រាជធានីភ្នំពេញ ៖ រឿងរ៉ាវដ៏ក្តៅគគុកទាក់ទិន នឹងការបំផ្លាញព្រៃឈើ ក្នុងតំបន់ទំនប់វារីអគ្គិសនី សេសាន២ លើផ្ទៃដីទំហំ ៣៦០០០ ហិកតា និងព្រៃឈើនៅក្បែរតំបន់នោះ នៅតែជាសំណួរដ៏ស្មុគ្រស្មាញ ហើយរដ្ឋមន្ត្រីក្រសួង កសិកម្ម លោក អ៊ុក រ៉ាប៊ុន មិនទាន់បានបំភ្លឺតប ទៅកាន់ទីស្តីការគណៈរដ្ឋមន្ត្រី នៅឡើយទេ មិនដឹងជាមានរឿងរ៉ាវ អាថ៌កំបាំងអ្វី ព្រោះគេដឹងថា មានកំពូលឧកញ៉ាចំនួន ៣នាក់ ដែលមានឥទ្ធិពលជាន់ដីស្រុកខ្មែរផ្អៀង មានជំពាក់ជំពិនយ៉ាងវែងអន្លាយ ជាមួយការកាប់បំផ្លាញ ឈើប្រណីតយ៉ាងអនាធិបតេយ្យ ដោយជ្រកក្រោមអាជ្ញាប័ណ្ណ វិនិយោគអាងទំនប់វារី អគ្គិសនីសេសាន២ ដូច្នេះរាជរដ្ឋាភិបាលគួរតែ ធ្វើការស៊ើបអង្កេតឲ្យបានគ្រប់ជ្រុងជ្រោយ ដើម្បីនាំខ្លួនមេឈ្មួញខិលខូច ទាំងនោះទៅផ្តន្ទាទោសតាមច្បាប់។
មន្ត្រីជាន់ខ្ពស់ម្នាក់ បានបង្ហើបឲ្យដឹងថា មានសេចក្តីរាយការណ៍ ជាបន្តបន្ទាប់ទាក់ទិន នឹងការកាប់បំផ្លាញព្រៃឈើ ក្នុងតំបន់បាតអាង ទំនប់វារីអគ្គិសនី ក្នុងស្រុកសេសាន ខេត្តស្ទឹងត្រែង ឈានដល់ការកាប់បំផ្លាញ ឈើប្រណីតនៅជុំវិញតំបន់នោះ ប្រមូលយកមកដាក់ នៅក្នុងតំបន់ស្តារបាតអាង ទំនប់វារីអគ្គិសនី ដើម្បីនាំចេញទៅលក់ នៅក្រៅប្រទេស ទើបរដ្ឋាភិបាលសម្រេច ចេញសេចក្តីជូនដំណឹងមួយ កាលពីថ្ងៃទី១៣ ខែវិច្ឆិកា ឲ្យផ្អាកការប្រមូល អនុផលព្រៃឈើ ដែលកាប់នៅក្នុងអាងស្តុកទឹក នៃគម្រោងវារីអគ្គិសនី សេសានក្រោម២។ លិខិតរបស់គណៈរដ្ឋមន្ត្រី បានលើកឡើងថា សំណង់វារីអគ្គិសនីមិនទាន់ចាប់ផ្តើម សាងសង់នៅឡើយទេ បែរជាមានការកាប់បំផ្លាញព្រៃឈើ និងការប្រមូលទិញឈើ នៅជុំវិញតំបន់បាតអាង ស្តុកទឹកយ៉ាងអនាធិបតេយ្យ ផ្ទុយពីគោលការណ៍ របស់រាជរដ្ឋាភិបាល។
លិខិតរបស់គណៈរដ្ឋមន្ត្រី ក៏បានសុំឲ្យរដ្ឋមន្ត្រី ក្រសួងកសិកម្ម ធ្វើរបាយការណ៍ឡើងវិញ អំពីការអនុវត្តសេចក្តីជូនដំណឹង របស់រដ្ឋាភិបាល ជុំវិញការផ្អាកសកម្មភាព កាប់បំផ្លាញ និងដឹកជញ្ជូនឈើ ចេញពីតំបន់ស្តារបាតអាង ទំនប់វារីអគ្គិសនី សេសានក្រោម២ ដែលអនុវត្តន៍ដោយក្រុមហ៊ុន Ang & associates lawyers Co.,Ltd ប៉ុន្តែមកដល់ពេលនេះ លោក អ៊ុក រ៉ាប៊ុន មិនទាន់បំភ្លឺតបទៅវិញទេ។ មានការបញ្ជាក់ផងដែរថា ជាគោលការណ៍សម្រាប់ ការសាងសង់ទំនប់វារីអគ្គិសនីមុនៗ គឺត្រូវកំណត់តំបន់លិចទឹក មុនពេលដាក់ឲ្យដេញថ្លៃ ដើម្បីកាប់ឈើនិងសម្អាតបាតអាង ទន្ទឹមពេលដែលសំណង់វារីអគ្គិសនី ចាប់ផ្តើមសាងសង់ ទើបគេអនុវត្តន៍ការកាប់ឈើ ដើម្បីបោសសម្អាតបាតអាងតាមក្រោយ។
