បែក​ធ្លាយ​​រឿង​​ប្រ​ធាន​​អា​ជីវ​កម្ម​​អ​គ្គិ​​ស​នី​​ខេត្ត​​ព្រះ​សី​ហ​នុ អត់​​សូវ​​ចូល​​ប៊ុ​យ​​រ៉ូ​ និង​​យក​​បំ​ណុល​​រដ្ឋ​​រាប់​ពាន់​​លាន​​រៀល ទៅ​​បម្រើ​​ការ​ស​ប្បាយ​​ផ្ទាល់​​ខ្លួន​

10/17/2013 11:00:00 PM

ខេត្តព្រះសីហនុ៖មានភាពមិនប្រក្រតីជាច្រើនបានកើតឡើងយ៉ាងស្ងៀមស្ងាត់ក្នុងអង្គភាពអគ្គិសនីខេត្តព្រះសីហនុរហូតដល់មានការដោះដូរប្រធានអង្គភាពនេះយ៉ាងតក់ក្រហល់

ខេត្តព្រះសីហនុ ៖ មានភាពមិនប្រក្រតីជាច្រើន បានកើតឡើងយ៉ាងស្ងៀមស្ងាត់ ក្នុងអង្គភាពអគ្គិសនីខេត្តព្រះសីហនុ រហូតដល់មានការដោះដូរ ប្រធានអង្គភាពនេះ យ៉ាងតក់ក្រហល់ ស្រាប់តែមានការបែកធ្លាយរឿងអាស្រូវដ៏ធំមួយដើម្បីស្វាគមន៍ប្រធានអគ្គិសនី ដែលទើបតែងតាំងថ្មី នោះគឺបំណុលរាប់ពាន់លានរៀល ដែលបានបន្សល់ទុក ពីអតីតប្រធានអគ្គិសនី ដែលត្រូវបានផ្លាស់ប្តូរតំណែង ពីខេត្តព្រះសីហនុ ទៅកាន់ខេត្តកំពង់ចាម ទាក់ទិននឹងបញ្ហាដែលគេសង្ស័យថា អនុប្រធានអគ្គិសនី ខេត្តព្រះសីហនុ ម្នាក់ទទួលបន្ទុក ផ្នែកអាជីវកម្ម បានយកបំណុលរដ្ឋរាប់ពាន់លានរៀល ទៅបម្រើផលប្រយោជន៍ផ្ទាល់ខ្លួន ព្រោះគ្រប់ៗគ្នាដឹងថា អនុប្រធានអគ្គិសនីម្នាក់នោះ ក្រៅពីមានតួនាទីជាប្រធានផ្នែកអាជីវកម្ម គាត់ក៏មានតួនាទីជាភ្ញៀវពិសេស ឧស្សាហ៍ចេញចូលកាស៊ីណូ មួយចំនួនផងដែរ។

លោក ឈឹម សឿន ប្រធានអគ្គិសនីខេត្តព្រះសីហនុ ដែលទើបតែងតាំងថ្មី និងជាអតីតប្រធានអង្គភាពអគ្គិសនីប្រចាំខេត្តកំពត បានចេញបញ្ជា ឲ្យបិទភ្លើងតាមបណ្តាសណ្ឋាគារ កាស៊ីណូ និងអ្នកធ្វើអាជីវកម្មមួយចំនួន ដែលបានជាប់បំណុល អគ្គិសនីក្នុងទំហំទឹកប្រាក់ រាប់រយលានរៀល។ នៅពេលប្រើវិធានការក្តៅផ្តាច់ចរន្តអគ្គិសនី តាមសណ្ឋាគារ កាស៊ីណូ និងតាមទីតាំងអាជីវកម្មធំៗមួយចំនួន ក៏ស្រាប់តែបែកធ្លាយរឿងរ៉ាវជាច្រើន ទាក់ទិនលោក គី វុឌ្ឍី ជាមេអាជីវកម្មអគ្គិសនីខេត្តព្រះសីហនុ ដែលបានបញ្ជាឲ្យកូនចៅរបស់គាត់ ដើរផ្តាច់ភ្លើងតែតាមកន្លែងរកស៊ីតូចតាច ឬតាមផ្ទះមន្ត្រីរាជការជាដើម ប៉ុន្តែនៅតាមទីតាំងសណ្ឋាគារ កាស៊ីណូធំៗ ជាច្រើនកន្លែងដែលជំពាក់បំណុល អគ្គិសនីរាប់រយលានរៀល គឺលោក គី វុឌ្ឍី អត់ចេញបញ្ជា ឲ្យកាត់ផ្តាច់ចរន្តអគ្គិសនីទេ គឺទុកធ្វើជាឆ្នាំងបាយ យកលុយទឹកតែរាប់ពាន់ដុល្លារអាមេរិក មកច្រកហោប៉ៅផ្ទាល់ខ្លួន។

