យ៉ាងហោចណាស់មានចំនួន៨ករណីដែលពលទាហាននិងនាយទាហានឋិតនៅក្រោមឱវាទរបស់់លោកឧត្តមសេនីយ៍ឯកម៉មសំនាយទាហានជាន់ខ្ពស់នៃកងយោធពលខេមរភូមិន្ទអត្តលេខ០០២៥១២យ៉ាងហោចណាស់មានចំនួន៨ករណីដែលពលទាហាន និងនាយទាហានឋិតនៅក្រោមឱវាទរបស់់លោកឧត្តមសេនីយ៍ឯក ម៉ម សំ នាយទាហានជាន់ខ្ពស់នៃកងយោធពលខេមរភូមិន្ទ អត្តលេខ០០២៥១២ និងជានាយកខុទ្ទកាល័យអគ្គមេបញ្ជាការកងយោធពលខេមរភូមិន្ទ ដែលមានឯកឧត្តមនាយឧត្តមសេនីយ៍ផ្កាយមាស៤ ប៉ុល សារឿន ជាអគ្គមេបញ្ជាការ រិះគន់ទៅលើមេរបស់ខ្លួនថា ប្រព្រឹត្តអំពើពុករលួយ និងបក្ខពួកនិយម ។
ភាពអសកម្មរបស់លោកឧត្តមសេនីយ៍ឯក ម៉ម សំ ដែលទទួលរងការរិះគន់ពីនាយទាហាន និងពលទាហានក្រោមឱវាទនោះ ត្រូវបានគេហទំព័រសារព័ត៌មានដើមត្នោតធ្វើការចុះផ្សាយលាតត្រដាងជាសាធារណៈរួចម្តងមកហើយ កាលថ្ងៃទី០៨ ខែតុលា ឆ្នាំ២០១៣ ។
ប្រភពព័ត៌មានពីអគ្គបញ្ជាការដ្ឋានកងយោធពលខេមភូមិន្ទ បានឲ្យដឹងថា ក្រោយការចុះផ្សាយរបស់គេហទំព័រសារព័ត៌មានដើមត្នោតរួចមក កាលពីថ្ងៃទី១០ ខែតុលា ឆ្នាំ២០១៣ លោកឧត្តមសេនីយ៍ឯក ម៉ម សំ បានធ្វើការកោះប្រជុំកូនចៅក្រោមឱវាទ ដើម្បីសួររកមុខអ្នកផ្តល់ព័ត៌មានឲ្យកាសែតដើមត្នោតចុះផ្សាយអំពីរឿងអាស្រូវរបស់ខ្លួន ។
លើសពីនេះ ប្រភពព័ត៌មានដដែលបានឲ្យដឹងទៀតថា លោកឧត្តមសេនីយ៍ឯក ម៉ម សំ បាននិយាយសារភាពនៅចំពោះមុខទាហានជាង១០០នាក់ថា ខ្លួនគាត់ពិតជាបានបន្ថយឆ្នាំកំណើតពីឆ្នាំ១៩៥៥ កែមកជាឆ្នាំ១៩៥៧ គេចវេះពីការចូលនិវត្តន៍ប្រាកដមែន ។
នាយទាហាន និងពលទាហានក្រោមឱវាទលោកឧត្តមសេនីយ៍ឯក ម៉ម សំ បានលាន់មាត់ថា បើកកូនចៅថ្នាក់ក្រោមដែលមានឆ្នាំកំណើតត្រឹមឆ្នាំ១៩៥៥វិញ គឺលោកឧត្តមសេនីយ៍ឯក ម៉ម សំ រុញគេឲ្យចូលនិវត្តន៍ភ្លាម ប៉ុន្តែបើខ្លួនគាត់ជាមេ បែរជាលួចកែឆ្នាំកំណើត ដើម្បីមិនចង់ចូលនិវត្តន៍ ។ រីឯការសារភាពរបស់លោកឧត្តមសេនីយ៍ឯក ម៉ម សំ គឺជាព័ស្តុតាងមួយស្រាប់ទៅហើយដែលបញ្ជាក់ថា លោកឧត្តមសេនីយ៍ឯករូបនេះមានគំនិតទុច្ចរិតក្នុងការងារបម្រើជាតិមាតុភូមិ ក្នុងនាមជានាយទាហានជាន់ខ្ពស់មួយរូប ។
អ្នករងគ្រោះព្រោះអំពើអយុត្តិធម៌ទាំងឡាយដែលជានាយទាហាន និងពលទាហានក្រោមឱវាទលោកឧត្តមសេនីយ៍ឯក ម៉ម សំ បានសំណូមពរឲ្យក្រុមអធិការកិច្ចក្រសួងការពារជាតិ និងអង្គភាពប្រឆាំងអំពើពុករលួយដែលមានឯកឧត្តមបណ្ឌិត ឱម យ៉ិនទៀង ជាប្រធាន មេត្តាចុះស៊ើបអង្កេតស្រាវជ្រាវ និងចាត់ការទៅលើអំពើអសកម្មរបស់លោកឧត្តមសេនីយ៍ឯក ម៉ម សំ ផង ដើម្បីពង្រឹងកិត្យានុភាពកងយោធពលខេមភូមិន្ទ ។
លោក ម៉ម សំ នាយទាហានជាន់ខ្ពស់នៃកងយោធពលខេមរភូមិន្ទ អត្តលេខ០០២៥១២ បានឡើងឋានន្តរស័ក្តិជាឧត្តមសេនីយ៍ត្រី (ផ្កាយ១) ដោយព្រះរាជក្រឹត្យលេខនស/រកត/០៧០៧/២៧៦ ចុះថ្ងៃទី០៧ ខែកក្កដា ឆ្នាំ២០០៧ និងបានឡើងឋានន្តរស័ក្តិជាឧត្តមសេនីយ៍ទោ(ផ្កាយ២)ដោយព្រះរាជក្រឹត្យលេខ នស/រកត/០២០៩/១៧០ ចុះថ្ងៃទី១៦ ខែកុម្ភៈ ឆ្នាំ២០០៩ ហើយមកទល់បច្ចុប្បន្នបានឡើងឋានន្តរស័ក្តិជាឧត្តមសេនីយ៍ឯក(ផ្កាយ៣) ដោយព្រះរាជក្រឹត្យលេខ នស/រកត/០៧១១/៦៦៩ ចុះថ្ងៃទី១៧ ខែកក្កដា ឆ្នាំ២០១១ ៕
Source from: www.dtn7.com
Loading...
Post a Comment