នាយទាហាន និងពលទាហានកំពុងឈរជើងការពារព្រំដែនខ្មែរ-ថៃក្នុងតំបន់ជប់គគីរ ឃុំអំពិល ស្រុកបន្ទាយអំពិល ខេត្តឧត្តរមានជ័យ លើចំណុចខ្នងភ្នំដងរែក បានសម្តែងនូវប្រតិកម្មយ៉ាងខ្លាំង ទៅនឹងការអនុវត្តគម្រោងសាងសង់កាស៊ីណូមួយកន្លែង របស់លោកឧកញ៉ា លឹម ហេង អគ្គនាយកក្រុមហ៊ុន លឹម ហេង អភិវឌ្ឍន៍ ដែលធ្វើឲ្យប៉ះពាល់ដល់តំបន់លេណដ្ឋានរបស់កងទ័ព ។
លោកឧត្តមសេនីយ៍ឯក ឈិន ច័ន្ទពណ៌ អគ្គមេបញ្ជាការរងនៃកងយោធពលខេមរភូមិន្ទ ទទួលខុសត្រូវសមរភូមិទិសឧត្តរមានជ័យ ធ្លាប់បានមានប្រសាសន៍ប្រាប់បណ្តាញព័ត៌មានកាលពីថ្ងៃទី១៧ ខែធ្នូ ឆ្នាំ២០១៣ម្សិលមិញថា លោកមានការមិនពេញចិត្តទៅនឹងគម្រោងសាងសង់កាស៊ីណូ ដែលបានចាក់ដីលុបទៅលើលេណដ្ឋានកងទ័ពដែលកំពុងឈរជើងប្រចាំការពារព្រំដែនខ្មែរ-ថៃនោះទេ ដោយលោកចង់ឲ្យលោកឧកញ៉ា លឹម ហេង ធ្វើការពិចារណា និងដកថយជាបន្ទាន់ពីតំបន់នេះ ពីព្រោះវាបានប៉ះពាល់យ៉ាងខ្លាំងទៅលើតំបន់ឈរជើងរបស់កងទ័ព ដែលជាតំបន់ក្តៅក្នុងរឿងជម្លោះព្រំដែនខ្មែរ-ថៃ ។
ក្រុមអាជ្ញាធរមូលដ្ឋានធ្លាប់ធ្វើការណែនាំទៅដល់អ្នកចាត់ការអនុវត្តន៍គម្រោងសាងសង់កាស៊ីណូរបស់ក្រុមហ៊ុនលោកឧកញ៉ា លឹម ហេង អំពីការប៉ះពាល់ដល់លេណដ្ឋានកងទ័ពការពារព្រំដែននោះដែរ ក៏ប៉ុន្តែការណែនាំនេះគ្មានប្រសិទ្ធភាពទេ ។
មជ្ឈដ្ឋានអ្នកច្បាប់ឯករាជ្យនៅកម្ពុជា បានលើកឡើងថា ជាគោលការណ៍មុននឹងក្រុមហ៊ុនលោកឧកញ៉ា លឹម ហេង ចុះអនុវត្តន៍គម្រោងសាងសង់កាស៊ីណូមួយទាំងមូលនោះ គឺសុទ្ធតែទទួលបានការអនុញ្ញាតពីរាជរដ្ឋាភិបាល ឬពីអាជ្ញាធរពាក់ព័ន្ធជាមុន ដូច្នេះប្រសិនបើការអនុវត្តគម្រោងនេះមានការប៉ះពាល់ដល់តំបន់ឈរជើងរបស់កងទ័ព គឺវាស្តែងចេញនូវមូលហេតុ២យ៉ាងដែលត្រូវត្រួតពិនិត្យឲ្យបានល្អិតល្អន់ ជាអាទិ៍ ៖ ១-មកពីអ្នកអនុញ្ញាតឲ្យក្រុមហ៊ុនលោកឧកញ៉ា លឹម ហេង សាងសង់កាស៊ីណូប៉ះពាល់ទៅលើទីតាំងឈរជើងរបស់កងទ័ព តាមរបៀប"វង្វេងផែនទី" ។ បើមានករណីនេះមែន មានន័យថា អ្នកអនុញ្ញាតគម្រោងសាងសង់កាស៊ីណូរបស់ក្រុមហ៊ុនលោកឧកញ៉ា លឹម ហេង គឺបិទភ្នែក ឬចុះហត្ថលេខាអនុញ្ញាតនៅក្នុងមុង មិនចុះត្រួតពិនិត្យមើលទីតាំងអនុវត្តន៍គម្រោងជាក់ស្តែងជាមុន ។ ២-មកពីក្រុមហ៊ុនលោកឧកញ៉ា លឹម ហេង ប្រើអំណាចនិងទឹកលុយរំលោភបំពានធ្វើការឈូសឆាយដី ដើម្បីអនុវត្តន៍គម្រោងសាងសង់កាស៊ីណូរបស់ខ្លួនប៉ះពាល់ទីតាំងឈរជើងរបស់កងទ័ពសមរភូមិមុខ ដែលក្នុងករណីនេះ គឺជាកំហុសឆ្គងរបស់ក្រុមហ៊ុនលោកឧកញ៉ា លឹម ហេង យ៉ាងធ្ងន់ធ្ងរបំផុត ។
ទោះយ៉ាងណាក៏ដោយ ទាក់ទងនឹងករណីអនុវត្តន៍គម្រោងសាងសង់កាស៊ីណូរបស់ក្រុមហ៊ុនលោកឧកញ៉ា លឹម ហេង នៅខេត្តឧត្តរមានជ័យ ដែលមានការប៉ះពាល់ដល់ទីតាំងឈរជើងរបស់កងទ័ពនៅសមរភូមិមុខនេះ ត្រូវតែរាជដ្ឋាភិបាលធ្វើការត្រួតពិនិត្យឲ្យបានច្បាស់លាស់ ដើម្បីលើកទឹកចិត្តដល់កងកម្លាំងយោធាផង និងការពារដល់ផលប្រយោជន៍ជាតិនៅសមរភូមិជួរមុខផង ៕
Source from: www.dtn7.com
Loading...
Post a Comment