កាលពីថ្ងៃទី២៧ ខែវិច្ឆិកា ឆ្នាំ២០១៣កន្លងមក អង្គភាពប្រឆាំងអំពើពុករលួយដែលមានឯកឧត្តមបណ្ឌិត ឱម យ៉ិនទៀង ជាប្រធាន និងមានកូនប្រុសបង្កើតចំនួន២នាក់ជាឧត្តមសេនីយ៍យោធា ធ្វើជាឧបការី និងជំនួយការឲ្យឪពុក ជាប្រធានអង្គភាពនេះ បានធ្វើការចាប់ឃាត់ខ្លួនមន្ត្រីរាជការម្នាក់ឈ្មោះ ភី រិទ្ធ ជាអនុប្រធានសាខាពន្ធដារខេត្តព្រះសីហនុ ពាក់ព័ន្ធនឹងបទល្មើសយកថ្លៃសេវាពន្ធដារលើពីការកំណត់របស់រដ្ឋ ។ និងនៅថ្ងៃដដែលនេះ អង្គភាពប្រឆាំងអំពើពុករលួយក៏បានធ្វើការចាប់ឃាត់ខ្លួនមន្ត្រីអគ្គិសនីខេត្តមណ្ឌលគិរីចំនួន២នាក់ទៀត គឺមានឈ្មោះ សួត សារឹម ភេទប្រុស ទទួលបន្ទុកផ្នែកអាជីវកម្ម និងឈ្មោះ នី សុពណ៌ ភេទស្រី ទទួលបន្ទុកជាបេឡា រស់នៅក្រុងសែនមនោរម្យ ខេត្តមណ្ឌលគិរី ពាក់ព័ន្ធនឹងការក្លែងបន្លំឯកសារ និងកិបកេងថវិកាក្រុមហ៊ុនអគ្គិសនីកម្ពុជា "EDC" ចំនួនជាង៤០០លានរៀល ។
ដោយឡែក កាលពីថ្ងៃទី១៩ ខែធ្នូ ឆ្នាំ២០១៣ម្សិលមិញនេះ អង្គភាពប្រឆាំងអំពើពុករលួយ បានធ្វើការចាប់ឃាត់ខ្លួនមន្ត្រីរាជការម្នាក់ទៀតឈ្មោះ លីវ ប៊ុនថន ជាប្រធានផ្នែកគ្រប់គ្រងអ្នកជាប់ពន្ធមធ្យមនៃសាខាពន្ឌដារខេត្តសៀមរាប បញ្ជូនទៅតុលាការពាក់ព័ន្ធនឹងការធ្វើឯកសារកំណត់ពន្ធខ្ពស់ ដើម្បីទារថ្លៃឲ្យម្ចាស់សណ្ឋាគារ និងម្ចាស់ក្រុមហ៊ុននានាបង់លើសកម្រិតកំណត់របស់រដ្ឋ ។
មជ្ឈដ្ឋានអ្នកវិភាគកិច្ចការសង្គមនៅកម្ពុជា បានលើកឡើងថា គេកម្រ ឬសឹងតែមិនឃើញអង្គភាពប្រឆាំងអំពើពុករលួយស្រាវជ្រាវអង្កេតរកឃើញ និងចាត់ការឈានទៅចាប់ខ្លួនមន្ត្រីរាជការថ្នាក់ធំៗខាងលើ ពីបទប្រព្រឹត្តអំពើពុករលួយបញ្ជូនទៅតុលាការកាត់ទោសតាមច្បាប់ឡើយ គឺចាត់ការបានត្រឹមមន្ត្រីរាជការថ្នាក់តូចតាច កំប៉ិកកំប៉ុកប៉ុណ្ណោះនៅក្នុងសម័យអនុវត្តន៍អនុសាសន៍របស់បុរសខ្លាំង "សិល្បៈនៃការចែករំលែក" ដែលថ្នាក់ក្រោមតែងរកលុយជូនថ្នាក់លើ ក្លាយជាវប្បធម៌ដ៏ពេញនិយមនៅកម្ពុជាបច្ចុប្បន្ន ។
ក្រុមអ្នកជំនាញសេដ្ឋកិច្ចបាននិយាយថា គេគួរតែធ្វើការត្រួតពិនិត្យផ្ទៀងផ្ទាត់មើលថា តើអង្គភាពប្រឆាំងអំពើពុករលួយចំណាយថវិកាជាតិក្នុងមួយឆ្នាំៗអស់ចំនួនប៉ុន្មាន ហើយអង្គភាពប្រឆាំងអំពើពុករលួយនេះធ្វើប្រតិបត្តិការបោសសម្អាតអំពើពុករលួយដែលតែងតែប៉ះទៅលើមន្ត្រីថ្នាក់ក្រោមតូចតាចនោះ បានចំណេញថវិកាជាតិមកវិញប៉ុន្មានដែរ ? ប្រសិនបើរកឃើញថាខាតថវិកាជាតិនោះ គឺមានន័យថា អង្គភាពប្រឆាំងអំពើពុករលួយដែលមានឯកឧត្តមបណ្ឌិត ឱម យ៉ិនទៀង ជាប្រធាន បង្កើតឡើងសម្រាប់តែ "ប្រថាប់ត្រា" ឬធ្វើឲ្យតែល្អមើល ដើម្បីនាំគ្នាចាយលុយជាតិប៉ុណ្ណោះ ៕
Source from: www.dtn7.com
Loading...
Post a Comment