ខេត្តកណ្តាល៖ប្រជាពលរដ្ឋបានរិះគន់ចំពោះអាជ្ញាធរនិងសមត្ថកិច្ចប៉ូលិសប៉េអឹមចំៗថានៅទូទាំងស្រុកស្អាងខេត្តកណ្តាលខេត្តកណ្តាល ៖ ប្រជាពលរដ្ឋបានរិះគន់ ចំពោះអាជ្ញាធរ និងសមត្ថកិច្ចប៉ូលិស ប៉េអឹមចំៗថា នៅទូទាំងស្រុកស្អាង ខេត្តកណ្តាល កំពុងតែមានករណី បើកលេងល្បែងស៊ីសង យ៉ាងគគ្រឹកគគ្រេងដូចជា បៀ អាប៉ោង កន្ទុយលេខ បនពេស្យាជាដើម ធ្វើឲ្យក្រុមអ្នកញៀនល្បែង ចាញ់ឈ្នះគ្នាក្នុងទឹកលុយ រាប់លានរៀលក្នុងមួយថ្ងៃៗ មុនដែលមាននរណាអើពើបង្ក្រាបទេ បើទោះបីជាភាព អសកម្មទាំងនេះ ផ្ទុយពីគោលនយោបាយ ភូមិឃុំមានសុវត្ថិភាព ក៏ដោយ។
ប្រជាពលរដ្ឋបានចំអកចំពោះ ភាពអសកកម្មរបស់អាជ្ញាធរ និងសមត្ថកិច្ចប៉ូលិស ប៉េអឹម នៅក្នុងស្រុកស្អាង ដែលមានភាពកម្សោយជាទីបំផុត ក្នុងការបង្ក្រាបនូវបទល្មើស ដែលកំពុងកើតឡើង នាពេលបច្ចុប្បន្ននេះ ដោយសារនៅថ្មីៗនេះ មានករណីចោរលួចកាច់សោ.កម៉ូតូ របស់ប្រជាពលរដ្ឋ នៅក្បែរប៉ុស្តិ៍ប៉ូលិស ឃុំព្រែកគយ ដោយសុវត្ថិភាព ហើយរហូតមកដល់ពេលនេះ ប៉ូលិស ប៉េអឹម មិនទាន់រកមុខសញ្ញាជនល្មើស ដើម្បីនាំមកផ្តន្ទាទោសនៅឡើយទេ។
បើតាមប្រភពព័ត៌មាន ពីប្រជាពលរដ្ឋបានបញ្ជាក់ឲ្យដឹងថា តាំងពីដើមខែធ្នូ កន្លងទៅនេះយ៉ាងហោចណាស់ មានករណីចោរលួចកាច់សោ យកម៉ូតូរបស់ប្រជាពលរដ្ឋ អស់ប្រមាណ ៥-៦ គ្រឿងហើយ នៅក្នុងឃុំព្រែកគយ ស្រុកស្អាង ខេត្តកណ្តាល។ រឿងហេតុដែលនាំឲ្យ កើតមានបទល្មើសបែបនេះ គឺបណ្តាលមកពីការបើក ឲ្យមានល្បែងស៊ីសង គ្រប់ប្រភេទយ៉ាងគគ្រឹកគគ្រេង ដូចជាបៀ អាប៉ោង កន្ទុយលេខ ដោយអាជ្ញាធរ និងសមត្ថកិច្ចប៉ូលិស ប៉េអឹម មិនបង្ក្រាប។
គេសង្កេតឃើញ សមត្ថកិច្ចពាក់ព័ន្ធទាំងអស់នោះ ចុះទៅដើរប្រមូលលុយ ពីវង់ល្បែងស៊ីសងគ្រប់ប្រភេទ ដោយមិនខ្វល់ពី ការក្រើនរំលឹករបស់រាជរដ្ឋាភិបាល ឬសេចក្តីណែនាំរបស់ថ្នាក់លើ ក្នុងការពង្រឹងគោលនយោបាយ ភូមិ-ឃុំមានសុវត្ថិភាព ជូនប្រជាពលរដ្ឋ នៅតាមមូលដ្ឋាននោះទេ។ ក៏ប៉ុន្តែថ្មីៗនេះគេសង្កេតឃើញ សមត្ថកិច្ចប៉ូលិសស្រុកស្អាង មានការភ្ញាក់រលឹកបន្តិចបន្តួច ចុះទៅធ្វើការបង្ក្រាបទីតាំង បញ្ជល់មាន់តូចតាចមួយ នៅតាមព្រៃចេកមួយកន្លែង។
