ថៅកែ​រោងចក្រ SL ប្តឹង​លោក អាត់ ធន់ មេ​សហជីព ស៊ីខាវ​ឌូ និង​គូកន ទៅ​តុលាការ​ក្នុង​បទល្មើស​ហិង្សា​ដោយ​ចេតនា​

11/13/2013 05:01:00 AM

លោកអាត់ ធន់ ដែលគេស្គាល់ថា ជាប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា «ស៊ីខាវឌូ» និងជាសមាជិកគណៈកម្មការប្រឹក្សាការងារ «LAC» និងគូកនព្រមទាំងកម្មកររោងចក្រ SL ចំនួន៩នាក់ ផ្សេងទៀតត្រូវបានថៅកែរោងចក្រ SL Garment Processing (Cambodia) Ltd. គឺលោក Wong Hon Ming ជាជនជាតិសិង្ហបុរីប្តឹងទៅអយ្យការអមសាលាដំបូងរាជធានីភ្នំពេញកាលពីថ្ងៃទី០៦ ខែវិច្ឆិកា ឆ្នាំ២០១៣ ដោយចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋមានស្ថានទម្ងន់ទោស, បទហិង្សាដោយចេតនាដោយមានស្ថានទម្ងន់ទោស និងពីបទធ្វើឲ្យខូចខាតដោយចេតនាដោយមានស្ថានទម្ងន់ទោសប្រព្រឹត្តនាថ្ងៃទី០៨ ខែសីហា ដល់ថ្ងៃទី០៥ ខែវិច្ឆិកា ឆ្នាំ២០១៣ នៅក្នុងចំណុចរោងចក្រ SL1 និង SL2។

លោក Wong Hon Ming អគ្គនាយកក្រុមហ៊ុន SL បានប្រកាសឲ្យដឹងថា សកម្មភាពធ្វើកូដកម្មមិនឈប់ឈររបស់លោកអាត់ ធន់ និងគូកននោះធ្វើឲ្យរោងចក្រខាតបង់ថវិកាអស់ជាង១៥លានដុល្លារអាមេរិក។

សូមបញ្ជាក់ជូនថា គូកនរបស់លោកអាត់ ធន់ និងក្រុមកម្មកររោងចក្រ SL មួយចំនួនទៀតធ្លាប់បានទទួលរងការចោទប្រកាន់ពីបទធ្វើឲ្យខូចខាតដោយចេទនាមានស្ថានទម្ងន់ទោសរួចមកហើយ ដោយតំណាងអយ្យការអមសាលាដំបូងរាជធានីភ្នំពេញ ពោលគឺជាប់ឈ្មោះជាជនត្រូវចោទនៅស្ថាប័នតុលាការព្រហ្មទណ្ឌ យោងតាមបណ្តឹងចុះថ្ងៃទី១២ ខែសីហា ឆ្នាំ២០១៣ របស់ថៅកែរោងចក្រ SL។

ទោះយ៉ាងណា វិវាទរ៉ាំរ៉ៃរវាងកម្មករ និយោជិត ដឹកនាំដោយលោកអាត់ ធន់ និងថៅកែរោងចក្រ SL ដែលមានរយៈពេលជាង៣ខែ កន្លងមកនោះមិនឃើញមានដំណោះស្រាយអ្វីឲ្យចេញជាផ្លែផ្កាឡើយ ថ្វីដ្បិតមានការអន្តរាគមន៍ដោះស្រាយដោយស្ថាប័នតុលាការចេញដីកាសម្រេចរក្សាការពារ, ក្រុមប្រឹក្សាអាជ្ញាកណ្តាលចេញសេចក្តីបង្គាប់ និងគណៈកម្មការដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញាដែលមានឯកឧត្តម អ៊ិត សំហេង ជាប្រធានក៏ដោយ៕

Source from: www.dtn7.com