ប៉ុន្តែសម្រាប់ទំនប់វារីអគ្គិសនី សេសានក្រោម២ នេះ ធ្វើខុសពីគោលការណ៍ របស់រាជរដ្ឋាភិបាលទាំង ៣ចំណុច ពិសេសត្រង់ចំណុចទី១ និងទី៣ គឺមិនទាន់កំណត់ទីតាំង និងមិនទាន់បានសាងសង់ វារីអគ្គិនៅឡើយទេ បែរជានាំគ្នាកាប់ឈើលក់ យ៉ាងអនាធិបតេយ្យ មិនដឹងជាមានមូលហេតុអ្វី។ យ៉ាងណាក៏ដោយ គេលើកជាចម្ងល់ថា ក្រុមហ៊ុន វិនិយោគ សាងសង់ទំនប់វារីអគ្គិសនី សេសានក្រោម២ ជាក្រុមហ៊ុនធ្វើនំអត់ម្សៅ ព្រោះថា គេកាប់ឈើប្រណីត យកទៅលក់ដូរ ដើម្បីយកលុយមកអភិវឌ្ឍន៍តាមក្រោយ ដែលរហូតមកដល់ពេលនេះ អត់ទាន់បានធ្វើអ្វីសោះ ក្រៅពីកាប់ឈើលក់ ហើយគេចាំបានថាក្រុមហ៊ុន Royal Group របស់លោកឧកញ៉ា គិត ម៉េង បានចុះអនុស្សរណៈយោគយល់គ្នា ជាមួយក្រុមហ៊ុនចិនមួយឈ្មោះ Hauneng សម្រាប់ការផ្តល់ហិរញ្ញវត្ថុ រយៈពេល២ឆ្នាំ។
ក្រោយមកទៀតក្រុមហ៊ុន Royal Group ក៏បានចុះកិច្ចព្រមព្រៀង ជាមួយក្រុមហ៊ុនយួន ដ៏ធំមួយក្នុងការស្តារបាតអាង ប៉ុន្តែក្រុមហ៊ុននោះ មានភាពយឺតយ៉ាវអនុវត្តន៍ការងារ មិនបានគ្រប់ជ្រុងជ្រោយ ដោយសារតែកត្តាផ្សេងៗ ស្រាប់តែក្រុមហ៊ុន Royal Group បង្វែរមកចុះកិច្ចព្រមព្រៀង ជាមួយក្រុមហ៊ុនមួយទៀត របស់ឧកញ៉ា លឹម ប៊ុណ្ណា ហៅខ្នា ដែលមានឈ្មោះ ឈន់ និងឈ្មោះ សាន ចយ ជាមេការ ផ្តើមឲ្យមានការកាប់បំផ្លាញ ព្រៃឈើយ៉ាងវិនាសហិនហោចតែម្តង។ គេដឹងថា ក្រុមហ៊ុន Ang & associates lawyers Co.,Ltd បានចុះកិច្ចព្រមព្រៀង វិនិយោគរួមគ្នា ជាមួយលោក សុខ វណ្ណា ដែលជាប្អូនប្រុសបង្កើត របស់ឧកញ៉ា សុខ គង់ ដើម្បីឈូសឆាយតំបន់ បាតអាងទំនប់វារីអគ្គិសនីសេសានក្រោម២ ដែលមានទំហំដល់ទៅ ៣៦០០០ហិកតា ក្នុងគម្រោងទឹកប្រាក់ ៨១៦លានដុល្លារ សម្រាប់ការសាងសង់ ទំនប់វារីអគ្គិសនី។
សរុបយ៉ាងខ្លីមកគឺ កំពូលឧកញ៉ាចំនួន ៣នាក់ រួមមានមេឈ្មួញ លឹម ប៊ុណ្ណា ហៅខ្នា មេឈ្មួញ សុខ វណ្ណា និងលោកឧកញ៉ា គិត ម៉េង បានឃុបឃិតគ្នា កាប់បំផ្លាញឈើប្រណីត នៅក្នុងតំបន់បាតអាង និងប្រមូលទិញឈើ ពីក្រៅតំបន់បាតអាង យកទៅលក់ផ្ទុយពី គោលការណ៍របស់រាជរដ្ឋាភិបាល ក្នុងការសាងសង់ទំនប់វារីអគ្គិសនី បង្កើតឲ្យមានបាតុភាពចម្រូងចម្រាស រហូតដល់ពេលនេះ។ នៅក្រោមរូបភាពនៃការ កាប់បំផ្លាញព្រៃឈើ យ៉ាងអនាធិបតេយ្យ ដែលមានឧកញ៉ា លឹម ប៊ុណ្ណា ហៅខ្នា និងមានឈ្មោះ សាន ចយ ជាមេការ បានធ្វើឲ្យប៉ះពាល់ ដល់មុខមាត់ លោកឧកញ៉ា គិតម៉េង ហើយបញ្ហានេះ គេវាយតម្លៃថា លោកឧកញ៉ា គិតម៉េង ក៏បានរួមចំណែកខុសផងដែរ ទើបអ្វីៗអាចដំណើរការដោយរលូនល្អ រហូតដល់មានបញ្ហា ទើបរាជរដ្ឋាភិបាលសម្រេច ប្រកាសដកហូតអាជ្ញាប័ណ្ណ ដើម្បីបញ្ឈប់ការកាប់បំផ្លាញព្រៃឈើ ដ៏រាលដាលនៅតំបន់នោះ៕
Source from: watphnom-news.com
Loading...
Post a Comment