ខេត្ដកណ្ដាល៖អាជ្ញាធរនិងកងកម្លាំងសមត្ថកិច្ចចម្រុះបានធ្វើដំណើរទៅកាន់ទីតាំងភ្នំព្រះរាជទ្រព្យឬភ្នំឧដុង្គស្ថិតក្នុងស្រុកពញាឮខេត្ដកណ្ដាលខេត្ដកណ្ដាល ៖ អាជ្ញាធរនិងកងកម្លាំងសមត្ថកិច្ចចម្រុះ បានធ្វើដំណើរទៅកាន់ទីតាំង ភ្នំព្រះរាជទ្រព្យ ឬភ្នំឧដុង្គ ស្ថិតក្នុងស្រុកពញាឮ ខេត្ដកណ្ដាល កាលពីព្រឹកថ្ងៃទី១១ ខែធ្នូ ឆ្នាំ២០១៣ បន្ទាប់ពីមានករណីចោរលួច យកវត្ថុបុរាណ មានតម្លៃដែលតម្កល់ទុក នៅក្នុងព្រះសក្យមុនីចេតិយ លើកំពូលភ្នំព្រះរាជទ្រព្យកាលពីវេលាម៉ោង ២រំលងអធ្រាត្រ ឈានចូលថ្ងៃទី១០ ខែធ្នូ ឆ្នាំ២០១៣ បង្កឲ្យមានការភ្ញាក់ផ្អើល ប្រជាពលរដ្ឋនៅតំបន់នោះ ហើយគេលើកជាសំណួរថា តើក្រុមចោរចូលលួច ទ្រព្យសម្បត្តិដ៏មានតម្លៃមហាសាលរបស់ជាតិ យ៉ាងដូចម្តេច ហើយមន្ត្រីថ្នាក់ណាខ្លះ ជាអ្នកទទួលខុសត្រូវ?
ប្រជាពលរដ្ឋរស់នៅជើងភ្នំ ព្រះរាជទ្រព្យ បាននិយាយថា ពួកគាត់ពុំបានដឹងថា មានរឿងអ្វីកើតឡើង នៅលើភ្នំព្រះរាជទ្រព្យទេ ទើបតែនៅព្រឹកថ្ងៃទី១១ ខែធ្នូ ឆ្នាំ២០១៣ ក្រុមមន្ត្រីនិងសមត្ថកិច្ចរាប់សិបនាក់បានចុះមកដល់ព្រះសក្យមុនីចេតិយ ប្លែកខុសពីធម្មតា ធ្វើឱ្យពួកគាត់មានការងឿងឆ្ងល់យ៉ាងខ្លាំង ។ ក្រោយមកទើបឮក្រុមមន្ត្រី ខ្សឹបខ្សាវគ្នាថា មានក្រុមចោរចូលលួច យកវត្ថុបុរាណមានតម្លៃ ដែលក្រសួងវប្បធម៌ និងអាជ្ញាធរពាក់ព័ន្ធ យកមកតម្កល់ទុកក្នុង ព្រះសក្យមុនីចេតិយ។ មានការបញ្ជាក់ផងដែរថា ចាប់តាំងពីមានតម្កល់វត្ថុបុរាណ និងទ្រព្យសម្បត្តិដ៏មានតម្លៃ នៅក្នុងព្រះសក្យមុនីចេតិយ គេឃើញមានកងកម្លាំងជាច្រើននាក់ បានប្ដូរវេនគ្នាយាមកាម យ៉ាងគគ្រឹកគគ្រេងផងដែរ។
ប្រភពដដែលបានបន្ដទៀតថា នៅក្នុង ព្រះសក្យមុនីចេតីយ មានតម្កល់ព្រះសរីរិកធាតុ និងព្រះពុទ្ធរូបមានតម្លៃរាប់ពាន់អង្គ ធ្វើអំពីមាស លង្ហិន សំរិទ្ធ…ហើយនៅទីនោះ មានអ្នកយាមប្រចាំការជិត ៣០នាក់។ ប៉ុន្តែនៅពេលដែលជនមិនស្គាល់មុខ ចូលលួចវត្ថុបុរាណ និងទ្រព្យសម្បត្តិមហាសាល របស់ប្រទេសជាតិបែបនេះ ប្រធានក្រុមបុគ្គលិកបណ្ដែត ដែលយាមកាមនៅទីនោះ មិនមានវត្ដមាននៅលើភ្នំនោះទេ ។ ពាក់ព័ន្ធករណីខាងលើនេះ ពុំទាន់មានការបញ្ជាក់ ពីអាជ្ញាធរនិងសមត្ថកិច្ចថា មានវត្ថុបុរាណអ្វីខ្លះ ដែលត្រូវចោរលួចយកទៅនោះទេ ហើយខាងក្រសួងវប្បធម៌ និងវិចិត្រសិល្បៈ ដែលគ្រប់គ្រងផ្ទាល់ នៅព្រះសក្យមុនីចេតិយ ក៏ពុំទាន់បានប្រកាសជាផ្លូវការ នៅឡើយដែរ៕
Source from: watphnom-news.com
Loading...
Post a Comment