ខេត្តកំពង់ធំ៖មន្ត្រីរាជការបុគ្គលិកនៃមន្ទីរអភិវឌ្ឍន៍ជនបទខេត្តកំពង់ធំបានធ្វើការរិះគន់យ៉ាងខ្លាំងចំពោះចំណាត់ការខេត្តកំពង់ធំ ៖ មន្ត្រីរាជការ បុគ្គលិក នៃមន្ទីរអភិវឌ្ឍន៍ជនបទ ខេត្តកំពង់ធំ បានធ្វើការរិះគន់យ៉ាងខ្លាំង ចំពោះចំណាត់ការ មិនប្រក្រតីមួយចំនួន របស់លោក ឈួរ សុធា ដែលជាប្រធានមន្ទីរ ពាក់ព័ន្ធនឹងការប្រើប្រាស់ថវិកា សម្រាប់ថែទាំ និងជួសជុលផ្លូវឆ្នាំ២០១៣ រួមទាំងថវិកា ដែលជារបបបេសកកម្ម របស់មន្ត្រីក្រោមឱវាទ ក៏ត្រូវបានលោកប្រធានមន្ទីរ ស៊ីដាច់គ្មានសេសសល់អ្វីឡើយ ហើយជាញឹកញាប់ បានយកតួនាទី និងសិទ្ធិអំណាចមកគំរាមកំហែង មន្ត្រីថ្នាក់ក្រោម មិនឲ្យលូកលាន់ការងារ ចាយលុយខុសខ្ទង់ របស់គាត់ថែមទៀតផង។
គ្រាន់តែភាពមិនប្រក្រតីតូចមួយ ទាក់ទងនឹងការចំណាយ ថវិកាថែទាំនិងជួសជុលផ្លូវ សម្រាប់ឆ្នាំ២០១៣ ដែលមានទឹកប្រាក់ ប្រមាណ ៣៥០ លានរៀល ដែលលោក ឈួរ សុធា មិនអនុវត្តតាមគោលការណ៍នៃការចំណាយ ធ្វើអ្វីស្រេចតែអំពើចិត្ត។ តាមប្រភពពីមន្ត្រីតូចតាចបានឲ្យដឹងថា ថវិកាប្រមាណ ៣៥០ លានរៀល គឺជាថវិកាសម្រាប់ថែទាំ និងជួសជុលផ្លូវ ឆ្នាំ២០១៣ ប៉ុន្តែលោក ឈួរ សុធា បានសម្រេច ដោយអត្តនោម័ត យកថវិកានេះ ទៅធ្វើផ្លូវបេតុងថ្មីមួយខ្សែ ដែលមានប្រវែង ៤៥៩ ម៉ែត្រ និងទទឹង ៤,៥០ ម៉ែត្រ នៅឃុំអាចារ្យលាក់ ក្រុងស្ទឹងសែនទៅវិញ ។
ប៉ុន្តែអ្វីដែលបង្ហាញ នូវភាពមិនប្រក្រតី ជាងនេះទៀតនោះ គឺផ្លូវបេតុងថ្មីមួយខ្សែនោះ បានកសាងរួចហើយ ហើយតម្លៃឬការចំណាយ អាស្រ័យដោយលោក ឈួរ សុធា រួមទាំងក្រុមការងាររបស់គាត់ ឃុបឃិតគ្នាសម្រេច និងរៀបចំឯកសារ ។ ការស្ថាបនាផ្លូវនេះ ក៏មិនបានធ្វើលទ្ធកម្ម ដាក់ឲ្យដេញថ្លៃ តាមគោលការណ៍នោះទេ ប៉ុន្តែពេលធ្វើរួចរាល់ហើយ ទើបលោក ឈួរ សុធា រៀបចំឯកសារក្លែងបន្លំ អំពីការដាក់ឲ្យដេញថ្លៃ ដើម្បីរាយការណ៍មកថ្នាក់លើ ហើយរឿងបែបនេះ មិនមែនកើតមានម្តងនេះទេ ប៉ុន្តែជារឿយៗ លោក ឈួរ សុធា តែងតែអនុវត្តដូច្នេះ ធ្វើឲ្យមន្ត្រីជាច្រើន មិនសប្បាយចិត្ត។
មន្ត្រីរាជការ បុគ្គលិក នៃមន្ទីរអភិវឌ្ឍន៍ជនបទខេត្តកំពង់ធំ បានទាមទារឲ្យអភិបាលខេត្ត ឬថ្នាក់ក្រសួងពាក់ព័ន្ធ ស្រាវជ្រាវករណីខាងលើ ដើម្បីកែប្រែរបៀបរបប ធ្វើការងាររបស់លោក ឈួរ សុធា រួមទាំងកំហុសឆ្គងរបស់គាត់ ដែលនាំឲ្យជៈឥទ្ធិពលមិនល្អ ដល់ការដឹកនាំ របស់រាជរដ្ឋាភិបាល អាណត្តិទី៥ ដែលកំពុងយកការកែទម្រង់ជាអាទិភាព។ ក្រៅពីភាពមិនប្រក្រតីខាងលើនេះ លោក ឈួរ សុធា បានកិបកេងប្រាក់បេសកកម្ម និងរបបប្រេងរបស់មន្ត្រីថ្នាក់ក្រោម ដោយគ្មានការយោគយល់អ្វីឡើយ ដូចជាប៉ុន្មានឆ្នាំកន្លងមកនេះ លោក ឈួរ សុធា មិនបានបើករបបទាំងអស់នោះ ដល់ថ្នាក់ក្រោម ឬការិយាល័យតាមស្រុកទាំង ៨ ឡើយ គឺគាត់ប្រមូលយកតែម្នាក់ឯង៕
Source from: watphnom-news.com
Loading...
Post a Comment