តុលាការ​សម្រេច​ដោះលែង​មន្ត្រីប៉ូលិស​ម្នាក់​ដែល​បើករថយន្ត​ដេញ​បុក​និង​វាយបំផ្លាញ​រថយន្ត​រប​ស់​គេ ឲ្យ​ឋិ​ត​នៅក្រៅ​ឃុំ​

11/04/2013 05:00:00 AM

មន្ត្រីនគរបាលម្នាក់ឈ្មោះជា ចាន់ណារ៉ា ភេទប្រុស អាយុ៣៣ឆ្នាំ បម្រើការងារនៅនាយកដ្ឋានទំនាក់ទំនងអន្តរជាតិនៃក្រសួងមហាផ្ទៃ ដែលក្លាយជាជនត្រូវចោទពីបទធ្វើឲ្យខូចខាតដោយចេតនាព្រោះតែបើករថយន្តដេញបុកនិងបំផ្លិចបំផ្លាញរថយន្តរបស់គេនោះត្រូវបានលោកជួន សុរាសី ជាចៅក្រមស៊ើបសួរសម្រេចដោះលែងឲ្យឋិតនៅក្រៅការឃុំខ្លួនហើយ នៅវេលាព្រឹកនាថ្ងៃទី០៤ ខែវិច្ឆិកា ឆ្នាំ២០១៣នេះ ។

យោងតាមពាក្យបណ្តឹងរបស់បុរសម្នាក់ឈ្មោះច័ន្ទ រ៉ាពិសិដ្ឋ បានឲ្យដឹងថា កាលពីថ្ងៃទី២៧ ខែកុម្ភៈ ឆ្នាំ២០១៣ វេលាម៉ោងប្រមាណ០៧ និង១៥នាទីព្រឹក ខ្លួនបានបើកបររថយន្តមួយគ្រឿងម៉ាក CRV ពណ៌ទឹកប្រាក់ ពាក់ស្លាកលេខភ្នំពេញ 2M-7810 តាមបណ្តោយផ្លូវព្រះមុនីរ៉េត ពីចំណុចស្ថានីយ៍ប្រេងឥន្ធនៈសូគីម៉ិច «ច្រមុះជ្រូកផ្លូវចម្ការដូង» ឆ្ពោះមកស្ទឹងមានជ័យ ។ លុះបើកបរមកដល់ផុតព្រំប្រទល់ភូមិដំណាក់ធំបានបន្តិច ស្រាប់តែឈ្មោះជា ចាន់ណារ៉ា បើកបររថយន្តមួយគ្រឿងម៉ាក កាមរីបាឡែន ពាក់ស្លាកលេខភ្នំពេញ 2T-3856 ដេញបុករថយន្តរបស់ខ្លួន រួចហើយក៏បានចុះពីលើរថយន្តស្ទុះទៅវាយរថយន្តរបស់ខ្លួនតែម្តងធ្វើឲ្យបែកកញ្ចក់ខាងមុខនិងខូចខាតផ្លិតទឹកទាំងស្រុង ។លើសពីនេះឈ្មោះ ជា ចាន់ណារ៉ា ដែលជាមន្ត្រីនគរបាលជាតិបានស្ទុះចូលទៅក្នុងរថយន្តទាញកាំភ្លើងខ្លីមួយដើមមិនស្គាល់ម៉ាកដើរសំដៅមករកខ្លួន ប៉ុន្តែត្រូវបានសមត្ថកិច្ចចាប់ឃាត់ខ្លួនជា ចាន់ណារ៉ា បញ្ជូនទៅកាន់ប៉ុសិ៍្តនគរបាលរដ្ឋបាលស្ទឹងមានជ័យទាន់ពេលវេលា ។

បន្ទាប់ពីទទួលបានពាក្យបណ្តឹងរបស់ឈ្មោះច័ន្ទ រ៉ាពិសិដ្ឋ នោះ តំណាងអយ្យការអមសាលាដំបូងរាជធានីភ្នំពេញ គឺលោកហៀង សុភក្ត្រ បានបើកការចោទប្រកាន់ទៅលើឈ្មោះជា ចាន់ណារ៉ា ពីបទធ្វើឲ្យខូចខាតដោយចេតនា ។

ប្រភពព័ត៌មានពីសាលាដំបូងរាជធានីភ្នំពេញបានឲ្យដឹងថា ការណ៍ដែលនាំឲ្យលោកជួន សុរាសី ជាចៅក្រមស៊ើបសួរក្នុងសំណុំរឿងព្រហ្មទណ្ឌនេះសម្រេចដោះលែងមន្ត្រីប៉ូលិសជាជនត្រូវចោទឈ្មោះជា ចាន់ណារ៉ា នោះ គឺដោយសារដើមបណ្តឹងរដ្ឋប្បវេណីបានសម្របសម្រួលគ្នាដកពាក្យបណ្តឹងឈប់ប្តឹងផ្តល់វិញ ដោយមន្ត្រីប៉ូលិសជាជនត្រូវចោទសងសំណងការខូចខាតឲ្យទៅជនរងគ្រោះជាដើមបណ្តឹងរដ្ឋប្បវេណី ។

មជ្ឈដ្ឋានអ្នកតាមដានដំណើរការកំណែទម្រង់ច្បាប់និងប្រព័ន្ធយុត្តិធម៌នៅកម្ពុជាបានលើកឡើងថា ជារឿយៗក្នុងរឿងព្រហ្មទណ្ឌប្រសិនបើជនត្រូវចោទឬជនជាប់ចោទជាអ្នកមានលុយនិងមានអំណាច តែងតែទទួលបានការបន្ធូរដៃពីសំណាក់តុលាការ ប៉ុន្តែប្រសិនបើជនត្រូវចោទឬជនជាប់ចោទជាជនក្រីក្រ តូចតាចវិញនោះទោះបីដើមបណ្តឹងរដ្ឋប្បវេណីដកពាក្យបណ្តឹងហើយក៏ដោយ ក៏តុលាការមិនប្រើប្រាស់ឆន្ទានុសិទ្ធិរបស់ខ្លួនសម្រេចដោះលែងជនត្រូវចោទដែលកំពុងជាប់ឃុំខ្លួនឲ្យមានសេរីភាពវិញដែរ ៕

Source from: www.dtn7.com