វេលាព្រលឹមស្រាងៗ នាថ្ងៃទី២៣ ខែតុលា ឆ្នាំ២០១៣នេះ សាច់ញាតិបានប្រទះឃើញសាកសពរបស់លោកតាសំណាក់ធម៌នៅភ្នំជីសូរម្នាក់ ដែលឃាតកបានសម្លាប់រួចហើយយកទៅកប់នៅខាងជើងវិហារវត្តភ្នំជីដូរ ឋិតក្នុងឃុំរវៀង ស្រុកសំរោង ខេត្តតាកែវ ដើម្បីបំបាត់ដាន ។
លោកតាសំណាក់ធម៌ដែលជាជនរងគ្រោះនោះ មានឈ្មោះថា ចាប តូច អាយុ៧៨ឆ្នាំ មានទីលំនៅភូមិដកពរ ឃុំរវៀង ស្រុកសំរោង ខេត្តតាកែវ និងបានមកសំណាក់ធម៌នៅភ្នំជីសូរ ។
ក្រុមគ្រួសារជនរងគ្រោះបានបំភ្លឺបញ្ជាក់ថា នៅមុនពេលកើតហេតុ គឺនៅល្ងាចថ្ងៃទី២២ ខែតុលា ឆ្នាំ២០១៣ ជនរងគ្រោះបានឡើងទៅលើភ្នំដើម្បីសំណាក់ធម៌ធម្មតាដូចសព្វដង ដោយនៅជាប់នឹងខ្លួនជនរងគ្រោះមានពាក់ចិញ្ចៀន១វង់ ទម្ងន់២ជី និងលុយចំនួន៤០ម៉ឺនរៀល ព្រមទាំងទូរស័ព្ទដែ១គ្រឿងផង ។ លុះដល់ព្រលឹមឈានចូលថ្ងៃទី២៣ ខែតុលា ឆ្នាំ២០១៣ ដោយមិនឃើញជនរងគ្រោះត្រឡប់មកលំនៅឋានវិញ ក្រុមគ្រួសារក៏នាំគ្នាទៅរកនៅកន្លែងសំណាក់ធម៌ តែមិនឃើញ ។ ដោយមានការសង្ស័យ សាច់ញាតិជនរងគ្រោះក៏បានបន្តនាំគ្នាដើររកជនរងគ្រោះ ក៏បានឃើញស្នាមដីនៅខាងជើងព្រះវិហារនៅលើកំពូលភ្នំជីសូរ ហើយក៏បានកាយមើល ស្រាប់ប្រទះឃើញសាកសពជនរងគ្រោះគួរឲ្យភ្ញាក់ផ្អើលតែម្តង ខណៈដែលទ្រព្យសម្បត្តិជាប់នឹងខ្លួនជនរងគ្រោះក៏បាត់បង់ដែរ ។
សមត្ថកិច្ចជំនាញបានធ្វើការសន្និដ្ឋានថា ជនរងគ្រោះត្រូវឃាតកសម្លាប់ប្លន់យកទ្រព្យសម្បត្តិ ដោយជនសង្ស័យមានគម្រោងគិតទុកជាមុន និងមានគ្នីគ្នាចាប់ពី២នាក់ឡើងទៅ ។ ជនរងគ្រោះត្រូវជនសង្ស័យវាយដោយវត្ថុរឹងចំក្បាលជាច្រើនកន្លែង ខណៈជនរងគ្រោះកំពុងសំណាក់ធម៌ និងក្រោយមកជនសង្ស័យក៏នាំគ្នាលើកយកសពទៅកប់បំបាត់ដានជាក្រោយ ។
កម្លាំងសមត្ថកិច្ចកំពុងបន្តស្រាវជ្រាវរកជនដៃដល់និងបក្ខពួកក្នុងអំពើឃាតកម្មនោះហើយ ដើម្បីយកមកផ្តន្ទាទោសតាមច្បាប់ ៕
Source from: www.dtn7.com
Post a Comment