នៅវេលាព្រឹកនាថ្ងៃទី០៤ ខែវិច្ឆិកា ឆ្នាំ២០១៣នេះ ក្រុមប្រឹក្សាជំនុំជម្រះសាលាឧទ្ធរណ៍បានប្រកាសសាលដីកាវិនិច្ឆ័យសម្រេចតម្កល់សាលក្រមសាលាដំបូងខេត្តស្វាយរៀងនិងចេញដីកាបង្គាប់ឲ្យចាប់ខ្លួនជនជាប់ចោទឈ្មោះឈូក បណ្ឌិត អតីតអភិបាលក្រុងបាវិត ខេត្តស្វាយរៀង ដែលបានបាញ់ប្រហារបណ្តាលឲ្យកម្មការិនីរោងចក្រផលិតស្បែកជើងកៅវ៉េ ចំនួន៣នាក់រងរបួសធ្ងន់ធ្ងរសឹងបាត់បង់ជីវិតកាលពីថ្ងៃទី២០ ខែកុម្ភៈ ឆ្នាំ២០១២កន្លងមក ។
សូមបញ្ជាក់ថា កាលពីថ្ងៃទី២៥ ខែមិថុនា ឆ្នាំ២០១៣ សាលាដំបូងខេត្តស្វាយរៀងបានវិនិច្ឆ័យសេចក្តីសម្រេចផ្តន្ទាទោសជនជាប់ចោទឈ្មោះឈូក បណ្ឌិត ដាក់ពន្ធនាគារចំនួន១៨ខែ និងបង្គាប់ឲ្យបង់ប្រាក់ចំនួន៣៨លានរៀល ឲ្យទៅដើមបណ្តឹងរដ្ឋប្បវេណី ជាកម្មការិនីរងគ្រោះចំនួន៣នាក់ ពីបទបង្ករបួសស្នាមដោយអចេតនា និងក៏បានដីកាបង្គាប់ឲ្យចាប់ខ្លួនជនជាប់ចោទឈ្មោះឈូក បណ្ឌិតផងដែរ ប៉ុន្តែអស់រយៈពេលជិត០៦ខែមកហើយ សមត្ថកិច្ចមិនទាន់ស្វែងរកចាប់ខ្លួនជនជាប់ចោទឈ្មោះឈូក បណ្ឌិត យកមកផ្តន្ទាទោសដាក់ពន្ធនាគារបាននៅឡើយ ។
មជ្ឈដ្ឋានអ្នកតាមដានកិច្ចកំណែទម្រង់ច្បាប់និងប្រព័ន្ធយុត្តិធម៌នៅកម្ពុជាបានសម្តែងនូវការអបអរសាទរចំពោះការវិនិច្ឆ័យសេចក្តីរបស់សាលាឧទ្ធរណ៍ ប៉ុន្តែមជ្ឈដ្ឋានដដែលនេះបានសម្តែងនូវការព្រួយបារម្ភខ្លាចក្រែងសមត្ថកិច្ចមិនមានជំហរម៉ឺងម៉ាត់ក្នុងការស្វែងរកតាមចាប់ខ្លួនជនជាប់ចោទឈ្មោះឈូក បណ្ឌិត តាមអំណាចសាលដីកានិងដីកាបង្គាប់ឲ្យចាប់ខ្លួនរបស់សាលាឧទ្ធរណ៍ ។
គេមិនទាន់ដឹងច្បាស់ថា ជនជាប់ចោទឈ្មោះឈូក បណ្ឌិត នឹងបន្តប្តឹងសាទុក្ខទៅតុលាការកំពូលប្រឆាំងនឹងសាលដីកាសាលាឧទ្ធរណ៍ទៀតឬយ៉ាងណានោះទេ ៕
Source from: www.dtn7.com
Loading...
Post a Comment