រាជធានីភ្នំពេញ៖នគរបាលប្រឆាំងការជួញដូរមនុស្សនិងការពារអនីតិជនបានឃាត់ខ្លួនក្រុមមេខ្យល់ចំនួន៣នាក់នៅព្រលានយន្តហោះអន្តរជាតិភ្នំពេញរាជធានីភ្នំពេញ ៖ នគរបាលប្រឆាំងការជួញដូរមនុស្ស និងការពារអនីតិជន បានឃាត់ខ្លួនក្រុមមេខ្យល់ចំនួន ៣នាក់ នៅព្រលានយន្តហោះ អន្តរជាតិភ្នំពេញ កាលពីវេលាម៉ោង ១២និង១០ នាទីរសៀលថ្ងៃទី០៣ ខែវិច្ឆិកា ឆ្នាំ២០១៣ខណៈដែលពួកគេបានរៀបចំ នាំស្ត្រីក្រមុំ ៤នាក់ហោះហើរចេញពីកម្ពុជា ទៅស្វែងរកប្តី នៅប្រទេសចិន តាមរូបភាពជួញដូរ ឬឆបោក។
ប្រតិបត្តិការនោះទទួលបានការអនុញ្ញាត ពីលោក មាស ច័ន្ធពិសិដ្ឋ ព្រះរាជអាជ្ញារង អមសាលាដំបូងរាជធានីភ្នំពេញ។ កម្លាំងជំនាញបានធ្វើការស៊ើបអង្កេត និងតាមដានជាច្រើនខែមកហើយ បន្ទាប់ពីទទួលបានព័ត៌មាន ស្តីពីការជួញដូរមនុស្ស ទៅកាន់ប្រទេសចិន រហូតឈានដល់ការឃាត់ខ្លួន មេខ្យល់ ៣នាក់ និងនារីៗជាកូនខ្មែរ ៤នាក់ គ្រាដែលពួកគេកំពុងរៀបចំ ឡើងយន្តហោះចេញទៅប្រទេសចិន។
សកម្មភាពនៃការជួញដូរនារីខ្មែរ ទៅរកស្វាមីនៅប្រទេសចិននោះ មានក្រុមហ៊ុនមួយជាអ្នករៀបចំ ការ ស្វែងគូស្រករ ដោយទទួលនារីពីប្រទេសកម្ពុជា និងបណ្តាប្រទេសផ្សេងៗទៀត។ បន្ទាប់មកទើបមានបុរសចិនជាអ្នកមកមើល បើគេឃើញហើយពេញចិត្ត នារីណាម្នាក់នោះ ក្រុមហ៊ុននឹងចាត់ចែង រៀបចំអាពាហ៍ពិពាហ៍ឲ្យតែម្តង។ ក្រុមមេខ្យល់មួយចំនួន បានព្យាយាមដើរអូសទាញ លួងលោមនារីខ្មែរ យកទៅឲ្យក្រុមហ៊ុនមួយនេះ ជាថ្នូរនឹងកម្រៃ ជើងសារផ្សេងៗ។
ជនសង្ស័យជាមេខ្យល់ ដែលត្រូវបានឃាត់ខ្លួនមានឈ្មោះ តាំង សារឿន ហៅធី ភេទស្រី អាយុ ៤៦ឆ្នាំ មុខរបរធ្វើស្រែ រស់នៅភូមិ-ឃុំតាអុង ស្រុកចំការលើ ខេត្តកំពង់ចាម, ឈ្មោះ ម៉ក់ ហៀងរិទ្ធី ហៅ ឡូវ ហ្នឹងគង ភេទប្រុស អាយុ ៣១ឆ្នាំ រស់នៅភូមិ-ឃុំកំពង់អំពិល ស្រុកពារាំង ខេត្តព្រៃវែង និងម្នាក់ទៀត ឈ្មោះ អ៊ី ឡៅ ហៅ ឡោ ភេទស្រី អាយុ ៦៥ឆ្នាំ ជាកសិករ រស់នៅភូមិ-ឃុំ ថ្នល់បែក ស្រុកចំការ ខេត្តកំពង់ចាម៕
Source from: watphnom-news.com
Loading...
Post a Comment