៉េ បារាំង អូស្ត្រាលី អាមេរិក កាណាដា ចិន និងតៃវ៉ាន់៕
Source from: watphnom-news.com
Post a Comment