ប្រភពព័ត៌មានពីក្រុងប៉ោយប៉ែត ខេត្តបន្ទាយមានជ័យ បានឲ្យដឹងថា កាលពីថ្ងៃទី១០ ខែវិច្ឆិកា ឆ្នាំ២០១៣កន្លងទៅថ្មីៗនេះ មានបុរសម្នាក់អាយុជាង៣០ឆ្នាំ ឈ្មោះ វី មុខរបរជាជាងមាសនៅផ្សារត្រី បានជួបហេតុការណ៍គ្រោះថ្នាក់ចរាចរណ៍ ហើយត្រូវបានក្រុមគ្រួសារជនរងគ្រោះបញ្ជូនទៅព្យាបាលនៅគ្លីនិកឯកជនមួយឈ្មោះ "គ្លីនិកផ្សារអគ្គៈ" ឋិតនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដែលមានទីតាំងក្បែរកន្លែងកើតហេតុគ្រោះថ្នាក់ចរាចរណ៍ ប៉ុន្តែជាអកុសល បុរសរងគ្រោះនោះក៏ស្លាប់បាត់បង់ជីវិត និងក៏ត្រូវក្រុមគ្រួសារសាច់ញាតិជនរងគ្រោះដឹកសាកសពយកទៅបូជានៅស្រុកកំណើតឯខេត្តកំពង់ចាម ។
អ្នកធ្លាប់ចូលទៅពិនិត្យព្យាបាលជំងឺនៅគ្លីនិកផ្សារអគ្គៈនោះ បានឲ្យដឹងថា ព័ត៌មានមនុស្សស្លាប់ក្រោយការវះកាត់ព្យាបាលនៅគ្លីនិកនេះ មិនមានការបែកធ្លាយចេញមកក្រៅភ្លាមៗទេ គឺដោយសារម្ចាស់គ្លីនិកផ្សារអគ្គៈបានបង់ប្រាក់សំណងចំនួន៥.០០០ដុល្លារអាមេរិក ជូនទៅក្រុមគ្រួសារជនរងគ្រោះរួចហើយ ។
លោក ឌិត ឌីណា ជាម្ចាស់គ្លីនិកផ្សារអគ្គៈ និងជាមន្ត្រីពេទ្យបម្រើការងារនៅក្នុងមន្ទីរពេទ្យបង្អែកក្រុងប៉ោយប៉ែតផងដែរនោះ បានបដិសេធទៅនឹងព័ត៌មានដែលថា គ្លីនិករបស់លោកមានការវះកាត់ព្យាបាលជំងឺនោះ ។
ដោយឡែកលោក កែវ សុភត្រា ប្រធានមន្ទីរសុខាភិបាលខេត្តបន្ទាយមានជ័យ បានទទួលស្គាល់ថា ករណីនេះលោកពិតជាបានឮដែរ តែអ្នកជំងឺបានស្លាប់ក្រោយពេលចូលព្យាបាលរយៈពេល១សប្តាហ៍ ហើយការស្លាប់នោះអាចមិនមែនជាកំហុសបច្ចេកទេសរបស់ពេទ្យនៅគ្លីនិកផ្សារអគ្គៈទេ គឺអាចមកពីជំងឺផ្សេង ឬរបួសជនរងគ្រោះមានសភាពធ្ងន់ធ្ងរពេក ។
ដូច្នេះ ការលើកឡើងរវាងលោកប្រធានមន្ទីរសុខាភិបាលខេត្តបន្ទាយមានជ័យ និងម្ចាស់គ្លីនិកផ្សារអគ្គៈ គឺខុសគ្នាស្រឡះលើករណីមានមនុស្សស្លាប់នៅគ្លីនិកឯកជនមួយនេះ ក្រោយពេលមានការវះកាត់ព្យាបាលអ្នកជំងឺ ៕
Source from: www.dtn7.com
Loading...
Post a Comment