គេហទំព័រដ៏ល្បីមួយរបស់វៀតណាមបានចាប់ផ្តើមធ្វើការរិះគន់យ៉ាងខ្លាំងទៅលើតារាចម្រៀង ព្រាប សុវត្ថិ ដែលជាតារាចម្រៀងល្បីឈ្មោះប្រចាំផលិតកម្មរស្មីហង្សមាស ក្នុងរឿងលួចចម្លងបទចម្រៀងជាច្រើនបទពីប្រទេសវៀតណាមអស់រយៈពេលជាច្រើនឆ្នាំមកហើយនោះ។
តាមការចុះផ្សាយរបស់គេហទំព័រ 24h.com.vn នាថ្ងៃទី០៦ ខែវិច្ឆិកា ឆ្នាំ២០១៣ កន្លងទៅថ្មីៗនេះ បានបញ្ជាក់ឲ្យដឹងថា មានតារាចម្រៀងខ្មែរ និងផលិតកម្មរបស់ខ្មែរជាច្រើនបានលួចចម្លងបទចម្រៀងរបស់វៀតណាមសឹងតែទាំងដុល ជាពិសេសគឺតារាចម្រៀងល្បីប្រចាំផលិតកម្មរស្មីហង្សមាសលោក ព្រាប សុវត្ថិ តែម្តង។
គេហំព័រវៀតណាម បានលើកយកបទ I am Sorry គឺជាបទចម្រៀងវៀតណាមដ៏មានប្រជាប្រិយភាពបំផុតបកស្រាយដោយតារាចម្រៀង Khanh Phuong ប៉ុន្តែបទចម្រៀង I am Sorry ដដែលនេះត្រូវបានយកមកបកស្រាយបន្តដោយតារាចម្រៀងខ្មែរ ព្រាប សុវត្ថិ ហើយក៏បានក្លាយជាបទចម្រៀងដ៏ល្បីនៅប្រទេសកម្ពុជាទៅវិញ។
យោងតាមព័ស្តុតាងបានបង្ហាញថា បទចម្រៀង I am Sorry ដែលបកស្រាយដោយតារាចម្រៀងវៀតណាម Khanh Phuong ត្រូវបាន Post នៅក្នុងគេហទំព័រ Youtube នាថ្ងៃទី១០ ខែវិច្ឆិកា ឆ្នាំ២០០៩ ដែលទទួលបានចំនួន៤៣.៧៧៧ Views ។ រីឯបទចម្រៀង I am Sorry ដដែលតែបកស្រាយដោយតារាចម្រៀងខ្មែរ ព្រាប សុវត្ថិ ត្រូវបាន Post នៅក្នុងគេហទំព័រ Youtube នាថ្ងៃទី១៦ ខែកញ្ញា ឆ្នាំ២០១០ ដែលទទួលបានចំនួន២៣.៧២៦ Views ហើយក៏ទទួលបាននូវការរិះគន់យ៉ាងខ្លាំងពីប្រជាជនវៀតណាមចាប់តាំងពី១ឆ្នាំមុនមកម្ល៉េះ ដោយប្រជាជនវៀតណាមចោទប្រកាន់ថា ខ្មែរលួចចម្លងបទចម្រៀងពីវៀតណាម។
តាមការកត់សម្គាល់ជាក់ស្តែងបានបង្ហាញថា មិនមែនមានតែបទចម្រៀង I am Sorry ប៉ណ្ណោះទេ សូម្បីតែបទចម្រៀង «អ្នកណានាំអូនមក» និងបទចម្រៀងជាច្រើនទៀតដែលបកស្រាយដោយតារាចម្រៀង ព្រាប សុវត្ថិ ក៏ទទួលរងការរិះគន់ពីប្រជាជនវៀតណាមថា ខ្មែរលួចចម្លងបទចម្រៀងពីវៀតណាមដែរ។
មជ្ឈដ្ឋានអ្នកស្រឡាញ់ចូលចិត្តវិស័យសិល្បៈ បានលើកឡើងថា ម្ចាស់ផលិតកម្មមួយចំនួនមិនបានគិតគូរដល់តម្លៃសិល្បៈវប្បធម៌ និងកិត្យានុភាពប្រទេសជាតិទេ គឺពួកគេតែងគិតជាសំខាន់ទៅលើប្រាក់ចំណូលទើបផលិតកម្មក្រុមហ៊ុនទាំងនោះមិនសូវពង្រឹងស្នាដៃការតែងនិពន្ធបទចម្រៀងខ្លួនឯង បែរជាប្រឹងលួចចម្លងស្នាដៃពីគេសឹងគ្រប់ប្រទេស ដូចជា ថៃ ឥណ្ឌា កូរ៉េ វៀតណាម… ។ល។ ស្រួលៗតែម្តង ពីព្រោះមិនបាច់ចំណាយលុយច្រើនលើការតែងនិពន្ធខ្លួនឯង៕
Source from: www.dtn7.com
Loading...
Post a Comment