កាលពីវេលាម៉ោងប្រមាណ១៤រសៀល នាថ្ងៃទី១៨ ខែធ្នូ ឆ្នាំ២០១៣នេះ នៅទីតាំងផ្ទះជួល១កន្លែងឋិតនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ មានហេតុការណ៍ភ្ញាក់ផ្អើលផ្តើមចេញពីអំពើហិង្សាក្នុងគ្រួសារមួយបានកើតឡើង ដោយបុរសជាប្តីនិងមានមុខរបរជាមន្ត្រីយោធាម្នាក់ដាច់ចិត្តអារ.ក សម្លាប់ប្រពន្ធដែលមានមុខរបរជាបុគ្គលិកកាស៊ីណូ ណាហ្គា រួចហើយចងក សម្លាប់ខ្លួនឯងតាមក្រោយ។
ប្រភពព័ត៌មានពីប្រជាពលរដ្ឋរស់នៅក្បែរកន្លែងកើតហេតុបានឲ្យដឹងថា បុរសជាប្តីដែលមានកំហឹងពុះកញ្ជ្រោលចិត្តដាច់អារ.ក សម្លាប់ប្រពន្ធនោះ មានឈ្មោះ សុខ សវណ្ណារុន អាយុ៥៧ឆ្នាំ មានមុខរបរជាយោធា និងស្ត្រីជាប្រពន្ធមានឈ្មោះ ឈុន សុភាព អាយុ៣៤ឆ្នាំ មានមុខរបរជាបុគ្គលិកកាស៊ីណូណាហ្គា ។ ប្តីប្រពន្ធទាំងពីរនាក់នេះ បានមកជួលផ្ទះស្នាក់នៅដែលជាកន្លែងកើតហេតុទើបបានរយៈពេលប្រមាន៦ខែប៉ុណ្ណោះ ប៉ុន្តែរយៈពេល១ខែចុងក្រោយនេះ តែងតែមានទំនាស់ជាមួយគ្នាស្ទើរសឹងរាល់ថ្ងៃ ដែលធ្វើឲ្យអ្នករស់នៅក្បែរខាងសង្ស័យថា បណ្តាលមកពីបុរសជាប្តីលេងល្បែងចាក់ភ្នាល់បាល់និងកន្ទុយលេខចាញ់អស់លុយច្រើនពេកគ្មានលុយចូលផ្ទះ និងអ្នកខ្លះទៀតសង្ស័យថា មកពីបុរសជាប្តីមានចិត្តប្រច័ណ្ឌទៅលើប្រពន្ធរបស់ខ្លួនដែលនៅមានសម្រស់និងនៅវ័យក្មេង ។
ប្រភពព័ត៌មានដដែលបានឲ្យដឹងដែរថា ដោយសារទំនាស់ក្នុងគ្រួសារបែបនេះ ទើបធ្វើឲ្យបុរសជាប្តីមានកំហឹងពុះពោរដាច់ចិត្តយកផ្លែកូនកាំបិតអារ.ក សម្លាប់ប្រពន្ធ តែត្រូវប្រពន្ធរើបម្រះនិងបានស្រែកឲ្យអ្នកក្បែរខាងឮថាជួយផងៗ រួចលោតពីផ្ទះជាន់ទី១មកក្រោមទើរលើដំបូលផ្ទះជាន់ក្រោមនិងរមៀលធ្លាក់មកដី ។ ដោយឡែក បុរសជាប្តីក្រោយពីប្រើអំពើហិង្សាលើប្រពន្ធរួចហើយៗស្មានតែប្រពន្ធស្លាប់ក៏បានសម្រេចចិត្តចងកសម្លាប់ខ្លួនឯងនៅមុខទ្វារបន្ទប់ដេកតាមក្រោយ ប៉ុន្តែមិនទាន់ស្លាប់ពីព្រោះ អ្នកជិតខាងបានមកជួយរារាំងនិងសង្គ្រោះទាន់ហើយចាប់ខ្លួនប្រគល់ឲ្យទៅសមត្ថកិច្ចមូលដ្ឋាន ។
ក្រោយហេតុការណ៍នេះកើតឡើងទាំងស្ត្រីជាប្រពន្ធដែលប្តីប៉ុនប៉ងអារ.ក សម្លាប់មិនបានសម្រេចតែមានស្មាមរបួសត្រង់បំពង់ក ដោយផ្លែកូនកាំបិតនិងមានស្មានដាច់រយះដោយក្រចកដៃ ព្រមទាំងបុរសជាប្តីដែលមានស្មាមរលាត់នៅត្រង់បំពង់កពេលចងកសម្លាប់ខ្លួនឯងតែមិនបានសម្រេចនោះ ត្រូវបានដឹកយកទៅសង្គ្រោះនៅមន្ទីរពេទ្យព្រះកុសុមៈភ្លាមៗ ដែលគេរំពឹងទុកថា គ្រួសារប្តីប្រពន្ធនេះ នឹងអាចគេចផុតពីសេចក្តីស្លាប់បាន ដោយសារស្ថានភាពគ្រប់យ៉ាងត្រូវបានសង្គ្រោះនិងរារាំងទាន់ពេលវេលា ។
ពាក់ព័ន្ធនឹងករណីអំពើហិង្សាក្នុងគ្រួសារប្តីប្រពន្ធមួយគូនេះ បណ្តាលមកពីមូលហេតុអ្វីពិតប្រាកដនោះ គឺសមត្ថកិច្ចកំពុងស្រាវជ្រាវឲ្យឃើញជាក់ស្តែបន្តទៀត ៕
Source from: www.dtn7.com
Loading...
Post a Comment