កាលពីថ្ងៃទី១៨ ខែធ្នូ ឆ្នាំ២០១៣ម្សិលមិញនេះ ក្រសួងប្រៃសណីយ៍និងទូរគមនាគមន៍ បានចេញសេចក្តីប្រកាសព័ត៌មានមួយបង្ហាញអំពីលទ្ធផលនៃកិច្ចប្រជុំនាថ្ងៃទី១៣ ខែធ្នូ ឆ្នាំ២០១៣កន្លងមក រវាងបញ្ញត្តិករទូរគមនាគមន៍កម្ពុជា និងប្រតិបត្តិករក្រុមហ៊ុនទូរស័ព្ទចល័ត និងអចល័តទាំង៩ ទាក់ទងនឹងការអនុវត្តន៍ដំណាក់កាលទី២ តាមខ្លឹមសារនៃលិខិតលេខ១៨៨៨សជណ ចុះថ្ងៃទី២១ ខែវិច្ឆិកា ឆ្នាំ២០១៣ របស់ទីស្តីការគណៈរដ្ឋមន្ត្រី សំដៅបន្តអនុវត្តន៍ប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ រវាងក្រសួងប្រៃសណីយ៍និងទូរគមនាគមន៍ និងក្រសួងសេដ្ឋកិច្ចនិងហិរញ្ញវត្ថុ ។
ក្រសួងប្រៃសណីយ៍និងទូរគមនាគមន៍ ដែលមានឯកឧត្តម នាយឧត្តមសេនីយ៍ផ្កាយមាស៤ ប្រាក់ សុខុន ជារដ្ឋមន្ត្រី បានចាត់ទុកសេចក្តីសម្រេចរបស់រាជរដ្ឋាភិបាលតាមស្មារតីលិខិតលេខ១៨៨៨សជណ ចុះថ្ងៃទី២១ ខែវិច្ឆិកា ឆ្នាំ២០១៣ របស់ទីស្តីការគណៈរដ្ឋមន្ត្រី គឺដើម្បីការពារផលប្រយោជន៍របស់វិនិយោគិន អ្នកប្រើប្រាស់ និងចំណូលរបស់រដ្ឋ តាមរយៈការធានាបាននូវការប្រកួតប្រជែងដោយស្មោះត្រង់ ការទទួលបានថ្លៃសមរម្យ និងសេវាប្រកបដោយគុណភាពល្អប្រសើរចំពោះអ្នកប្រើប្រាស់ ។
សូមបញ្ជាក់ជូនថា កាលពីថ្ងៃទី១៤ ខែធ្នូ ឆ្នាំ២០១៣កន្លងមក ក្រុមយុវជន និស្សិត បញ្ញវន្ត និងព្រះសង្ឃ ប្រមាណជាង៥០នាក់-អង្គ បានធ្វើការជួបជុំគ្នានៅរមណីយដ្ឋានវត្តភ្នំ ដើម្បីតវ៉ាទាមទារឲ្យរាជរដ្ឋាភិបាល តាមរយៈក្រសួងប្រៃសណីយ៍និងទូរគមនាគមន៍ពិចារណា និងសម្រេចនិរាករណ៍ប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញចោលជាអសារបង់ ដោយក្រុមអ្នកតវ៉ាបានលើកហេតុផលថា ការកំណត់ថ្លៃសេវាទូរស័ព្ទនេះ គ្មានតម្លាភាព ដើម្បីឲ្យមានការប្រកួតប្រជែងដ៏ត្រឹមត្រូវមួយលើវិស័យទូរគមនាគមន៍ ស្របតាមគោលការណ៍សេដ្ឋកិច្ចទីផ្សារសេរី នាំឲ្យប៉ះពាល់ដល់ជីវភាពរស់នៅរបស់ប្រជាពលរដ្ឋ ជាពិសេសអ្នកក្រីក្រ តូចតាច ៕
Source from: www.dtn7.com
Loading...
Post a Comment