មន្ត្រីតូចតាចមួយចំនួនបានបង្ហើបឲ្យដឹងថា ទីតាំងកាស៊ីណូ ដាយម៉ិនស៊ី និងកាស៊ីណូហ្គោលដិនស៊ី មានជំពាក់បំណុលរដ្ឋ រាប់រយលានរៀល ប៉ុន្តែលោក គី វុឌ្ឍី មានការយោគយល់ មិនបានកាត់ផ្តាច់ចរន្តអគ្គិសនី ទៅតាមការណែនាំរបស់ ប្រធានអង្គភាពអគ្គិសនីនោះទេ ដូចដែលមន្ត្រីមួយចំនួន បានធ្លោយឲ្យដឹងថា លោក គី វុឌ្ឍី ជាប្រធានអគ្គិសនីខេត្តព្រះសីហនុ ក្រៅពីទទួលបន្ទុកអាជីវកម្មគាត់ក៏ទទួលបន្ទុកផ្នែកកាស៊ីណូផងដែរ ព្រោះគេបានឃើញលោក គី វុឌ្ឍី មានមុខនៅកាស៊ីណូ កំពង់សោមស៊ីតធី និងកាស៊ីណូ ហ្វ័រជូណា ច្រើនជាងមានវត្តមាន បម្រើការងារក្នុងប៊ុយរ៉ូ។ មន្ត្រីជាច្រើន ពិបាករកជួបលោក គី វុឌ្ឍី លែងនិយាយហើយ បើចង់ជួបលោក គី វុឌ្ឍី ក្នុងការងារបន្ទាន់ណាមួយ ត្រូវជិះម៉ូតូឌុបដើររកលោក គី វុឌ្ឍី នៅតាមកាស៊ីណូ ឬតាមក្លឹបកម្សាន្ត ព្រោះពេលខ្លះសូម្បីតែទូរស័ព្ទ ក៏ទាក់ទងមិនបាន ហើយគេមិនដឹងថា ថ្នាក់លើគួរទុកឲ្យលោក គី វុឌ្ឍី កាន់តំណែងជាប្រធានផ្នែកអាជីវកម្ម នៃអគ្គិសនីខេត្តព្រះសីហនុ ដល់ពេលណាទៀតទេ។

មន្ត្រីមួយចំនួនទៀតបានបង្ហើបឲ្យដឹងថា តំណែងរបស់លោក គី វុឌ្ឍី ដែលជាប្រធានផ្នែកអាជីវកម្ម គឺមានអំណាចខ្លាំងណាស់ ហើយជាតួនាទីមួយដែលរវល់បំផុត ទាមទារឲ្យមានវត្តមានធ្វើការ ក្នុងប៊ុយរ៉ូជាប់ជាប្រចាំ ដើម្បីកុំឲ្យមានការកកស្ទះឯកសារ។ ភាពអសកម្មរបស់លោក គី វុឌ្ឍី បានធ្វើឲ្យប្រធានអគ្គិសនីទើបឡើងតំណែងថ្មី ជួបភាពស្មុគស្មាញជាច្រើន នៅពេលដែលមន្ត្រីតូចតាច បានរៀបរាប់ពីភាពអសកម្ម ក្នុងផ្នែកអាជីវកម្មដែលត្រូវកកស្ទះ ដោយសារតែលោក គី វុឌ្ឍី មិនសូវចូលប៊ុយរ៉ូ ហើយពេលខ្លះគេឃើញលោក គី វុឌ្ឍីទៅទំនាក់ទំនងជាមួយ ម្ចាស់កាស៊ីណូ ម្ចាស់អាជីវកម្មធំៗ ដើម្បីយកប្រាក់ទឹកតែ ពីទីតាំងអាជីវកម្មដែលជំពាក់ បំណុលរដ្ឋរាប់រយលានរៀល ហើយពេលខ្លះទៀតគេដឹងថា លោក គី វុឌ្ឍី បានយកប្រាក់ដែលប្រមូលបាន ពីអំពើពុករលួយផ្សេងៗ រាប់ពាន់រាប់ម៉ឺនដុល្លារ ទៅជួយចេញថ្លៃទឹកថ្លៃភ្លើងឲ្យកាស៊ីណូទៅវិញ។

យ៉ាងណាក៏ដោយ ពុតត្បុតដ៏អាក្រក់របស់លោក គី វុឌ្ឍី ត្រូវបានមន្ត្រីក្រោមឱវាទ បកអាក្រាតជាសាធារណៈ ព្រោះតែភាពអសកម្មរបស់លោក គី វុឌ្ឍី កើតមានរាប់សិបឆ្នាំមកហើយ មិនមានការកែទម្រង់ទាល់តែសោះ ដែលទាមទារឲ្យអាជ្ញាធរអគ្គិសនី មេត្តាចាប់អារម្មណ៍ ពីបញ្ហាបំណុលរដ្ឋរាប់ពាន់លានរៀល ក្នុងអង្គភាពអគ្គិសនីខេត្តព្រះសីហនុ ដែលត្រូវបានគេប្រើប្រាស់ ជាចំណាប់ខ្មាំងក្នុងការជំរិតទារលុយ ពីអ្នកជំពាក់បំណុលអគ្គិសនី។ ដោយឡែក លោក ឈឹម សឿន ជាប្រធានអគ្គិសនីទើបឡើងតំណែងថ្មី មេត្តាប្រុងប្រយ័ត្នឲ្យមែនទែន ប្រយ័ត្នដើរជាន់ដានចោរ ព្រោះលោក គី វុឌ្ឍី មានពុត្បុតអាក្រក់សម្បើមណាស់ ក្នុងការអនវុត្តយុទ្ធសាស្ត្រ ទម្លាក់កំហុសឲ្យអ្នកដទៃទទួលរងថ្មបាក់ បើមិនប្រុងប្រយ័ត្នទេ អាចនឹងត្រូវវ័ណ្ឌក ដោយសារតែកំណើននៃបំណុល ដែលម្ចាស់ទីតាំងកាស៊ីណូ សណ្ឋាគារ និងអាជីវកម្មធំៗបានជំពាក់៕