ការរៀបចំប្រារព្វទិវាសិទ្ធិមនុស្សអន្តរជាតិខួបលើកទី៦៥ ថ្ងៃទី១០ ខែធ្នូ ឆ្នាំ២០១៣ នេះ នៅព្រះរាជាណាចក្រកម្ពុជា ទទួលបានការចាប់អារម្មណ៍យ៉ាងខ្លាំង ដោយសារមានព្រះសង្ឃ និងប្រជាពលរដ្ឋនិមន្ត និងធ្វើដំណើរដោយថ្មើរជើងតាមរូបភាពជាធម្មយាត្រា និងសិទ្ធិយាត្រា ពីតាមបណ្តាខេត្តនានាមកចូលរួមជួបជុំគ្នា នៅរាជធានីភ្នំពេញ ដើម្បីទាមទារឲ្យមានការគោរពសិទ្ធិមន្សុសពិតប្រាកដនៅកម្ពុជា។
ក្រុមសម្ព័ន្ធអង្គការសង្គមស៊ីវិល «CHRAC» បានរៀបចំប្ររព្វទិវាសិទ្ធិមនុស្សអន្តរជាតិខួបលើកទី៦៥ ថ្ងៃទី១០ ខែធ្នូ ឆ្នាំ២០១៣នេះ នៅរមណីយដ្ឋានវត្តភ្នំ ដោយមានអ្នកចូលរួមរាប់ពាន់នាក់។
លើសពីនេះគណបក្សសង្គ្រោះជាតិ ដែលដឹកនាំដោយឯកឧត្តម សម រង្ស៊ី និងឯកឧត្តម កឹម សុខា ជាប្រធាន និងអនុប្រធានគណបក្ស ព្រមទាំងថ្នាក់ដឹកនាំគណបក្ស បានធ្វើពិធីហែក្បួនដោយសន្តិវិធីចែកជា៣ក្រុម ដើម្បីអបអរសាទរទិវាសិទ្ធិមនុស្សអន្តរជាតិ ខួបលើកទី៦៥ ថ្ងៃទី១០ខែធ្នួ ឆ្នាំ២០១៣ ដើម្បីទាមទារសិទ្ធិធ្វើសេចក្តីសម្រេចចិត្តក្នុងការជ្រើសរើសអ្នកដឹកនាំ និងទាមទារឲ្យមានគោរពសិទ្ធិមនុស្សពិតប្រាកដនៅកម្ពុជា។
ដោយឡែកគណបក្សប្រជាជនកម្ពុជា ដែលជាគណបក្សនយោបាយកាន់កាប់អំណាចដាច់មុខនៅកម្ពុជា និងរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីក៏បានចេញសេចក្តីថ្លែងការណ៍របស់ខ្លួនក្នុងន័យអបអរសាទរទិវាសិទ្ធិមនុស្សអន្តរជាតិ ខួបលើកទី៦៥ ថ្ងៃទី១០ ខែធ្នូ ឆ្នាំ២០១៣នេះដែរ ដោយគណបក្សក៏ដូចជារាជរដ្ឋាភិបាលអំពាវនាវដល់គ្រប់គណបក្សនយោបាយ អង្គការ ស្ថាប័ន និងជនរួមជាតិទាំងអស់បន្តរួមសាមគ្គីគ្នាការពារ ពង្រឹង និងពង្រីកនូវស្មារតី គោរពសិទ្ធិមនុស្ស និងប្រជាធិបតេយ្យជាមួយនឹងការគោរពអនុវត្តន៍ច្បាប់យ៉ាងខ្ជាប់ខ្ជួន ដើម្បីធានានូវសន្តិភាព ស្ថិរភាព និងការអភិវឌ្ឍមាតុភូមិ ព្រមទាំងចូលរួមឲ្យសកម្មក្នុងការលើកស្ទួយសិទ្ធិ និងសេរីភាពរបស់មនុស្សជាតិ។
មជ្ឈដ្ឋានអ្នកវិភាគកិច្ចការសង្គមនៅកម្ពុជាបានលើកឡើងថា ការប្រារព្វទិវាសិទ្ធិមនុស្សអន្តរជាតិខួបលើកទី៦៥ ថ្ងៃទី១០ខែធ្នូ ឆ្នាំ២០១៣នេះ មានសកម្មភាពផុសផុលខ្លាំងគួរឲ្យចាប់អារម្មណ៍ ដែលសបញ្ជាក់ឲ្យឃើញថា ប្រជាពលរដ្ឋកម្ពុជា ចាប់ផ្តើមមានសេចក្តីក្លាហានក្នុងការប្រើប្រាស់សិទ្ធិសេរីភាពរបស់ខ្លួនបានល្អប្រសើរជាងពេលមុនៗ ហើយក៏ជាសញ្ញាប្រាប់ទៅគណបក្សនយោបាយកាន់អំណាចត្រូវតែធ្វើការកែទម្រង់ផ្នែកការគោរពសិទ្ធិមនុស្សនៅកម្ពុជាឲ្យបានពិតប្រាកដ កុំឲ្យមានតែនៅលើក្រដាស និងឮនៅតាមតែក្បាលមេក្រូ៕
Source from: www.dtn7.com
Loading...
Post a Comment