ខេត្តកំពង់ធំ៖រថយន្តដឹកឈើគ្រញូងមួយគ្រឿងត្រូវបានឈ្មួញដុតឆាបឆេះយ៉ាងសន្ធោរសន្ធៅទាំងកណ្ដាលយប់នៅក្បែរស្នាក់ការសន្តិសុខលេខ៦០១លើកំណាត់ផ្លូវជាតិលេខ៦ខេត្តកំពង់ធំ ៖ រថយន្តដឹកឈើគ្រញូងមួយគ្រឿង ត្រូវបានឈ្មួញដុត ឆាបឆេះយ៉ាងសន្ធោរសន្ធៅ ទាំងកណ្ដាលយប់ នៅក្បែរស្នាក់ការសន្តិសុខលេខ៦០១ លើកំណាត់ផ្លូវជាតិលេខ៦ ត្រង់ចំណុច ភូមិជ័យជំនះ ឃុំកកោះ ស្រុកសន្ទុកខេត្តកំពង់ធំ កាលពីវេលាម៉ោង ៨និង៥០ នាទីយប់ថ្ងៃទី០៤ ខែវិច្ឆិកា ឆ្នាំ២០១៣ បន្ទាប់ពីសមត្ថកិច្ចដេញចាប់បាន ហើយចរចាបង់លុយមិនត្រូវគ្នា បង្កឲ្យមានការភ្ញាក់ផ្អើល ប្រជាពលរដ្ឋនៅក្បែរនោះ។
មុនពេលកើតហេតុគេឃើញមន្ត្រីម្នាក់ ជិះរថយន្តឆ្លាម ពណ៌ត្រីឆ្លូញ បានប្រដេញរថយន្តដឹកឈើ ល្មើសច្បាប់ ដោយបើកខោកគ្នាទៅវិញទៅមក ដូចក្នុងខ្សែភាពយន្ត តាំងពីទីរួមខេត្ត រហូតមកចំណុចកើតហេតុ និងបានកៀរថយន្តដឹកឈើទម្លាក់ផ្លូវ ។ ក្រោយមកគេបានឮមានការជជែក តថ្លៃគ្នាមួយសន្ទុះ ស្រាប់តែឃើញមានអណ្ដាតភ្លើង ឆាបឆេះចេញពីរថយន្តដឹកឈើសន្ធោសន្ធៅ ដោយគ្មាននរណាជួយ ពន្លត់នោះឡើយ។
មួយសន្ទុះក្រោយមកលោក សុទ្ធ ម៉ារី នាយផ្នែករដ្ឋបាលព្រៃឈើកំពង់ថ្ម បានចុះទៅដល់និងបាននាំកម្លាំងជួយពន្លត់ ដែលនៅទីបំផុតរថយន្តនោះ ឆាបឆេះសល់តែគ្រោងឆ្អឹងផ្នែកខាងមុខ និងដុំឈើគ្រញូងជាច្រើនក៏ត្រូវឆេះខ្លោច។ គ្រោងឆ្អឹងរថយន្តនិងឈើគ្រញូង ត្រូវបានជំនាញរដ្ឋបាលព្រៃឈើ យកមករក្សាទុក នៅខណ្ឌរដ្ឋបាល ព្រៃឈើកំពង់ធំ ដែលមានចំនួន ៣២ដុំ ស្មើនិង ០,៦៣៣ ម៉ែត្រគូប៕
Source from: watphnom-news.com
Loading...
Post a Comment