នគរ​បាល​​សេដ្ឋ​កិច្ច​​ខេត្ត​កំ​ពត​​ឈ្មោះ ឆាយ សុខា និង​​ឈ្មោះ គឹម ស៊ីថា បង្កើត​​​ប៉ុ​ស្តិ៍​​​​ជ​ជុះ នៅ​​​ផ្សារ​​ត្រ​ពាំង​រ​ពៅ បង្ខំ​​ឲ្យ​​អ្នក​រកស៊ី​​ដឹក​ទំ​និញ បង់​លុយ​​តាម​តែ​​ទំ​នើង​ចិត្ត​

11/25/2013 08:00:00 AM

ខេត្តកំពត៖ប្រជាពលរដ្ឋដែលរកស៊ីដឹកជញ្ជូនទំនិញកសិផលនិងផលនេសាទជាពិសេសក្រុមអ្នករត់តាក់ស៊ីបានត្អូញត្អែរថា

ខេត្តកំពត ៖ ប្រជាពលរដ្ឋដែលរកស៊ី ដឹកជញ្ជូនទំនិញកសិផល និងផលនេសាទ ជាពិសេស ក្រុមអ្នករត់តាក់ស៊ី បានត្អូញត្អែរថា នៅពេលបង្កបង្កើនផលបាន រួចដឹកយកទៅលក់បានតម្លៃថោក ហើយមានកុងត្រូលជជុះ តាមជំរិតទារលុយតាមដងផ្លូវ យ៉ាងច្រើនស្អេកស្កះ ជាពិសេសកុងត្រូលជជុះ ដុះស្លែមួយកន្លែង របស់ប៉ូលិសសេដ្ឋកិច្ចខេត្តកំពត ដែលមានទីតាំងនៅតាម ផ្លូវជាតិលេខ៣ ត្រង់ចំណុចមុខផ្សារ ត្រពាំងរពៅ ស្ថិតក្នុងភូមិត្រពាំងរពៅ ឃុំព្រែកត្នោត ស្រុកទឹកឈូ ខេត្តកំពត។

ក្រុមអ្នករត់តាក់ស៊ី មួយចំនួនបានរំលឹកថា សម្តេច ហ៊ុន សែន ធ្លាប់បានព្រមានខ្លាំងៗ ដល់កម្លាំងសមត្ថកិច្ច ដែលឈរជើងនៅតាម បណ្តោយផ្លូវជាតិទាំងអស់ ត្រូវតែលុបបំបាត់ ភាពអនាធិបតេយ្យក្នុងការដាក់កុងត្រូលជជុះ។ ប៉ុន្តែរហូតមកដល់ពេលនេះ នៅលើទឹកដីខេត្តកំពត គេសង្កេតឃើញ មានការដាក់កុងត្រូលជជុះ ជាច្រើនកន្លែង ផ្គើនទៅនឹងចំណាត់ការ របស់សម្តេច ហ៊ុន សែន ដោយមិនក្រែងញញើតអ្វីឡើយ។

ប្រជាពលរដ្ឋ និងអ្នករត់តាក់ស៊ីបានឲ្យដឹងថា ប៉ូលិសសេដ្ឋកិច្ចដែលដាក់កុងត្រូលជជុះ ចាំជំរិតយកលុយពីអ្នករកស៊ីដឹកទំនិញ បន្តិចបន្តួចនៅចំណុចផ្សារត្រពាំងរពៅនោះ មានឈ្មោះ ឆាយ សុខា និងឈ្មោះ គឹម ស៊ីថា បានបង្កើតស្នាក់ការ កុងត្រូលជជុះយូឆ្នាំមកហើយ ធ្វើឲ្យប្រជាពលរដ្ឋក្តៅក្រហាយ និងប៉ះ ពាល់សតិអារម្មណ៍ អ្នករកស៊ីដឹកទំនិញយ៉ាងធ្ងន់ធ្ងរ ហើយការដាក់កុងត្រូលជជុះ ចាំកាក់រថយន្តដឹកទំនិញ បង្ខំឲ្យបង់លុយតាមតែទំនើងចិត្ត ជាទង្វើដ៍អាក្រក់មួយ។

ក្រុមអ្នករកស៊ីដឹកទំនិញ បានរិះគន់ដល់ប៉ូលិស សេដ្ឋកិច្ចខេត្តកំពត ដែលកំពុងបន្តដាក់កុងត្រូលជជុះ បើទោះបីជារាជរដ្ឋាភិបាល បានប្រកាសលប់បំបាត់ សឹងរាប់ភ្លេចទៅហើយក៏ដោយ ហើយកុងត្រូលជជុះរបស់ ប៉ូលិសសេដ្ឋកិច្ច នៅចំណុចផ្សារត្រពាំងរពៅ តែងតែបានធ្វើសកម្មភាព ប្រដេញចាប់រថយន្តដឹកទំនិញ ដែលបើកបរឆ្លងកាត់តំបន់ ដែលពួកគេកាន់កាប់ ហើយភ្លេចចូលបង់លុយ ឬបង់លុយមិនគ្រប់ តាមការកំណត់របស់ពួកគេ។

ក្រុមអ្នករកស៊ីដឹកទំនិញបានរិះគន់ថា ការដាក់ស្នាក់ការកុងត្រូលជជុះនោះ គ្រាន់តែជាលេស ដែលនគរបាលសេដ្ឋកិច្ចខេត្តកំពត ប្រមូលផលប្រយោជ៍យកទៅ ច្រកហោប៉ៅធ្វើមានធ្វើបាន ផ្ទាល់ខ្លួនតែប៉ុណ្ណោះ។ ប្រជាពលរដ្ឋនិងអ្នករកស៊ីដឹកទំនិញ ទទូចសូមឲ្យអាជ្ញាធរខេត្ត មេត្តាចុះពិនិត្យនិងលប់បំបាត់ កុងត្រូលជជុះរបស់ ប៉ូលិសសេដ្ឋកិច្ចនៅចំណុចផ្សារ ត្រពាំងរពៅជាបន្ទាន់ ព្រោះកុងត្រូលជជុះមួយនេះបង្កផលប៉ះពាល់ សតិអារម្មណ៍របស់ ប្រជាពលរដ្ឋខ្លាំងសម្បើមណាស់៕ ដោយ អួង វឹង