អង្គភាប្រឆាំងអំពើពុករលួយដែលមានឯកឧត្តមបណ្ឌិត ឱម យ៉ិនទៀង ជាប្រធាន បន្ទាប់ពីទទួលបានពាក្យបណ្តឹងរបស់និវត្តន៍ជនអតីតគ្រូបង្រៀនជាច្រើនរូបនៅស្រុកស្រីសន្ធរ ខេត្តកំពង់ចាម ពាក់ព័ន្ធនឹងការមិនបើកប្រាក់សោធននិវត្តន៍កាលពីឆ្នាំ២០១២កន្លងមកនោះ បានរកឃើញថា មន្ត្រីការិយាល័យសង្គមកិច្ចស្រុកស្រីសន្ធរ ខេត្តកំពង់ចាម មានការជាប់ពាក់ព័ន្ធទៅនឹងរឿងអាស្រូវពុករលួយមិនបើកប្រាក់សោធននិវត្តន៍នេះជូននិវត្តន៍ជនអតីតគ្រូបង្រៀន ។
សេចក្តីប្រកាសព័ត៌មានចុះថ្ងៃទី១៥ ខែវិច្ឆិកា ឆ្នាំ២០១៣ របស់អង្គភាពប្រឆាំងអំពើពុករលួយ បានបញ្ជាក់ថា អង្គភាពប្រឆាំងអំពើពុករលួយបានរកឃើញថា ការិយាល័យសង្គមកិច្ចស្រុកស្រីសន្ធរ ខេត្តកំពង់ចាម មិនបានបើកប្រាក់សោធននិវត្តន៍ជូនដល់និវត្តន៍ជនអតីតគ្រូបង្រៀន ព្រមទាំងបានក្លែងបន្លំស្នាមខ្ចៅដៃនិវត្តន៍ជនអតីតគ្រូបង្រៀនទាំងនោះទៀតផង ។ លើសពីនេះ ការិយាល័យសង្គមកិច្ចស្រុកស្រីសន្ធរមិនបានបើកប្រាក់សន្ទស្សន៍បៀវត្សរ៍មូលដ្ឋាន និងប្រាក់បំណាច់ជីវភាពចំនួន២០.០០០រៀលក្នុង១ខែ របស់សម្តេចនាយករដ្ឋមន្ត្រីក្នុងឆ្នាំ២០១០ដល់និវត្តន៍ជនដទៃជាច្រើនថែមទៀត ។
ក្រុមនិវត្តន៍ជនអតីតគ្រូបង្រៀននៅស្រុកស្រីសន្ធរ ខេត្តកំពង់ចាម បានសំណូមពរចំពោះឯកឧត្តមបណ្ឌិត ឱម យ៉ិនទៀង ប្រធានអង្គភាពប្រឆាំងអំពើពុករលួយ និងឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា មេត្តាមានវិធានការឲ្យបានតឹងរ៉ឹងទៅលើមន្ត្រីពុករលួយនៅការិយាល័យសង្គមកិច្ចស្រុកស្រីសន្ធរ ខេត្តកំពង់ចាម ទាំងនោះផង ។
មជ្ឈដ្ឋានអ្នកវិភាគកិច្ចការសង្គមនៅកម្ពុជា បានលើកឡើងថា អំពើពុករលួយទាក់ទងនឹងការស៊ីដាច់ប្រាក់សោធននិវត្តន៍របស់និវត្តន៍ជននានា បានកើតមានឡើងយ៉ាងកក្រើករាប់ឆ្នាំមកហើយ ក្រោមការដឹកនាំរបស់ឯកឧត្តម អ៊ិត សំហេង អតីតរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា រហូតភ្ញាក់ផ្អើលដល់ក្រសួងសេដ្ឋកិច្ចនិងហិរញ្ញវត្ថុរួចម្តងមកហើយ ។ ដូច្នេះ ប្រសិនបើអង្គភាពប្រឆាំងអំពើពុករលួយមានឆន្ទៈបង្ការ និងបង្ក្រាបអំពើពុករលួយមែននោះ គប្បីធ្វើការស៊ើបអង្កេតស្រាវជ្រាវ និងចាត់ការមន្ត្រីពុករលួយនៅគ្រប់ស្រទាប់ទាំងអស់ ដោយមិនត្រូវចាត់ការតែទៅលើមន្ត្រីថ្នាក់ក្រោមៗ ហើយឲ្យមន្ត្រីថ្នាក់លើមានអំណាចទទួលលុយពីមន្ត្រីថ្នាក់ក្រោមបានរួចខ្លួននោះឡើយ ៕
Source from: www.dtn7.com
Loading...
Post a Comment