អាជីវករ​រិះគន់​មន្ត្រី​ពន្ធដារ​ថា​អត្រា​បង់ពន្ធ​ស្រេច​លើ​មាត់​និង​មិន​ស្មើភាព​គ្នា​

11/16/2013 05:00:00 AM

ការគណនាពន្ធលើអចលនវត្ថុក្តី លើសេវាកម្មលក់ដូរ និងលើសេវាកម្មសណ្ឋាគារ ផ្ទះសំណាក់ក្តី ពីសំណាក់មន្ត្រីពន្ធដារ ត្រូវបានក្រុមអាជីវករនិងប្រជាពលរដ្ឋរិះគន់ថា គឺស្រេចលើមាត់របស់មន្ត្រីពន្ធដារ និងគ្មានភាពស្មើគ្នាឡើយ ដោយលម្អៀងទៅលើការស្គាល់គ្នា បក្ខពួកនិយម ។

អាជីវករនៅរាជធានីភ្នំពេញម្នាក់បានលើកឡើងនូវរូបភាពអសកម្មរបស់មន្ត្រីពន្ធដារខណ្ឌចំការមន ដឹកនាំដោយលោក យិន ចន្ថាវុឌ្ឍ និងលោក ពៅ ដារ៉ា ទាក់ទងនឹងការបង់ពធន្ធលើសេវាកម្មផ្ទះសំណាក់ថា មន្ត្រីពន្ធដារខណ្ឌចំការមនបានបញ្ចូលការបង់ពន្ធផ្ទះសំណាក់របស់គាត់ដែលមានតែចំនួន៤បន្ទប់នោះ ឲ្យបង់តាមរបៀបស្វ័យប្រកាស តែគាត់មិនព្រម រួចហើយមន្ត្រីទាំងនោះតម្រូវឲ្យគាត់បង់ចំនួន៣.០០០ដុល្លារអាមេរិក ។ លើសពីនេះ លោក ពៅ ដារ៉ា បានតម្រូវឲ្យគាត់បង់ពន្ធទាំងអស់ ខណៈមិត្តភក្តិរបស់គាត់មួយចំនួនមានបន្ទប់ជួលច្រើនជាងគាត់ផង បែរជាបង់ពន្ធតិចជាងគាត់ទៅវិញ ពោលគឺមិនមានលក្ខណៈស្មើភាពគ្នា និងយុត្តិធម៌សម្រាប់អាជីវករទូទៅទេ ។

អាជីវកររូបនោះបានប្រាប់ឲ្យដឹងទៀតថា អ្នកមានផ្ទះសំណាក់ចាប់ពី១០បន្ទប់រហូតដល់៥០បន្ទប់ គឺក្រុមមន្ត្រីពន្ធដារខណ្ឌចំការមនតម្រូវឲ្យបង់ពន្ធខ្លះ និងលៃលកទុកក្រៅដាក់ហោប៉ៅខ្លះចំពោះអ្នកដែលមានទំនាក់ទំនងល្អជាមួយមន្ត្រីពន្ធដារ ។

ក្រុមអាជីវករបានសំណូមពរឲ្យមន្ត្រីពន្ធដារមេត្តាគណនាលើការបង់ពន្ធឲ្យមានភាពស្មើគ្នា និងយុត្តិធម៌ កុំលម្អៀងទៅតាមការស្គាល់គ្នា ឬបក្ខពួក និងផលប្រយោជន៍ឲ្យសោះ ។

សូមឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ធ្វើការស៊ើបអង្កេត និងមានវិធានការលើការណីដែលក្រុមអាជីវករ និងប្រជាពលរដ្ឋបានរអ៊ូររទាំ និងរិះគន់នេះផង ៕

Source from: www.dtn7.com