ស្ត្រី​ម្នាក់​បាន​ស្លាប់បាត់​បង់ជីវិត​ក្រោយពេល​សម្រាលកូន​នៅ​មន្ទីរ​ពេ​ទ្យេ​ឯកជន​យីហោ ដឺ​លុ​ច្ស​

11/04/2013 05:00:00 AM

ស្ត្រីម្នាក់អាយុ៣៤ឆ្នាំ បានស្លាប់បាត់បង់ជីវិតយ៉ាងអាណោចអាធ័មក្រោយពេលសម្រាលកូនទី៤នៅក្នុងមន្ទីរពេទ្យឯកជនមួយមានយីហោឈ្មោះ ដឺលុច្ស ឋិតនៅបណ្តោយផ្លូវជាតិលេខ៥ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ដោយបន្សល់ទុកនូវទារកអាយុ១ថ្ងៃនិងកូនចំនួន៣នាក់ផ្សេងទៀតក្នុងបន្ទុកកំព្រាម្តាយរបស់ខ្លួន កាលពីថ្ងៃទី០៣ ខែវិច្ឆិកា ឆ្នាំ២០១៣ ម្សិលមិញនេះ ។

បុរសឈ្មោះជុច ប៊ុនឡៃ អាយុ៣៤ឆ្នាំ មានទីលំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ត្រូវជាប្តីរបស់រងគ្រោះដែលស្លាប់ក្រោយពេលសម្រាលកូននៅក្នុងមន្ទីរពេទ្យឯកជនដឺលុច្សនោះ បានរៀបរាប់ទាំងទឹកភ្នែកថា កាលពីថ្ងៃទី០២ ខែវិច្ឆិកា ឆ្នាំ២០១៣ ប្រពន្ធរបស់គាត់ឈ្មោះឡេង សោភ័ណ្ឌ បានឈឺពោះត្រូវសម្រាលកូនលើកទី៤ រួចក៏បានបញ្ជូនទៅមន្ទីរពេទ្យឯកជនយីហោ ដឺលុច្ស ដើម្បីសម្រាលកូនក្នុងតម្លៃ១៥០ដុល្លារអាមេរិក ។ ប៉ុន្តែពេលបញ្ជូនទៅដល់មន្ទីរពេទ្យឯកជននោះប្រពន្ធរបស់គាត់មិនទាន់សម្រាលកូនភ្លាមៗទេ ហើយដល់ថ្ងៃទី០៣ ខែវិច្ឆិកា ឆ្នាំ២០១៣ វេលាម៉ោង១៦ល្ងាចទើបប្រពន្ធគាត់ចាប់ផ្តើមឈឺពោះខ្លាំងនិងក៏សម្រាលកូននៅក្នុងមន្ទីរពេទ្យឯកជននេះ

បុរសត្រូវជាប្តីរបស់ស្ត្រីរងគ្រោះបានរៀបរាប់ទៀតថា ក្រោយសម្រាលកូនហើយបានមួយសន្ទុះ ស្រាប់តែប្រពន្ធរបស់គាត់មានអាការៈប្រកាច់ ថប់ដង្ហើម ស្រែកស្រវាស្រទេញឲ្យគាត់ជាប្តីជួយផងៗ ។ ភ្លាមៗនោះក្រុមគ្រូពេទ្យដែលបង្កើតទារកឲ្យប្រពន្ធរបស់គាត់បានអះអាងប្រាប់គាត់ថា មិនអីទេ ខណៈដែលស្ថានភាពរបស់ប្រពន្ធគាត់ចាប់ផ្តើមធ្ងន់ធ្ងរឡើងៗ ។ តមកទើបក្រុមគ្រួពេទ្យនៅមន្ទីរពេទ្យឯកជននេះសម្រេចបញ្ជូនប្រពន្ធគាត់មកកាន់មន្ទីរពេទ្យជប៉ុនដើម្បីសង្គ្រោះ ប៉ុន្តែជាអកុសល ប្រពន្ធគាត់បានដាច់ខ្យល់ស្លាប់បានត្រឹមបន្សល់ទុកនូវទារកទើបចាប់កំណើតបានមួយថ្ងៃមិនទាន់ស្គាល់មុខម្តាយប៉ុណ្ណោះ ។

លោកជុច ប៊ុនឡៃ ត្រូវជាប្តីរបស់ស្ត្រីរងគ្រោះនិងត្រូវជាឪពុកទើបចាប់កំណើតបានមួយថ្ងៃក៏កំព្រាម្តាយនោះបានសម្តែងនូវការខឹងសម្បាយ៉ាងខ្លាំងនិងចោទប្រកាន់ទៅលើក្រុមគ្រួពេទ្យនៃមន្ទីរពេទ្យឯកជនដឺលុច្សថា មានការធ្វេសប្រហែស មិនយកចិត្តទុកដាក់ទើបបណ្តាលឲ្យប្រពន្ធរបស់គាត់ស្លាប់បាត់បង់ជីវិតយ៉ាងអាណោចអាធ័មចោលកូននិងចោលរូបគាត់ ។

ដោយឡែក លោកស្រី ពេជ្រ ចន្តា ដែលជាពេទ្យឆ្មបបង្កើតទារកនិងលោកស្រី រ៉ុង នីរត្ន័ ប្រធានគណនេយ្យគ្លីនិកដឺលុច្ស បានអះអាងថា ទាក់ទងនឹងការសម្រាលកូនរបស់ស្ត្រីជាជនរងគ្រោះនោះ គឺក្រុមគ្រួពេទ្យបានខិតខំធ្វើការសម្រាលស្របតាមវិជ្ជាជីវៈរបស់គ្រូពេទ្យហើយៗ ក្រុមគ្រូពេទ្យក៏បានព្យាយាមសង្គ្រោះស្ត្រីរងគ្រោះយ៉ាងអស់ពីលទ្ធភាពនិងសមត្ថភាពផងដែរ៕

822417_n

Source from: www.dtn7.com