រាជធានីភ្នំពេញ៖ប្រជាពលរដ្ឋបានលើកឡើងអំពីភាពមិនប្រក្រតីពាក់ព័ន្ធការស្នើសុំលិខិតបញ្ជាក់ទីតាំងអាជីវកម្មដែលបានដាក់ចូលសាលារាជធានីភ្នំពេញច្រើនខែមកហើយមិនទាន់ចេញរួចនៅឡើយទេរាជធានីភ្នំពេញ ៖ ប្រជាពលរដ្ឋបានលើកឡើង អំពីភាពមិនប្រក្រតីពាក់ព័ន្ធ ការស្នើសុំលិខិតបញ្ជាក់ទីតាំង អាជីវកម្មដែលបានដាក់ចូលសាលារាជធានីភ្នំពេញ ច្រើនខែមកហើយ មិនទាន់ចេញរួចនៅឡើយទេ មិនដឹងជាមានហេតុផលអ្វីព្រោះនៅពេលដាក់លិខិតសុំបញ្ជាក់ទីតាំង មានការបង់លុយទៅតាម ការតម្រូវរបស់ក្រុមមន្ត្រី នៃការិយាល័យរដ្ឋបាលរួចរាល់អស់ហើយ នៅតែយឺតយ៉ាវមិនទាន់ទទួលបានលិខិតបញ្ជាក់ទីតាំង យកមកប្រើប្រាស់ជាផ្លូវការនៅឡើយ ដែលទាមទារឲ្យលោក ប៉ា សុជាតិវង្ស អភិបាលរាជធានីភ្នំពេញ មេត្តាពិនិត្យមើលបញ្ហានេះឡើងវិញផង មិនគួរទុកឲ្យឯកសារបញ្ជាក់ទីតាំង កកស្ទះជាច្រើនខែ នាំឲ្យខូចខាតដល់ផលប្រយោជន៍ របស់អាជីវករនោះទេ។
ជាគោលការណ៍នៅពេល ប្រជាពលរដ្ឋត្រូវការបើកក្រុមហ៊ុន ភោជនីយដ្ឋាន ឬទីតាំងអាជីវកម្មផ្សេងៗ ត្រូវសុំច្បាប់ទៅកាន់សាលារាជធានីភ្នំពេញ ដែលក្នុងនោះត្រូវតែស្នើសុំលិខិតបញ្ជាក់ទីតាំង គឺត្រូវមានការបង់លុយ តាំងពីថ្នាក់សង្កាត់ ថ្នាក់ខណ្ឌ រហូតដល់សាលារាជធានីភ្នំពេញ អស់ច្រើនសន្ធឹកសន្ធាប់ ហើយទីបំផុតឯកសារទាំងនោះ ត្រូវយឺតយ៉ាវមិនដឹងជាមានមូលហេតុអ្វី ព្រោះលុយបង់សព្វគ្រប់អស់ហើយ ថែមទាំងបង់លើសពីតម្លៃដែលបានកំណត់ទៀតផង។ ក្រុមអាជីវករបានបញ្ជាក់ទៀតថា នៅពេលដែលមិនទាន់មាន ឯកសារគ្រប់គ្រាន់ពួកគេត្រូវបង្ខំចិត្ត ពន្យារពេលបើកហាងរកស៊ី ឬអាជីវកម្ម នាំឲ្យយឺតយូរ ខាតបង់ពេលវេលា ខាតឈ្នួលផ្ទះ ឈ្នួលដី យ៉ាងច្រើនសន្ធឹកសន្ធាប់ ដូច្នេះហើយបានជាពួកគេ សំណូមពរឲ្យអភិបាលរាជធានីភ្នំពេញ ជួយដោះស្រាយបញ្ហានេះឡើងវិញផង។
ប្រជាពលរដ្ឋខ្លះបានទៅសួរនាំ មន្ត្រីរដ្ឋបាលនៅសាលារាជធានីភ្នំពេញ សឹងសឹកផ្លូវទៅហើយ បើគិតពីថ្លៃផ្ញើម៉ូតូ ឬរថយន្តក៏ចំណាយមិនតិចដែរ ហើយមន្ត្រីរដ្ឋបាលបានត្រឹមតែឆ្លើយថា ឯកសារអត់ទាន់ធ្លាក់មកទេ ហើយនៅពេលសួរនាំញឹកញាប់ពេក ត្រូវមន្ត្រីរដ្ឋបាលប្រើសំដីអសុរោះ មិនស័ក្តិសមជាមន្ត្រីបម្រើ សេវាសាធារណៈនោះទេ។ ប្រជាពលរដ្ឋខ្លះទៀត ដែលក្លាហានហ៊ានសួរជជែកប្ញសគល់ ពីភាពជាប់គាំងនៃឯកសារ បញ្ជាក់ទីតាំងអាជីវកម្ម ត្រូវបានមន្ត្រីរដ្ឋបាលមួយចំនួន លួចបង្ហើបរឿងអាថ៌កំបាំង របស់ពួកគេដោយបញ្ជាក់ថា ចាប់តាំងពីមានការផ្លាស់ប្តូរ អភិបាលរាជធានីភ្នំពេញ ពោលគឺតាំងពីលោក ប៉ា សុជាតិវង្ស ឡើងជំនួសតំណែងលោក កែប ជុតិមា ក៏មានការជួបប្រជុំកែទម្រង់ បញ្ហាផ្ទៃក្នុងមួយចំនួនទើបនាំឲ្យ មានការកកស្ទះឯកសារមួយចំនួន នៅក្នុងការិយាល័យរដ្ឋបាល។
យ៉ាងណាក៏ដោយ ក្រុមអាជីវករជាច្រើនបានលើកជាចម្ងល់ថា តើលោក ប៉ា សុជាតិវង្ស ជាប់រវល់ការងារអ្វីខ្លះ បានជាមិនយកចិត្តទុកដាក់ដោះស្រាយបញ្ហានេះ ឲ្យបានទាន់ពេលវេលា ព្រោះក្រុមអាជីវករទាំងអស់ មិនអាចរង់ចាំលិខិតបញ្ជាក់ ទីតាំងដែលប្រើពេលរាប់ខែដូច្នេះទេ ហើយគួរតែមានការដោះស្រាយ បញ្ហាផ្ទៃក្នុងឲ្យបានឆាប់រហ័ស ថាតើប្រាក់ចំណូលដែលបានមកពី សេវាបញ្ជាក់ឯកសារផ្សេងៗ ត្រូវបង់ទៅណា ហើយនរណាជាអ្នកកាន់លុយពីផ្នែកនេះ គួររៀបចំធ្វើឲ្យបានច្បាស់លាស់ ដូចសម័យលោក កែប ជុតិមា។ គេមើលឃើញថា លោក ប៉ា សុជាតិ វង្ស ត្រូវការកែទម្រង់របៀបរបប ការងារមួយចំនួន ឬរៀបចំចាត់តាំងខ្សែទុយោ របស់គាត់ឲ្យកាន់ការងារសំខាន់ៗ ដើម្បីប្រមូលលុយកាក់ យកទៅចែកគ្នាច្រកហោប៉ៅ ក៏ផ្តើមឲ្យមានបញ្ហាយឺតយ៉ាវរំខានអារម្មណ៍ ក្រុមអាជីវករយ៉ាងខ្លាំង ព្រោះការស្នើសុំលិខិតបញ្ជាក់ទីតាំងអាជីវកម្ម មួយចំនួនត្រូវកកស្ទះដល់ទៅ ២ខែឯណោះ។
បាតុភាពដែលកំពុងកើតមាន ក្នុងការិយាល័យរដ្ឋបាល នៃសាលារាជធានីភ្នំពេញ ធ្វើឲ្យប្រជាពលរដ្ឋ និងក្រុមអាជីវករធុញទ្រាន់យ៉ាងខ្លាំង សមល្មមដល់ពេលកែទម្រង់ ឲ្យសមជាកន្លែងផ្តល់សេវាសាធារណៈ ឲ្យបានល្អប្រសើរសម្រាប់ប្រជាពលរដ្ឋ។ ក្នុងចំណោមភាពអសកម្ម នៅការិយាល័យរដ្ឋបាល គេសង្កេតឃើញមានការកោសរូស បង្ខំឲ្យប្រជាពលរដ្ឋ និងក្រុមអាជីវករបង់លុយលើសពីការកំណត់ សម្រាប់ការស្នើសុំលិខិតស្នាមផ្សេងៗ ហើយបើចង់បានលឿន ត្រូវចំណាយលុយច្រើន តែបើមិនមានលុយបង់ឲ្យមន្ត្រីរដ្ឋបាល ដែលកាន់ឯកសារនោះទេ គឺយឺតយ៉ាវរកលេខដាក់គ្មាន ដែលករណីខ្លះសឹងថា ឯកសារត្រូវជាប់គាំងរាប់ខែ ហើយរាល់ពេលទៅសួរនាំរកឯកសារ បើមានលុយក្រោមតុ បង់ឲ្យក្រុមមន្ត្រី អាចទទួលបានដំណឹងល្អ ពីឯកសារទាំងនោះ៕
Source from: watphnom-news.com
Loading...
Post a Comment