អ្នកភូមិ​ប្រទះឃើញ​សាកសព​ស្ត្រី​ម្នាក់​នៅក្នុង​ព្រៃ​ស្បូវ​

11/04/2013 05:00:00 AM

សាកសពស្ត្រីម្នាក់ដែលមានសភាពហើមស្អុយទៅហើយត្រូវបានអ្នកភូមិប្រទះឃើញនៅក្នុងព្រៃស្បូវ ខណៈអ្នកភូមិទៅកាប់ឆ្ការព្រៃក្នុងចម្ការរបស់ខ្លួន រួចហើយក៏បានរាយការណ៍ប្រាប់ទៅសមត្ថកិច្ចបណ្តាលឲ្យមានមនុស្សភ្ញាក់ផ្អើលទៅចោមរោមមើលយ៉ាងកកកុញណែនណាន់តាន់តាប់។

ហេតុការណ៍ប្រទះឃើញសាកសពនេះ បានកើតមានឡើងកាលពីវេលាម៉ោងប្រមាណ១៦ និង៣៥នាទីល្ងាច នាថ្ងៃទី០៣ ខែវិច្ឆិកា ឆ្នាំ២០១៣ ម្សិលមិញ ឋិតនៅភូមិទួលប្រាសាទ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

សាកសពស្ត្រីនោះត្រូវបានគេស្គាល់ថា មានឈ្មោះ លី សាលាត អាយុ៤៥ឆ្នាំ រស់នៅភូមិកើតហេតុ និងមានស្រុកកំណើតនៅភូមិក្តុល ឃុំក្តុល ស្រុកបាវិល ខេត្តបាត់ដំបង និងមានប្តីឈ្មោះ សន កុសល អាយុ៤៥ឆ្នាំ រស់នៅភូមិកើតហេតុ។

បុរសជាប្តីរបស់ស្ត្ររងគ្រោះបានប្រាប់ឲ្យដឹងថា ប្រពន្ធរបស់គាត់បានបាត់ពីផ្ទះចាប់តាំងពីថ្ងៃទី២៤ ខែតុលា ឆ្នាំ២០១៣ មកម្ល៉េះ រហូតមកដល់ពេលនេះទើបដឹងថាបានស្លាប់បាត់បង់ជីវិតទៅហើយ ដោយមិនដឹងមូលហេតុ។

សមត្ថកិច្ចកំពុងធ្វើកោសលវិច័យ និងស្រាវជ្រាវរកមូលហេតុនៃការស្លាប់របស់ស្ត្រីរងគ្រោះនេះហើយ៕

Source from: www.dtn7.com