ខេត្តបាត់ដំបង៖បុរសម្នាក់ឈ្មោះសោមសុធាហៅបារាំងជានគរបាលសន្តិសុខស្រុកសង្កែខេត្តបាត់ដំបង ៖ បុរសម្នាក់ឈ្មោះ សោម សុធា ហៅបារាំង ជានគរបាលសន្តិសុខ ស្រុកសង្កែ បានដកកាំភ្លើង បញ្ចេញកំហឹងជួសឪពុក វាយបុរសម្នាក់ដែលកំពុងស្ទូចត្រី នៅស្ទឹងសង្កែ ក្រោមស្ពានរថភ្លើង កាលពីវេលាម៉ោង ១០និង៤០នាទីព្រឹកថ្ងៃទី២០ ខែធ្នូ ឆ្នាំ២០១៣ ស្ថិតក្នុងភូមិវត្តកណ្តឹង សង្កាត់វត្តគក្រុងបាត់ដំបង ហើយអំឡុងពេលកើតហេតុ សាក្សីបានរាយការណ៍ជូនសមត្ថកិច្ច ឲ្យជួយអន្តរាគមន៍ភ្លាមៗ តែពេលសមត្ថកិច្ចទៅដល់ ក៏ដកថយរៀងៗខ្លួន។
ជនរងគ្រោះមានឈ្មោះ លីនី អាយុ ២៥ឆ្នាំ រស់នៅភូមិអូតាគាំ៣ សង្កាត់ទួលតាឯក ក្រុងបាត់ដំបង បានអោយដឹងថា មុនពេលកើតហេតុ បុរសវ័យចំណាស់ម្នាក់ ជិះកង់តាមផ្លូវជាតិលេខ៥៧អា ពីលិចទៅកើតខ្លួនក៏ជិះម៉ូតូពីក្រោយ។ ពេលមកដល់មុខផ្សារទំនើបថ្មី បន្ទាយគុយសេចាស់ បុរសចំណាស់ម្នាក់នោះ បានបត់កង់ទៅខាងស្តាំដៃ បំរុងចូលតាមផ្លូវលំ ហើយពេលនោះ មិនដឹងជាគាត់ខឹង ជនរងគ្រោះដែលស៊ីផ្លេម៉ូតូ ឬយ៉ាងណានោះទេ ដោយគាត់បានឈប់កង់ ស្រែកជេរនិងឲ្យជនរងគ្រោះឈប់ តែជនរងគ្រោះមិនព្រមឈប់ ក៏ជិះទៅស្ទូចត្រីតែម្តង។
មួយសន្ទុះក្រោយមក បុរសចំណាស់ម្នាក់នោះមានឈ្មោះ វណ្ណា អាយុជាង ៥០ឆ្នាំនិងកូនឈ្មោះ សោមសុធា ហៅ បារាំងអាយុជាង ២០ឆ្នាំ ជានគរបាលសន្តិសុខ ស្រុកសង្កែ បានជិះម៉ូតូម៉ាកគ្លីក ទៅដល់កន្លែងស្ទូចត្រី ដកកាំភ្លើងខ្លី ហើយស្រែកគំរាមហៅ ជនរងគ្រោះមកជិត រួចវាយ១ដៃត្រូវភ្នែកឆ្វេង និងយកកាំភ្លើងខ្លី វាយត្រូវដៃឆ្វេងកូតរលាត់ស្បែកទៀតផង។ ពេលសមត្ថកិច្ចទៅដល់ ស្គាល់មុខជនបង្កច្បាស់ មិនមាននរណាហ៊ានធ្វើអ្វីឡើយ បានត្រឹមតែខ្សិបគ្នាហើយដកថយ ទៅវិញអស់។
យ៉ាងណាក៏ដោយលោក ស ថេត ស្នងការនគរបាល ខេត្តបាត់ដំបង បានអោយដឹងថា ក្រោយពីទទួលព័តមាននេះ លោកនឹងស្រាវជ្រាវ ហៅជនល្មើសយកមកដាក់ទោស។ ពាក់ព័ន្ធករណីនេះលោក ស៊ុន តឹក ប្រធានអង្គការសិទ្ធិមនុស្សលីកាដូ ខេត្តបាត់ដំបង បានអោយដឹងថា សមត្ថកិច្ចអាចឃាត់ខ្លួន ជនសង្ស័យតាមផ្លូវច្បាប់បាន តែមិនត្រូវដកកាំភ្លើង វាយគំរាមធ្វើបាបជនស្លូតត្រង់ទេ ហើយទោះជាអ្នកប្រើប្រាស់កាំភ្លើង ជាសមត្ថកិច្ចក៏ដោយ បើដកកាំភ្លើងប្រើខុសច្បាប់ ក៏ត្រូវមានទោសដូចគ្នា។
មានការរំលឹកផងដែរថា លោក វណ្ណា អាយុជាង ៥០ឆ្នាំជាគ្រូបង្រៀន នៅស្រុករតនមណ្ឌល និងកូនឈ្មោះ សោម សុធា ហៅ បារាំងជានគរបាលសន្តិសុខ ស្រុកសង្កែ ធ្លាប់ដកកាំភ្លើងខ្លី ភ្ជង់អ្នកជិតខាងម្នាក់ បណ្តាលអោយគាំងបេះដូងស្លាប់ កាលពីឆ្នាំ ២០១២ ក្នុងករណីកាយប្រឡាយ បង្ហូរទឹកកាត់មុខផ្ទះ។ ករណីនេះអ្នកយកព័ត៌មាន មិនអាចសុំការបំភ្លឺបន្ថែម ពីលោក នួន សាន ព្រះរាជអាជ្ញាខេត្តបាត់ដំបង បានឡើយ ព្រោះទូរស័ព្ទចូល មិនមានអ្នកទទួល៕
Source from: watphnom-news.com
Loading...
Post a Comment