Share ព័ត៌មាន​គេហទំព័រ​កំណើត​ថ្មី​ក្លែមសម្តី​ក្នុង ​Facebook​ ត្រូវ​ប៉េអឹម​ឃាត់ខ្លួន​នៅ​ស្ទឹងត្រែង​

11/20/2013 05:00:00 AM

អ្នកលេងFacebookម្នាក់ដោយប្រើAccountឈ្មោះ Cheth Sovichea ត្រូវបានអាវុធហត្ថខេត្តស្ទឹងត្រែងធ្វើការឃាត់ខ្លួនយកមកសាកសួរនៅវេលាព្រឹកថ្ងៃទី២០ ខែវិច្ឆិកា ឆ្នាំ២០១៣នេះ ក្រោយទម្ងន់នៃបណ្តឹងរបស់លោកស័ក្តិ៥ អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែងចោទប្រកាន់ពីបទបរិហារកេរ្តិ៍ និងផ្សាយព័ត៌មានមិនពិត បន្ទាប់ពីយុវជនរូបនេះShareព័ត៌មានពីគេហទំព័រមួយឈ្មោះ «កំណើតថ្មី-kntnews.com» ដែលមានចំណងជើងថា «លេចលឺថា PM ខេត្តស្ទឹងត្រែងចាប់ម៉ូតូអត់ពន្ធហើយដោះលែងជាថ្នូរ២០០ដុល្លារក្នុងម៉ូតូ១គ្រឿង» ដែលបានចុះផ្សាយកាលពីថ្ងៃទី១២ ខែវិច្ឆិកា ឆ្នាំ២០១៣កន្លងមក ។

យុវជនឈ្មោះ ចិត្រ សុវិជ្ជា អាយុ២៣ឆ្នាំ ជាបុគ្គលិកក្រុមហ៊ុនទូរស័ព្ទចល័តម៉ូប៊ីថែល មានទីលំនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង ជាអ្នកលេងFacebook ដោយប្រើAccountឈ្មោះ Cheth Sovichea ដែលត្រូវសមត្ថកិច្ចអាវុធហត្ថខេត្តស្ទឹងត្រែងធ្វើការឃាត់ខ្លួនយកមកសាកសួរនេះ គឺដោយសារបានShare ព័ត៌មានមួយពីគេហទំព័រឈ្មោះ កំណើតថ្មី-kntnews.com មានចំណងជើងថា «លេចលឺថា PM ខេត្តស្ទឹងត្រែងចាប់ម៉ូតូអត់ពន្ធហើយដោះលែងជាថ្នូរ២០០ដុល្លារក្នុងម៉ូតូ១គ្រឿង» និងក្លែមសម្តី«Comment» នៅក្នុងTimeline របស់ខ្លួនថា «មកដើម្បីកើបលុយ,ប្រើប្រាស់សំដីបាតផ្សារ,មិននឹកស្មានថា ឋានៈខ្ពស់តែសំដីមិនស្មើធូលី,ឆាប់ចេញពីខេត្តនេះទៅ!» ធ្វើឲ្យប៉ះពាល់ដល់កិត្តិយសរបស់មេបញ្ជាការកងរាជអាវុធហត្ថខេត្តស្ទឹងត្រែង ។

មជ្ឈដ្ឋានអ្នកច្បាប់បាននិយាយថា ត្រឹមពាក្យComment ក្នុងTimeline របស់យុវជន ចិត្រ សុវិជ្ជា ដែលប៉ះពាល់បន្តិចបន្តួចដល់កិត្តិយសលោកមេបញ្ជាការកងរាជអាវុធហត្ថខេត្តស្ទឹងត្រែងនោះ នឹងមិនមានទោសទណ្ឌដល់ថ្នាក់ជាប់គុកច្រវាក់អ្វីទេ ប៉ុន្តែនៅចំណុចមួយទៀត គឺត្រង់ថា ការផ្សាយព័ត៌មានមិនពិតរឿងយកលុយពីការចាប់ម៉ូតូអត់ពន្ធ…។ ទោះយ៉ាងណាក៏ដោយ យុវជនរូបនេះបានត្រឹមShare ព័ត៌មានបន្តពីគេហទំព័រមួយឈ្មោះ កំណើតថ្មីប៉ុណ្ណោះ ដូច្នេះ ប្រសិនបើមេបញ្ជាការកងរាជអាវុធហត្ថខេត្តស្ទឹងត្រែងយល់ថា ជាការផ្សាយព័ត៌មានមិនពិតនោះ គឺត្រូវជម្រះបញ្ជីជាមួយអ្នកគ្រប់គ្រងគេហទំព័រ កំណើតថ្មី ជាមុនសិន មិនត្រូវចាត់ការក្តៅគគុកមកលើយុវជន ចិត្រ សុវិជ្ជា ដែលជាអ្នកលេងFacebook ឡើយ ។

ប្រភពព័ត៌មានចុងក្រោយបានឲ្យដឹងថា យុវជន ចិត្រ សុវិជ្ជា (Cheth Sovichea) ត្រូវបានមន្ត្រីអាវុធហត្ថខេត្តស្ទឹងត្រែង អនុញ្ញាតឲ្យមកលំនៅឋានវិញហើយនៅវេលាល្ងាចនេះ បន្ទាប់ពីបានសូមអភ័យទោសចំពោះកំហុសឆ្គងដែលខ្លួនបានធ្វើទៅលើលោក មេបញ្ជាការកងរាជអាវុធហត្ថខេត្តស្ទឹងត្រែងនោះ។ ការសុំអភ័យទោស និងសារភាពកំហុសឆ្គងទាំងឡាយ ត្រូវបានយុវជនអ្នកលេង Facebook រូបនេះ Post ក្នុង Status របស់ខ្លួនរួចហើយ។ ប៉ុន្តែ គេមិនទាន់ដឹងនៅឡើយទេថា លោកមេបញ្ជាការកងរាជអាវុធហត្ថខេត្តស្ទឹងត្រែង នឹងបន្តចាត់ការយ៉ាងណាទៅលើអ្នកគ្រប់គ្រងគេហទំព័រកំណើតថ្មី ដែលជាមេនាំភ្លើងនោះទេ៕