យុវជន​ម្នាក់​ស្លាប់​និង​ម្នាក់​ទៀត​រង​របួសធ្ងន់​ក្នុង​ហេតុការណ៍​គ្រោះថ្នាក់​ចរាចរណ៍​ដ៏​រន្ធត់​មួយ​បង្ក​ដោយ​រថយន្ត​ពាក់​ស្លាក​លេខ​រដ្ឋ​បុក​ពេញទំហឹង​

12/20/2013 05:00:00 AM

កាលពីវេលាម៉ោង០០និង៣០នាទីរំលងអធ្រាត្រ ឈានចូលថ្ងៃទី១៩ ខែធ្នូ ឆ្នាំ២០១៣នេះ មានហេតុការណ៍គ្រោះថ្នាក់ចរាចរណ៍ដ៏រន្ធត់មួយកើតឡើងនៅចំណុចទីបញ្ជាការដ្ឋានកងរាជអាវុធហត្ថលើផ្ទៃប្រទេស លើបណ្តោយវិថីលេខ២៨៩ ភូមិទី១៣ សង្កាត់បឹងកក់១ ខណ្ឌទួលគោក រាជធានីភ្នំពេញ បង្កដោយរថយន្ត១គ្រឿងពាក់ស្លាកលេខរដ្ឋ 20.2-0315 បុកយ៉ាងពេញទំហឹងទៅលើទោចក្រយានយន្ត១គ្រឿងទៀតជិះគ្នា២នាក់ បណ្តាលឲ្យអ្នកជិះទោចក្រយានយន្តជាយុវជនម្នាក់ស្លាប់យ៉ាងអាណោចអាធ័មនៅកន្លែងកើតហេតុ និងយុវជនម្នាក់ទៀតរងរបួសធ្ងន់ ហើយអ្នកបើកបររថយន្តបង្កក៏បានរត់គេចខ្លួនបាត់ បន្សល់ទុកតែរថយន្តបង្កដែលខូចខាតនៅផ្នែកខាងមុខយ៉ាងដំណំប៉ុណ្ណោះ ។

រថយន្តបង្កមានម៉ាកមីតស៊ុយប៊ីស៊ី ត្រាយតុន ពណ៌ទឹកប្រាក់ ពាក់ស្លាកលេខរដ្ឋ 20.2-0315 បើកបរដោយបុរសម្នាក់ក្នុងស្ថានភាពស្រវឹងស្រាយ៉ាងជោកជាំ ហើយរត់គេចខ្លួបបាត់នៅក្រោយពេលកើតហេតុ ។ រីឯភាគីជនរងគ្រោះជាយុវជនចំនួន២នាក់ជាអ្នកជិះទោចក្រយានយន្ត១គ្រឿងម៉ាកសង់កូរ៉េ ពណ៌ក្រហម ពាក់ស្លាកលេខភ្នំពេញ 1M-0513 ដែលមិនស្គាល់អត្តសញ្ញាណ គឺគ្រាន់តែដឹងថា ម្នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតរងបួសធ្ងន់ ត្រូវបានដឹកយកទៅសង្គ្រោះបន្ទាន់នៅគ្លីនិកឯកជន ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្ត១គ្រឿងបើកបរដោយបុរសម្នាក់ក្នុងល្បឿនយ៉ាងលឿន តាមបណ្តោយវិថីលេខ២៨៩ ក្នុងទិសដៅពីត្បូងទៅជើង ក៏បានបុកយ៉ាងពេញទំហឹងទៅលើទោចក្រយានយន្ត១គ្រឿងម៉ាកសង់កូរ៉េជិះគ្នា២នាក់ ធ្វើឲ្យទោចក្រយានយន្តកៀបជាប់នៅខាងក្រោមរថយន្តតែម្តង និងជនរងគ្រោះម្នាក់បានស្លាប់នៅកន្លែងកើតហេតុ និងម្នាក់ទៀតរងរបួសធ្ងន់ធ្ងរ ។ ក្រោយមកអ្នកបើកបររថយន្តបង្កបានរត់គេចខ្លួនបាត់ បន្សល់ទុកតែរថយន្តប៉ុណ្ណោះនៅក្រោយពេលកើតហេតុភ្លាមៗ រីឯជនរងគ្រោះម្នាក់ដែលរងរបួសធ្ងន់ធ្ងរ ត្រូវបានរថយន្តសាមុយដឹកយកទៅសង្គ្រោះជាបន្ទាន់នៅគ្លីនិកឯកជន ឃឹម រ៉ានី និងសាកសពយុវជនម្នាក់ទៀត ត្រូវបានដឹកយកទៅតម្កល់ទុកនៅវត្តសំបូរមាស រង់ចាំស្វែងរកបងប្អូនមកទទួលយកទៅចាត់ចែងធ្វើបុណ្យតាមប្រពៃណី ។

រថយន្តបង្ក និងទោចក្រយានយន្តដែលទទួលរងការខូចខាតស្ទើរទាំងស្រុងនោះ ត្រូវបានសមត្ថកិច្ចធ្វើការវាស់វែង និងអូសយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំឲ្យម្ចាស់ចូលខ្លួនមកដោះស្រាយតាមក្រោយ ។

អនុលោមតាមមាត្រា៥ និងមាត្រា៩នៃអនុក្រឹត្យរបស់រាជរដ្ឋាភិបាលលេខ៧៧អនក្រ.បក ចុះថ្ងៃទី២៨ ខែវិច្ឆិកា ឆ្នាំ២០០៣ ស្តីពីការចេញស្លាកលេខសម្គាល់យានជំនិះ គឺបានបង្ហាញថា រថយន្តដែលពាក់ស្លាកលេខរដ្ឋ 20.2-0315 គឺជារថយន្តទ្រព្យសម្បត្តិរដ្ឋដែលប្រើប្រាស់ក្រោយក្រសួងអភិវឌ្ឍន៍ជនបទ ។ ដូច្នេះ ប្រសិនបើរថយន្តបង្កនេះជារថយន្តទ្រព្យសម្បត្តិមែននោះ គឺអ្នកប្រើប្រាស់អាចជាមន្ត្រីបម្រើការងារនៅក្រសួងអភិវឌ្ឍន៍ជនបទ ប៉ុន្តែបើរថយន្តបង្កជារថយន្តកម្មសិទ្ធិឯកជនវិញនោះ គឺជនបង្កត្រូវមានកំហុសឆ្គងមួយករណីទៀត ដោយបានប្រើប្រាស់ស្លាកលេខប្រភេទរដ្ឋ ខុសច្បាប់ទាំងស្រុង ៕

Stat Stat-2 Stat-3