ក្រសួងមហាផ្ទៃ​និង​ក្រសួង​ព័ត៌មាន​គួរ​ពិចារណា​និង​មាន​វិធានការ​លើ​ករណី​កាំភ្លើង​ធ្លាក់​ក្នុង​ដៃ​អ្នកកាសែត​

10/17/2013 11:58:00 AM

មជ្ឈដ្ឋានជាតិនិងអន្តរជាតិមានការចាប់អារម្មណ៍យ៉ាងខ្លាំងទៅនឹងការផ្សព្វផ្សាយព័ត៌មានរបស់គេហទំព័រក្នុងស្រុកមួយឈ្មោះ Avatar News ដែលមាននិន្នាការគាំទ្រនយោបាយគណបក្សកាន់កាប់អំណាច ក្រោមចំណងជើងថា "ក្រុមគ្រូបង្រៀនកម្ពុជាឯករាជ្យប្រើហិង្សាទៅលើបុរសម្នាក់" ក្នុងខណៈដែលសមាគមគ្រូបង្រៀនកម្ពុជាឯករាជ្យ "CITA" ដឹកនាំដោយលោក រ៉ុង ឈុន រៀបចំកម្មវិធីជួបជុំប្រារព្ធទិវាគ្រូបង្រៀននៅទីលានប្រជាធិបតេយ្យ រាជធានីភ្នំពេញ កាលពីថ្ងៃទី១៣ ខែតុលា ឆ្នាំ២០១៣ម្សិលមិញនេះ ។

បន្ទាប់ពីបានផ្សព្វផ្សាយព័ត៌មានតាមរបៀបលៃលកឲ្យរហ័សទាន់ចិត្ត នាំឲ្យមានអ្នកចូលអានច្រើនសន្ធឹកសន្ធាប់ចង់គាំងវែបសាយរួចមក គេហទំព័រដដែលនេះបានចុះផ្សាយព័ត៌មានសាជាថ្មីរបស់ខ្លួន ក្រោមចំណងជើងថា "កងសន្តិសុខសមាគមគ្រូបង្រៀនកម្ពុជាឯករាជ្យប្រើហិង្សាទៅលើបុរសម្នាក់ដែលកាន់កាំភ្លើងចូលទីលានប្រជាធិបតេយ្យ" ។

តាមការចុះផ្សាយលើកទី២របស់គេហទំព័រដែលគាំទ្រគណបក្សប្រជាជនកម្ពុជាខាងលើនេះ បានបញ្ជាក់ថា បុរសដែលត្រូវបានគេប្រើអំពើហិង្សានោះមានឈ្មោះ ប៉ឹង ជឿន អាយុ៣៥ឆ្នាំ កាន់កាតកាសែតក្នុងអង្គភាពគេហទំព័រមង្គលរិទ្ធិ និងមានកាន់កាំភ្លើងផង ។

យោងតាមឯកសារជាព័ស្តុតាងបានបង្ហាញថា បុរសឈ្មោះ ប៉ឹង ជឿន ទទួលបានប័ណ្ណព័ត៌មានលេខ២១៨ /១៣ ចុះថ្ងៃទី១៣ ខែកក្កដា ឆ្នាំ២០១៣ "ផុតកំណត់នៅថ្ងៃទី១៣ ខែមីនា ឆ្នាំ២០១៤" ចេញដោយមន្ទីរព័ត៌មានរាជធានីភ្នំពេញ និងមានចុះហត្ថលេខាដោយឈ្មោះ ឃុត សំខាន់ ។ លើសពីនេះ បុរសឈ្មោះ ប៉ឹង ជឿន បានកាន់ប័ណ្ណសំគាល់ជាអ្នកតំណាងផ្នែកលក់ឲ្យក្រុមហ៊ុនមង្គលរិទ្ធិ អ៊ីមផត&អិចផត ខូអិលធីឌី "ផុតកំណត់នៅថ្ងៃទី០១ ខែធ្នូ ឆ្នាំ២០១៣"ទៀតផង ។

ចំណុចដែលគួរឲ្យចាប់អារម្មណ៍នៅក្នុងសាច់រឿងនេះ គឺត្រូវបានគេចោទជាសំណួរថា បើបុរសឈ្មោះ ប៉ឹង ជឿន ជាអ្នកកាសែតទទួលបានប័ណ្ណព័ត៌មានចេញដោយមន្ទីរព័ត៌មានរាជធានីភ្នំពេញ តើហេតុអ្វីបុរសរូបនេះមានសិទ្ធិប្រើប្រាស់អាវុធ ?

ការកត់សំគាល់ជាក់ស្តែងនាពេលកន្លងមក បានបង្ហាញឲ្យឃើញថា ពិតជាមានអ្នកកាន់ប័ណ្ណសារព័ត៌មាន ហើយមានកាន់អាវុធប្រាកដមែន ដែលអ្នកទាំងនោះជាអ្នកកាសែតមានឱកាសគាំទ្រផ្កាប់មុខឲ្យគណបក្សនយោបាយកាន់កាប់អំណាច និងជាអ្នកព័ត៌មានរបស់ស្ថាប័នរដ្ឋមួយចំនួនទៀត ដែលដើរតួជាអ្នកយកព័ត៌មានឲ្យអង្គភាពរបស់ខ្លួនផង និងជាអ្នកស៊ើបការណ៍ដែលគេនិយមហៅថា "ក្រុមភ្នាក់ងារស៊ើបយកការណ៍"ផង ។

ក្រុមមនុស្សចូលរួមក្នុងពិធីប្រារព្ធទិវាគ្រូបង្រៀនដឹកនាំដោយលោក រ៉ុង ឈុន បាននិយាយអះអាងថា ពួកគេត្រូវការសុវត្ថិភាពសម្រាប់អ្នកចូលរួមទាំងអស់ ជាពិសេសត្រូវបង្ការទុកជាមុនចំពោះអ្នកមានអាវុធជាតិផ្ទុះជាប់នឹងខ្លួន ។

សូមឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន នីតិកាលទី៥នៃរដ្ឋសភាគណបក្សប្រជាជនកម្ពុជា មេត្តាពិចារណានិងមានវិធានការទៅលើករណីកាំភ្លើងធ្លាក់ទៅក្នុងដៃអ្នកកាសែតនេះផង ពីព្រោះវាបានផ្តល់នូវផលប៉ះពាល់យ៉ាងខ្លាំងទៅលើការប្រកបវិជ្ជាជីវៈសារព័ត៌មាន និងសន្តិសុខជាតិទាំងមូល ៕