សង្វៀនបញ្ជល់មាន់នោះ ស្ថិតនៅក្នុងភូមិក្បាលកោះ ឃុំកោះខ្សាច់ជន្លា ស្រុកស្អាង ត្រូវបានបង្ក្រាប កាលពីថ្ងៃទី០៦ ខែធ្នូ ឆ្នាំ២០១៣ បានរឹបអូសសំភារៈ របស់ក្រុមញៀនល្បែងបានមួយចំនួន ដូចជាកៅអីជ័រ និងម៉ូតូ២គ្រឿង ម៉ូតូ១គ្រឿងពណ៌ខ្មៅ ម៉ាកស្មាស ដែលមានម្ចាស់ឈ្មោះ ប្រា ភេទប្រុស រស់នៅក្នុងភូមិក្បាលកោះ ឃុំកោះខ្សាច់ជន្លា ស្រុកស្អាង និងម៉ូតូមួយគ្រឿងទៀត ពណ៌ក្រហម ម៉ាកស្មាសវី មានម្ចាស់ឈ្មោះ ថូ ប្រុស រស់នៅភូមិ-ឃុំជាមួយគ្នា យកមករក្សាទុកនៅក្នុង អធិការដ្ឋានស្រុកស្អាង បណ្តោះអាសន្ន។
រហូតដល់ថ្ងៃទី០៧ ខែធ្នូ ឆ្នាំ២០១៣ ទើបសមត្ថកិច្ចប៉ូលិស បានកោះហៅម្ចាស់ម៉ូតូទាំង ២គ្រឿងចូលមកដោះស្រាយ និងធ្វើការណែនាំឲ្យ ក្រុមញៀនល្បែងទាំងនេះ ធ្វើកិច្ចសន្យាបញ្ឈប់ជាកំហិត។ ក្រោយពីធ្វើការណែនាំ រួចរាល់ហើយ សមត្ថកិច្ចប៉ូលិសស្រុកស្អាង បានប្រគល់ម៉ូតូនោះ ឲ្យទៅម្ចាស់ដើមវិញទាំង ២នាក់នៅព្រឹកថ្ងៃទី០៧ ខែធ្នូ ឆ្នាំ២០១៣ ក៏ប៉ុន្តែមុននឹងការប្រគល់ម៉ូតូនេះ ទៅឲ្យម្ចាស់វិញដោយទាមទារឲ្យបង់លុយ ក្នុងមួយគ្រឿងតម្លៃ ៥០ដុល្លារ ទើបចប់រឿងគ្មានរណាដេញដោល។
ទាក់ទននឹងបញ្ហាបនល្បែងស៊ីសង ដ៏អនាធិបតេយ្យទាំងនេះ ប្រជាពលរដ្ឋនៅទូទាំងស្រុកស្អាង សូមសំណូមពរដល់លោក អ៊ាវ ចំរើន ស្នងការនគរបាលខេត្តកណ្តាល មេត្តាជួយចុះពិនិត្យមើល ពីភាពអសកកម្មរបស់មន្ត្រីប៉ូលិស ស្រុកស្អាងផង ព្រោះមន្ត្រីថ្នាក់ក្រោម មិនដែលមានចំណាត់ការ បង្ក្រាបរាល់វង់ល្បែងស៊ីសង ដូចមានរៀបរាប់ពីខាងលើនេះ ដើម្បីផ្តល់ភាពកក់ក្តៅ ចំពោះប្រជាពលរដ្ឋកុំឲ្យ មានទុក្ខព្រួយដូចសព្វថ្ងៃនេះ៕ ដោយ ព្រះច័ន្ទ
Source from: watphnom-news.com
Loading...
Post a Comment